RBI MPC Meeting: ఆర్బీఐ వడ్డీ రేట్లు యథాతథం.. ఎంపీసీ మీటింగ్ లో కీలక అంశాలివే

RBI MPC Meeting: ఆర్బీఐ కీలక వడ్డీ రేట్లను యథాతథంగా కొనసాగించింది. శుక్రవారం ముంబైలో ఆర్బీఐ ద్రవ్య పరపతి విధాన సమీక్ష సమావేశం(MPC) జరిగింది. ఈ సమావేశం నిర్ణయాలను ఆర్బీఐ గవర్నర్ సంజయ్ మల్హోత్రా వెల్లడించారు. తాజా సమావేశంలో రెపో రేటులో ఎలాంటి మార్పు చేయలేదు. రెపోరేటును 5.25 శాతం వద్దే కొనసాగించింది. 2026-27 బడ్జెట్‌ తర్వాత ఆర్‌బీఐ తొలి ద్వైమాసిక సమీక్ష నిర్వహించింది.

గతేడాది ఆర్బీఐ పలుమార్లు వడ్డీ రేట్లను సవరించింది. 2025 ఫిబ్రవరి, ఏప్రిల్‌లో కీలక వడ్డీ రేట్లను 25 బేసిస్‌ పాయింట్లను తగ్గించింది. జూన్‌ సమీక్షలో ఏకంగా 50 బేసిస్‌ పాయింట్లు తగ్గించింది. ఆ తర్వాత డిసెంబర్ లో మరో పావు శాతం కోత విధించింది. గతేడాది మొత్తంగా రెపో రేటు 1.25 శాతం వరకు తగ్గింది.

ఆర్బీఐ ఎంపీసీ కీలక నిర్ణయాలు

ఆర్బీఐ ద్రవ్య విధాన కమిటీలో ఆరుగురు సభ్యుల రేటు నిర్ణయ ప్యానెల్ రెపో రేట్లను 5.25% వద్ద మార్చకుండా తటస్థంగా వద్ద కొనసాగించాలని నిర్ణయించింది. ఆర్బీఐ 2025-26 జీడీపీ వృద్ధి రేటు అంచనాను 7.3 శాతం నుంచి 7.4 శాతానికి పెంచింది. 2026-27లో ఆర్థిక కార్యకలాపాలు బాగానే ఉంటాయని అంచనా వేసింది. 2026-27 తొలి క్వార్టర్ జీడీపీ వృద్ధి రేటు అంచనాను 6.7% నుండి 6.9%కి, Q2 జీడీపీ వృద్ధిరేటు అంచనాను 6.8% నుంచి 7%కి పెంచింది.

2025 Q4 ధరలలో భారీ తగ్గుదలతో ప్రతికూల బేస్ ప్రభావాలు ఈ ఏడాది ద్రవ్యోల్బణం పెరుగుదలకు దారితీస్తాయని ఆర్బీఐ తెలిపింది. సీపీఐ ద్రవ్యోల్బణ అంచనాను గతంలో 2.0% నుండి 2.1%కి పెంచింది. ఇది Q4 2026 ద్రవ్యోల్బణ అంచనాలను 2.9% నుండి 3.2%కి, Q1 2027 ను 3.9% నుండి 4.0%కి. Q2 2027 ద్రవ్యోల్బణ అంచనాలను గతంలో 4.0% నుండి 4.2%కి పెంచింది.