నెలకు రూ.15,000 జీతం వచ్చే వారు కూడా లక్షాధికారి ఎలా అవ్వచ్చు? 50-30-20 రూల్ అంటే ఏంటి?

Become Lakhpati: నెలకు పదిహేను వేల రూపాయల జీతంతో ఈ రోజుల్లో ఇల్లు గడవడమే కష్టం, ఇక లక్షాధికారి అవ్వడం ఎలా సాధ్యం? అని చాలా మంది అనుకుంటారు. కానీ, ఆర్థిక విజయం అనేది మీరు ఎంత సంపాదిస్తున్నారనే దానికంటే, సంపాదించిన దాంట్లో ఎంత పొదుపు చేస్తున్నారు, దాన్ని ఎలా పెట్టుబడి పెడుతున్నారు అనే దానిపైనే ఆధారపడి ఉంటుంది. సరైన ఆర్థిక క్రమశిక్షణ, డబ్బును మేనేజ్ చేసే ఒక అద్భుతమైన ఫార్ములా తెలిస్తే, చిన్న జీతంతో కూడా కొద్ది కాలంలోనే లక్షల రూపాయల సంపదను సృష్టించవచ్చు. ఆ సీక్రెట్ ఫార్ములానే “50-30-20 రూల్”.

అసలు ఏంటి ఈ 50-30-20 రూల్?
ప్రపంచవ్యాప్తంగా ఎంతో మంది ఆర్థిక నిపుణులు సిఫార్సు చేసే ఒక సింపుల్ అండ్ పవర్ఫుల్ బడ్జెటింగ్ సూత్రమే ఈ 50-30-20 రూల్. అమెరికాకు చెందిన ప్రముఖ ఫైనాన్షియల్ ఎక్స్‌పర్ట్ ఎలిజబెత్ వారెన్ ఈ విధానాన్ని ప్రాచుర్యంలోకి తెచ్చారు. ఈ రూల్ ప్రకారం, మీ నెలకు వచ్చే నికర ఆదాయాన్ని మూడు భాగాలుగా విభజించుకోవాలి. మీ ఆదాయంలో 50% అవసరాలకు, 30% కోరికలకు, 20% పొదుపు లేదా పెట్టుబడులకు కేటాయించాల్సి ఉంటుంది. ఈ చిన్న సూత్రాన్ని పాటిస్తే మీ జేబుకు చిల్లు పడకుండానే భవిష్యత్తుకు బంగారు బాట వేసుకోవచ్చు.

50% అవసరాలు.. ఇల్లాలు గుల్ల కాకుండా చూసుకునే భాగం
మీ రూ.15,000 జీతంలో సగం భాగం, అంటే రూ.7,500 ను మీ తప్పనిసరి అవసరాల కోసం కేటాయించాలి. ఇవి లేకపోతే మీ రోజువారీ జీవితం గడవదు. ఉదాహరణకు:
• రూమ్ రెంట్
• కరెంట్ బిల్లు, వాటర్ బిల్లు
• కిరాణా సామాగ్రి, నిత్యావసరాలు
• పిల్లల స్కూల్ ఫీజులు లేదా లోన్ ఈఎంఐలు

మీరు ఎంత కష్టపడైనా సరే, ఈ అత్యవసర ఖర్చులను మీ జీతంలో 50% లోపు ఉండేలా ప్లాన్ చేసుకోవాలి. ఒకవేళ ఇవి దాటిపోతుంటే, మీరు అనవసరపు ఖరీదైన ఇంట్లో ఉంటున్నారని లేదా లైఫ్ స్టైల్‌ను మార్చుకోవాలని అర్థం.

30% కోరికలు.. జీవితాన్ని ఆస్వాదించే భాగం
పొదుపు చేయమన్నాం కదా అని జీవితంలో ఎలాంటి ఆనందాలు లేకుండా మిషన్ లా బతకాల్సిన అవసరం లేదు. అందుకే ఈ రూల్‌లో మీ మనసుకు నచ్చిన పనులు చేయడానికి 30% నిధులు, అంటే రూ.4,500 కేటాయించారు. దీని ద్వారా మీరు:

• వీకెండ్స్‌లో నచ్చిన హోటల్‌కు వెళ్లి తినడం
• కొత్త బట్టలు లేదా గ్యాడ్జెట్స్ కొనుక్కోవడం
• ఓటీటీ (OTT) సబ్‌స్క్రిప్షన్లు, సినిమా టికెట్లు
• స్నేహితులతో కలిసి చిన్న చిన్న ట్రిప్స్ వేయడం

ఇలాంటి సరదాల కోసం ఈ డబ్బును వాడుకోవచ్చు. అయితే, ఇక్కడ గుర్తుంచుకోవాల్సిన ముఖ్యమైన విషయం ఏంటంటే, ఈ ఖర్చు 30% దాటకూడదు. ఇది మీ నియంత్రణలో ఉంటేనే మీ ఫైనాన్షియల్ ప్లాన్ సక్సెస్ అవుతుంది.

20% పొదుపు.. మిమ్మల్ని లక్షాధికారిని చేసే మంత్రం
ఇక అసలైన మ్యాజిక్ ఇక్కడే ఉంది. మీ జీతంలో మిగిలిన 20% భాగం, అంటే రూ.3,000 ను ప్రతి నెలా కచ్చితంగా పొదుపు లేదా పెట్టుబడి చేయాలి. జీతం అకౌంట్‌లో పడగానే మొదట ఈ రూ.3,000 పక్కన పెట్టేయాలి. ఈ మొత్తాన్ని కేవలం ఇంట్లో దాచి పెట్టడం వల్ల ఎలాంటి లాభం ఉండదు. దీనిని సరైన చోట పెట్టుబడి పెట్టాలి:

• మ్యూచువల్ ఫండ్స్ (SIP): నెలకు రూ.3,000 చొప్పున ఈక్విటీ మ్యూచువల్ ఫండ్స్‌లో పెట్టవచ్చు.
• పబ్లిక్ ప్రావిడెంట్ ఫండ్ (PPF): సురక్షితమైన లాంగ్ టర్మ్ ఇన్వెస్ట్‌మెంట్.
• రికరింగ్ డిపాజిట్ (RD): బ్యాంకుల్లో ప్రతి నెలా పొదుపు చేసుకునే మార్గం.

కంపౌండింగ్ శక్తం వల్ల, మీరు ప్రతి నెలా ఇన్వెస్ట్ చేసే ఈ రూ.3,000 కాలక్రమేణా భారీ మొత్తంగా మారుతుంది. సగటున 12% నుండి 15% వార్షిక రిటర్న్స్ ఇచ్చే మ్యూచువల్ ఫండ్స్‌లో పెట్టుబడి పెడితే, కొన్ని సంవత్సరాలలోనే మీ అకౌంట్ బ్యాలెన్స్ లక్షల్లోకి చేరుకుంటుంది.

చిన్న అడుగు.. పెద్ద విజయం!
లక్షాధికారి అవ్వడం అనేది ఒక రాత్రిలో జరిగే అద్భుతం కాదు, అదొక నిరంతర ప్రక్రియ. రూ.15,000 జీతం ఉన్నప్పుడు నెలకు రూ.3,000 తో ప్రారంభించిన మీ పెట్టుబడి ప్రయాణం, రేపు మీ జీతం పెరిగే కొద్దీ పెట్టుబడి మొత్తాన్ని కూడా పెంచుకుంటూ వెళ్లేలా చేస్తుంది. కార్తీక మాసంలో దీపం పెట్టినట్టు క్రమం తప్పకుండా, ఓపికతో పెట్టుబడులు కొనసాగిస్తే.. అనుకున్న సమయం కంటే ముందే మీరు లక్షల రూపాయల అధిపతిగా మారడం ఖాయం. ఆలోచించడం మానేసి, ఈ నెల నుండే మీ 50-30-20 బడ్జెట్ ప్లాన్‌ను అమలు చేయండి, మీ ఆర్థిక స్వాతంత్ర్యాన్ని అందుకోండి.

Also Read: బీరుకు రూ.10 కూలింగ్ ఛార్జ్.. సీఎం విజయ్‌కు యువకుడి ఫిర్యాదు! వీడియో వైరల్