EnergyFoods: ఒంట్లో నీరసాన్ని తగ్గించి.. బలాన్ని పెంచే సూపర్ ఫుడ్స్ !

EnergyFoods: నేటి ఉరుకుల పరుగుల జీవితంలో చాలామంది ఎదుర్కొనే ప్రధాన సమస్య ‘నీరసం’. రాత్రి సరిగ్గా నిద్రపోయినా, ఉదయం లేవగానే అలసటగా అనిపించడం, కొద్దిపాటి పనికే ఆయాసం రావడం వంటివి పోషకాహార లోపానికి సంకేతాలు. శరీరానికి తగినంత ఇంధనం (శక్తి) అందనప్పుడు మెదడు, కండరాలు మొరాయిస్తాయి. మరి ఈ నీరసాన్ని తరిమికొట్టి.. శరీరానికి ఏనుగంత బలాన్ని ఇచ్చే ఆ సూపర్ ఫుడ్స్ ఏంటో ఇప్పుడు చూద్దాం.

1. ఎండు ఖర్జూరాలు, నట్స్:

తక్షణ శక్తికి ఖర్జూరం మించిన ఆహారం లేదు. ఇందులో ఉండే గ్లూకోజ్, ఫ్రక్టోజ్ శరీరానికి వెంటనే శక్తినిస్తాయి. అలాగే బాదం, వాల్‌నట్స్ (అక్రోట్లు) లో ఉండే ఒమేగా-3 ఫ్యాటీ యాసిడ్లు కణాల ఆరోగ్యానికి మేలు చేస్తాయి. రోజూ రాత్రి పూట 5 బాదం పప్పులు, 2 ఖర్జూరాలు నానబెట్టి ఉదయాన్నే తింటే రోజంతా యాక్టివ్‌గా ఉంటారు.

2. అరటిపండు:

అరటిపండును ‘పేదల ఆపిల్’ అంటారు. ఇందులో పొటాషియం, మెగ్నీషియం, కార్బోహైడ్రేట్లు పుష్కలంగా ఉంటాయి. వ్యాయామం చేసే ముందు లేదా నీరసంగా ఉన్నప్పుడు ఒక అరటిపండు తింటే నిమిషాల్లోనే శక్తి వస్తుంది. ఇది రక్తంలోని చక్కెర స్థాయిని స్థిరంగా ఉంచి అలసటను తగ్గిస్తుంది.

3. మొలకెత్తిన గింజలు:

పెసలు, శనగలు వంటివి మొలకెత్తినప్పుడు వాటిలోని పోషక విలువలు రెట్టింపు అవుతాయి. వీటిలో ఉండే ప్రోటీన్ కండరాలకు బలాన్ని ఇస్తుంది. పీచు పదార్థం జీర్ణక్రియను మెరుగుపరిచి.. రక్తహీనతను తగ్గిస్తుంది. రక్తహీనత తగ్గితే ఆటోమేటిక్ గా నీరసం మాయమవుతుంది.

4. గుడ్లు:

గుడ్డును సంపూర్ణ ఆహారం అంటారు. ఇందులో ప్రోటీన్లు మాత్రమే కాకుండా విటమిన్-డి, బి12, ఐరన్ ఉంటాయి. కండరాల బలహీనతను తగ్గించడంలో గుడ్డు కీలక పాత్ర పోషిస్తుంది. రోజుకు ఒక ఉడికించిన గుడ్డు తింటే శరీరానికి కావాల్సిన ముఖ్యమైన అమైనో యాసిడ్లు అందుతాయి.

Also Read: ఈ ఆరోగ్య సమస్యలు ఉన్న వారు పొరపాటున కూడా మఖానా తినొద్దు

5. ఓట్స్ , చిరుధాన్యాలు:

రాగులు, జొన్నలు, సజ్జలు వంటి చిరుధాన్యాలలో ఐరన్, కాల్షియం ఎక్కువగా ఉంటాయి. వీటిని అంబలిలానో లేదా రొట్టెలానో తీసుకుంటే రక్తం వృద్ధి చెంది బలం పెరుగుతుంది. ఓట్స్ లో ఉండే ఫైబర్ శక్తిని నెమ్మదిగా, రోజంతా విడుదలయ్యేలా చేస్తుంది.

6. ఆకుకూరలు:

ముఖ్యంగా తోటకూర, పాలకూరలో ఐరన్ అధికంగా ఉంటుంది. శరీరంలో ఆక్సిజన్ సరఫరా పెరగాలంటే ఐరన్ అవసరం. ఐరన్ లోపిస్తేనే అలసట వస్తుంది. వారానికి కనీసం మూడు సార్లు ఆకుకూరలు తీసుకోవడం వల్ల శరీరం దృఢంగా మారుతుంది.