Fuel Supply Halted To US Army : జెలెన్‌స్కీతో ట్రంప్ వాగ్వాదం.. అమెరికా సైన్యానికి ఆ సేవలు నిలిపివేసిన కంపెనీ

Fuel Supply Halted To US Army | అమెరికా అధ్యక్షుడు డొనాల్డ్ ట్రంప్‌కు భారీ షాక్‌ తగిలింది. ట్రంప్‌ అధికారంలో ఉన్నంత కాలం ఒక్క లీటరు చమురు కూడా అందించబోమని నార్వే దేశ చమురు సరఫరా సంస్థ హాల్ట్‌బ్యాక్‌ బంకర్స్‌ (Haltbakk Bunkers) స్పష్టంగా తెలిపింది. ఈ సంస్థ అమెరికా సైన్యానికి, యుద్ధనౌకలకు ఇంధనం సరఫరా చేస్తోంది.

వైట్‌ హౌస్‌లో ట్రంప్, ఉక్రెయిన్ అధ్యక్షుడు జెలెన్‌స్కీ మధ్య ఘర్షణ జరిగింది. ఉక్రెయిన్-రష్యా శాంతి చర్చల సందర్భంగా ట్రంప్, ఉక్రెయిన్‌లోని విలువైన ఖనిజాలను అమెరికాకు అప్పగించాలని డిమాండ్ చేశారు. దీనికి ప్రతిస్పందిస్తూ జెలెన్‌స్కీ, రష్యా మళ్లీ దాడి చేస్తే అమెరికా రక్షణ ఇస్తుందా అని ప్రశ్నించారు. ఈ ప్రశ్నతో ట్రంప్, జెలెన్‌స్కీ మధ్య వాగ్వాదం తీవ్రమైంది.

ఈ పరిణామాల తర్వాత ప్రపంచ దేశాలు జెలెన్‌స్కీకి మద్దతు తెలిపాయి. నార్వే దేశం కూడా ఈ విషయంలో ముందుకు వచ్చింది. అమెరికా సైనిక బలగాలకు ఇంధన సరఫరాను ఆపివేస్తున్నట్లు హాల్ట్‌బ్యాక్‌ బంకర్స్ ప్రకటించింది. 2024లో అమెరికాకు 30 లక్షల లీటర్ల ఇంధనం సరఫరా చేసినట్లు సంస్థ తెలిపింది. ఈ నిర్ణయానికి వైట్‌ హౌస్‌లో జరిగిన వాగ్వాదమే కారణమని స్పష్టమైంది. అయితే, ఈ ప్రకటనను తర్వాత సోషల్ మీడియా నుంచి తొలగించారు.

Also Read: అధ్యక్షులు ఆగ్రహించిన వేళ.. ట్రంప్ కంటే ముందు చరిత్రలో దేశాధినేతల మధ్య వాగ్వాదం

వాగ్వాదానికి ముందే జెలెన్‌స్కీకి హెచ్చరిక

అయితే జెలెన్‌స్కీ, ట్రంప్ మధ్య జరిగిన వాగ్వాదం ప్రపంచవ్యాప్తంగా చర్చనీయాంశంగా మారింది. ఈ సందర్భంగా.. జెలెన్‌స్కీపై ఒక రిపబ్లికన్ సెనేటర్ సంచలన వ్యాఖ్యలు చేశారు. ఈ పరిణామానికి ముందే జెలెన్‌స్కీని హెచ్చరించినట్లు వెల్లడించారు. ట్రంప్‌తో భేటీకి ముందు, జెలెన్‌స్కీ రిపబ్లికన్ మరియు డెమోక్రటిక్ సెనేటర్లతో కలిసి చర్చలు జరిపారు. అయితే, ఆ సమయంలోనే రిపబ్లికన్ సెనేటర్ లిండ్సే గ్రాహమ్ జెలెన్‌స్కీకి అనేక సూచనలు చేశారు.

లిండ్సే గ్రాహమ్ మాట్లాడుతూ, ‘‘అనవసరంగా ట్రంప్‌తో వాగ్వాదానికి దిగొద్దు. ఆయన సంబంధాల పునరుద్ధరణ కోసం ప్రయత్నాలు చేస్తున్నారు’’ అని చెప్పారు. ఈ విషయాన్ని ఒక ఇంటర్వ్యూలో సెనేటర్ వెల్లడించారు. అయితే, అన్ని సూచనలు చేసినప్పటికీ, ఆ తర్వాత పరిస్థితులు గందరగోళంగా మారాయని ఆయన తెలిపారు. ఓవల్ ఆఫీస్‌లో జెలెన్‌స్కీ ప్రవర్తన అమర్యాదగా కన్పించిందని లిండ్సే పేర్కొన్నారు. జెలెన్‌స్కీ తీరు చూసి అమెరికన్లు ఆయనతో మరోసారి సంప్రదింపులు జరిపేందుకు ఇష్టపడరని చెప్పుకొచ్చారు.

జెలెన్‌స్కీ రాజీనామా చేయాలా? అన్న ప్రశ్నకు లిండ్సే బదులిచ్చారు. ఆయన రాజీనామా చేసి సామరస్య చర్చలు జరిపే వ్యక్తిని పంపాలన్నారు. లేదంటే.. జెలెన్‌స్కీ తీరులో మార్పు వస్తేనే చర్చలు ముందుకు సాగుతున్నాయని ఆయన తెలిపారు.

మరోవైపు, జెలెన్‌స్కీకి ఐరోపా నేతలు మద్దతు తెలిపారు. ఫ్రాన్స్ అధ్యక్షుడు ఇమ్మాన్యుయేల్ మెక్రాన్, కెనడా ప్రధాని జస్టిన్ ట్రూడో సహా అనేక మంది నేతలు అమెరికా తీరును ఖండించారు. ఉక్రెయిన్ ఒంటరి కాదని భరోసా ఇచ్చారు.

ఈ సంఘటనలు అమెరికా-ఉక్రెయిన్ సంబంధాలను క్లిష్టతరం చేశాయి మరియు ప్రపంచ వ్యాప్తంగా చర్చలకు దారితీసాయి.