ఆన్‌లైన్‌లో ఆదాయపు రిటర్న్ ఎలా దాఖలు చేయాలి? ఈ సింపుల్ స్టెప్స్‌తో ఫైల్ చేసేయండి

Online ITR Filing Steps| ఆదాయపు పన్ను రిటర్న్ (ఐటీఆర్) దాఖలు చేయడానికి గడువు జూలై 31. అంటే ఎక్కువ సమయం లేదు. ఇంకా రిటర్న్ దాఖలు చేయని వారు ఆలస్యం చేయకుండా వెంటనే ప్రక్రియను పూర్తి చేయడం మంచిది. ప్రస్తుతం ఆదాయపు పన్ను శాఖ.. ఈ – ఫైలింగ్ పోర్టల్ ద్వారా ఐటీఆర్‌ను సులభంగా ఆన్‌లైన్‌లో దాఖలు చేసే అవకాశం కల్పించింది. అవసరమైన పత్రాలు ముందుగానే సిద్ధంగా ఉంటే ఈ ప్రక్రియను వేగంగా పూర్తి చేయవచ్చు.

ముందుగా అవసరమైన పత్రాలను సిద్ధం చేసుకోండి

ఐటీఆర్ దాఖలు చేయడానికి ముందు పాన్ కార్డు, ఆధార్ కార్డు, ఫామ్ 16, ఫామ్ 26ఏఎస్, ఏఐఎస్, టీఐఎస్, బ్యాంక్ స్టేట్‌మెంట్లు, వడ్డీ ధ్రువీకరణ పత్రాలు సిద్ధంగా ఉంచాలి. పాత పన్ను విధానాన్ని ఎంచుకునే వారు పెట్టుబడి రుజువులను కూడా దగ్గర పెట్టుకోవాలి. అలాగే డివిడెండ్, అద్దె ఇల్లు ద్వారా వచ్చే ఆదాయం లేదా మూలధన లాభాల వివరాలు ఉంటే వాటిని కూడా సిద్ధం చేసుకోవాలి. ముఖ్యంగా పాన్‌ కార్డ్, ఆధార్‌తో అనుసంధానం చేసి ఉండాలి.

ముందుగా ఈ ఫైలింగ్ పోర్టల్‌లో లాగిన్ అవ్వాలి

ఆదాయపు పన్ను శాఖ అధికారిక ఈ-ఫైలింగ్ పోర్టల్‌ను తెరిచి, పాన్ నంబర్, పాస్‌వర్డ్‌తో లాగిన్ కావాలి. అవసరమైతే భద్రతా ధ్రువీకరణ ప్రక్రియను పూర్తి చేయాలి.

కొత్త ఐటీఆర్ దాఖలు ప్రక్రియను ప్రారంభించాలి

లాగిన్ అయిన తర్వాత “File Income Tax Return” అనే ఆప్షన్ ఎంచుకోవాలి. అనంతరం అసెస్‌మెంట్ ఇయర్ 2026-27ను ఎంపిక చేసి, ఆన్‌లైన్ ఫైలింగ్ విధానాన్ని కొనసాగించాలి.

సరైన ఐటీఆర్ ఫామ్‌ను ఎంచుకోవాలి

మీ ఆదాయ వనరులకు అనుగుణంగా సరైన ఐటీఆర్ ఫామ్‌ను ఎంపిక చేయాలి. సాధారణంగా జీతం పొందే ఉద్యోగులు ఐటీఆర్ 1 ఉపయోగిస్తారు. అయితే ఇతర ఆదాయ వనరులు ఉన్నవారు తమకు వర్తించే ఫామ్‌ను జాగ్రత్తగా ఎంపిక చేయాలి.

వ్యక్తిగత వివరాలను సరిచూసుకోండి

పేరు, చిరునామా, బ్యాంక్ ఖాతా వివరాలను పూర్తిగా పరిశీలించాలి. అలాగే పాత పన్ను విధానం లేదా కొత్త పన్ను విధానంలో మీకు ఏది ప్రయోజనకరమో నిర్ణయించి దాన్ని ఎంచుకోవాలి.

ముందుగా నమోదు చేసిన వివరాలను పరిశీలించాలి

ఈ – ఫైలింగ్ పోర్టల్‌లో ఫామ్ 16, ఏఐఎస్, ఫామ్ 26ఏఎస్ ఆధారంగా కొన్ని వివరాలు ఆటోమేటిక్‌గా కనిపిస్తాయి. అయినప్పటికీ వాటిని మీ పత్రాలతో పోల్చి సరిచూసుకోవాలి. ఏదైనా ఆదాయం నమోదు కాకపోతే తప్పకుండా చేర్చాలి.

అర్హత ఉన్న పన్ను మినహాయింపులను క్లెయిమ్ చేసుకోండి

పాత పన్ను విధానాన్ని ఎంచుకున్న వారు సెక్షన్ 80సీ పెట్టుబడులు, ఆరోగ్య బీమా, హెచ్‌ఆర్‌ఏ, గృహ రుణ ప్రయోజనాలు వంటి మినహాయింపులను క్లెయిమ్ చేయాలి. ఇందుకు సంబంధించిన పత్రాలను భద్రంగా ఉంచుకోవాలి.

పన్ను చెల్లింపులను పరిశీలించాలి

టీడీఎస్, అడ్వాన్స్ ట్యాక్స్, సెల్ఫ్ అసెస్‌మెంట్ ట్యాక్స్ వివరాలను పరిశీలించాలి. మీ రికార్డులతో పోల్చి ఏవైనా తేడాలు ఉంటే ముందుగానే సరిచేయాలి.

రిటర్న్‌ సమర్పించే ముందు మరోసారి చెక్ చేసుకోండి

సమర్పించే ముందు ప్రతి వివరాన్ని జాగ్రత్తగా చదవాలి. ఆదాయం, మినహాయింపులు, బ్యాంక్ వివరాలు, పన్ను లెక్కలు సరిగ్గా ఉన్నాయో లేదో నిర్ధారించుకోవాలి. చిన్న తప్పులు కూడా మీకు రీఫండ్ ఆలస్యం కావడానికి లేదా పన్ను శాఖ నుంచి నోటీసులు రావడానికి కారణం కావచ్చు.

Also Read: ఆర్మీ లా ఆఫీసర్ జాబ్స్.. ఏడాదికి రూ.17 లక్షలకు పైగా సాలరీ

మిగిలిన పన్ను చెల్లించి ఈ వెరిఫికేషన్ పూర్తి చేయాలి

చెల్లించాల్సిన పన్ను మిగిలి ఉంటే ముందుగా చెల్లించాలి. ఆ తర్వాత ఆధార్ ఓటీపీ, నెట్ బ్యాంకింగ్ లేదా ఇతర అనుమతించిన విధానాల ద్వారా ఈ – వెరిఫికేషన్ పూర్తి చేయాలి. ఈ – వెరిఫికేషన్ పూర్తయిన తర్వాతే ఐటీఆర్ దాఖలు అయినట్లు పరిగణిస్తారు.

ఐటీఆర్ దాఖలు చేసే సమయంలో తొందరపడకుండా ప్రతి వివరాన్ని జాగ్రత్తగా పరిశీలించడం చాలా ముఖ్యం. ముందుగానే అవసరమైన పత్రాలను సిద్ధం చేసుకుని, సరైన వివరాలతో రిటర్న్ దాఖలు చేస్తే రీఫండ్ త్వరగా వచ్చే అవకాశం ఉంటుంది. అలాగే పన్ను శాఖ నుంచి అనవసరమైన నోటీసులు వచ్చే అవకాశాలు కూడా తగ్గుతాయి.

Also Read: నెలకు రూ.10 లక్షల వరకు జీతం.. ప్రపంచమంతా తిరిగిరావొచ్చు.. ఇంటర్మీడియట్ ఉంటే చాలు