వేసవిలో కారు, బైక్ టైర్లు పగలకుండా ఉండాలంటే.. ఈ 6 జాగ్రత్తలు తప్పనిసరి!

Summer Driving Tips: వేసవిలో ఎండలు జనాలను ఎతంగా ఇబ్బంది పెడతాయో, వాహనాల టైర్లపై కూడా అంతే ప్రభావం చూపిస్తాయి. రోడ్లు బాగా వేడెక్కడం, ఎక్కువసేపు డ్రైవింగ్ చేయడం వల్ల టైర్లలో గాలి ఒత్తిడి పెరిగి, ఒక్కసారిగా పేలిపోయే ప్రమాదం ఉంటుంది. ముఖ్యంగా హైవేలపై ఎక్కువ వేగంతో వెళ్లేటప్పుడు ఊహించని ప్రమాదాలకు కారణం అవుతుంది. అయితే, కొన్ని సులభమైన జాగ్రత్తలు పాటిస్తే టైర్ల జీవితకాలం పెరగడమే కాకుండా ప్రమాదాలను కూడా తగ్గించవచ్చు.

⦿ టైర్ ప్రెజర్‌ను ఉదయాన్నే చెక్ చేయండి!

టైర్లలో గాలి ఎంత ఉందో చూసుకోవడం చాలా ముఖ్యం. టైర్లు చల్లగా ఉన్నప్పుడు సరిగ్గా తెలుస్తుంది. అందుకే ఉదయం వాహనం ఎక్కువగా నడపకముందే టైర్ ప్రెజర్‌ను చెక్ చేయాలి. కారు తయారీ కంపెనీ సూచించిన PSI మేరకే గాలి నింపాలి. ఎక్కువ, తక్కువ గాలి రెండూ కూడా టైర్లకు ప్రమాదకరమే.

⦿ నైట్రోజన్ ఉపయోగించడం మంచిది!

ఇటీవల చాలామంది నైట్రోజన్ గాలి వాడుతున్నారు. సాధారణ గాలితో పోలిస్తే నైట్రోజన్ వేడిలో త్వరగా విస్తరించదు. టైర్లలో ఒత్తిడి స్థిరంగా ఉంటుంది. సుదూర ప్రయాణాల్లో కూడా టైర్లు ఎక్కువగా వేడెక్కకుండా సహాయపడుతుంది. గాలి త్వరగా తగ్గిపోకుండా ఉంటుంది.

⦿ ఎక్కువ బరువు వేయొద్దు!

వేసవిలో టైర్ల రబ్బరు కొంచెం మృదువుగా మారుతుంది. అలాంటి సమయంలో కారులో ఎక్కువ మంది కూర్చోవడం, ఎక్కువ లగేజ్ పెట్టడం వల్ల టైర్లపై అదనపు ఒత్తిడి పడుతుంది. దీంతో సైడ్‌ వాల్ దెబ్బతినే ప్రమాదం ఉంటుంది. అవసరానికి మించిన బరువు వేయడాన్ని తగ్గిస్తే టైర్లు సురక్షితంగా ఉంటాయి.

⦿ నీడలో పార్క్ చేయండి!

నేరుగా ఎండ పడటం వల్ల టైర్ల మీద ఎక్కు ప్రభావం పడుతుంది. ఎక్కువసేపు ఎండలో ఉండటం వల్ల టైర్ల రబ్బరు పొడిబారి చిన్న పగుళ్లు రావచ్చు. అందుకే వీలైనప్పుడల్లా చెట్టు కింద, షెడ్‌ లో లేదంటే బేస్‌ మెంట్‌ లో కారును పార్క్ చేయాలి. ఇలా చేస్తే, టైర్లు ఎక్కువకాలం బాగుంటాయి.

⦿ లాంగ్ డ్రైవ్‌ మధ్యలో బ్రేక్ తీసుకోండి!

ఎక్కువసేపు డ్రైవింగ్ చేస్తే టైర్లు బాగా వేడెక్కుతాయి. ముఖ్యంగా వేసవిలో మరింత ప్రమాదకరం. అందుకే ప్రతి రెండు గంటలకు ఒకసారి 10 నుంచి 15 నిమిషాలు ఆగడం మంచిది. నీడలో వాహనం నిలిపితే టైర్లు చల్లబడేందుకు అవకాశం ఉంటుంది.

⦿ ట్రెడ్‌, వాల్వ్ క్యాప్‌ లను చెక్ చేయండి!

టైర్లపై ఉన్న గ్రిప్ తగ్గిపోతే అవి త్వరగా వేడెక్కుతాయి. అరిగిపోయిన టైర్లు ప్రమాదకరంగా మారే అవకాశం ఉంది. సో, టైర్ల ట్రెడ్ బాగుందో లేదో తరచూ పరిశీలించాలి. అలాగే వాల్వ్ క్యాప్‌ లు సరిగా ఉన్నాయో? లేదో? చూసుకోవాలి. చిన్న గాలి లీక్ కూడా పెద్ద సమస్యకు దారితీయవచ్చు. సమ్మర్ లో టైర్లపై కాస్త శ్రద్ధ పెట్టడం వల్ల పెద్ద ప్రమాదాలను నివారించే అవకాశం ఉంటుంది. చిన్న చిన్న జాగ్రత్తలు పాటిస్తే ప్రయాణం సురక్షితంగా ఉంటుంది.