రూ.74 వేలకే స్టైలిష్ EV స్కూటర్.. అదీ మెటల్ బాడీతో!

Komaki’s New Electric Scooters: భారత్ లో ఎలక్ట్రిక్ స్కూటర్లకు డిమాండ్ రోజురోజుకూ పెరుగుతోంది. ఈ నేపథ్యంలో వినియోగదారులను ఆకట్టుకునేందుకు కోమాకి రెండు కొత్త ఎలక్ట్రిక్ స్కూటర్లను మార్కెట్లోకి తీసుకొచ్చింది. MG Pro V, MG Pro+ పేర్లతో వినియోగదారులకు పరిచయం చేసింది. ఈ మోడళ్ల ధరలు రూ.73,999, రూ.79,999 (ఎక్స్ షోరూమ్)గా నిర్ణయించింది.

రూ. 80 వేల లోపు మెటల్ బాడీతో..

ముఖ్యంగా రూ.80 వేలలోపే మెటల్ బాడీతో అందుబాటులోకి రావడం ఈ స్కూటర్ల ప్రత్యేకతగా చెప్పుకోవచ్చు. సాధారణంగా ఈ ధరలో వచ్చే చాలా ఎలక్ట్రిక్ స్కూటర్లు ఫైబర్ బాడీతో ఉంటాయి. కానీ, కోమాకి బలమైన మెటల్ బాడీని అందించింది. రోజువారీ వినియోగంలో స్కూటర్ మరింత బలంగా ఉండటంతో పాటు ఎక్కువకాలం మన్నికగా ఉండే అవకాశం ఉంటుంది. గుంతల రోడ్ల మీద కూడా ఈ స్కూటర్లు ఎలాంటి ఇబ్బంది లేకుండా నడుస్తాయని కంపెనీ వెల్లడించింది.

సింగిల్ ఛార్జ్ తో 150 కి.మీ రేంజ్

రేంజ్ విషయంలో కూడా ఈ రెండు స్కూటర్లు వినియోగదారులను ఆకట్టుకుంటున్నాయి. MG Pro V సింగిల్ ఛార్జ్ తో 90 నుంచి 100 కిలోమీటర్ల వరకు ప్రయాణించే అవకాశం ఉంటుంది. ఇక MG Pro+ 150 కిలోమీటర్లకు పైగా రేంజ్ అందిస్తుందని కంపెనీ వెల్లడించింది. రోజూ ఆఫీస్‌ కు వెళ్లేవాళ్లు, సిటీలో ఎక్కువ దూరం ప్రయాణించే వారికి ఇది బెస్ట్ ఆప్షన్ గా చెప్పుకోవచ్చు. ఈ రెండు స్కూటర్లలో కూడా BLDC హబ్ మోటార్ తో పాటు LiFePO4 బ్యాటరీను ఉపయోగించారు. ఈ బ్యాటరీ సాధారణ లిథియం అయాన్ బ్యాటరీలతో పోలిస్తే ఎక్కువ కాలం పనిచేయడం, భద్రత పరంగా మెరుగ్గా ఉండటం ప్రత్యేకతగా చెప్పుకోవచ్చు. మెయింటెనెన్స్ ఖర్చు కూడా తక్కువగా ఉంటుందని కంపెనీ వెల్లడించింది.

ఫీచర్ల గురించి..

ఫీచర్ల విషయంలోనూ కొమాకి ఏమాత్రం తగ్గలేదు. మొబైల్ యాప్ కనెక్టివిటీ ద్వారా బ్యాటరీ స్టేటస్, రేంజ్ లాంటి వివరాలు తెలుసుకోవచ్చు. ఫ్రంట్ డిస్క్ బ్రేక్, టెలిస్కోపిక్ సస్పెన్షన్, యాంటీ థెఫ్ట్ లాక్, పార్కింగ్ అసిస్ట్, రిపేర్ మోడ్ లాంటి ఫీచర్లు కూడా ఇందులో ఉన్నాయి. MG Pro+ వేరియంట్‌ లో పెద్ద స్టోరేజ్ స్పేస్ ఉంటుంది. సరసమైన ధరలో కూడా నాణ్యత విషయంలో ఎలాంటి రాజీ పడకుండా ఈ స్కూటర్లను రూపొందించినట్లు కంపెనీ తెలిపింది. ఖరీదైన ఎలక్ట్రిక్ స్కూటర్లలో కనిపించే ఫీచర్లను తక్కువ ధరలోనే అందించాలన్న లక్ష్యంతో ఈ కొత్త మోడళ్లను తీసుకొచ్చినట్లు వివరించింది. రోజువారీ ప్రయాణాలకు బలమైన ఎలక్ట్రిక్ స్కూటర్ కోసం చూస్తున్న వారికి కోమాకి MG Pro V, MG Pro+ మోడళ్లు మంచి ఆప్షన్ గా చెప్పుకోవచ్చు.