Dubai Invite Program 2026: మీరు దుబాయ్ వెళ్తే రూ.80 వేలు వరకు రివార్డు పొందొచ్చు. ట్విస్ట్ ఏమిటంటే ఆ రివార్డు మీకు కాదు.. మిమ్మల్ని అక్కడ ఆహ్వానించిన కుటుంబ సభ్యులకు లేదా మీ స్నేహితులకి లభిస్తుంది.
దుబాయ్ ప్రభుత్వం అక్కడ నివసిస్తున్న విదేశీ కుటుంబాల కోసం కొత్త పర్యాటక కార్యక్రమాన్ని ప్రారంభించింది. ‘దుబాయ్ ఇన్వైట్’ (Dubai Invite) పేరుతో తీసుకొచ్చిన ఈ ప్రత్యేక కార్యక్రమం ద్వారా తమ కుటుంబ సభ్యులు, స్నేహితులను దుబాయ్ కి ఆహ్వానించే అర్హులైన నివాసితులకు అద్భుతమైన బహుమతులు అందించనున్నట్లు ప్రకటించింది. ఈ కార్యక్రమం 2026 జూలై 20 నుంచి అక్టోబర్ 31 వరకు అమల్లో ఉంటుంది. ఈ సమయంలో దుబాయ్లో నివసిస్తున్న వారు తమ బంధువులు, స్నేహితులను నగరాన్ని సందర్శించేందుకు ఆహ్వానిస్తే, నిబంధనలకు అనుగుణంగా బహుమతులు పొందే అవకాశం కల్పిస్తుంది.
దుబాయ్ లో ఉన్నవారికి ఆహ్వానం మేరకు వచ్చిన అతిథులు దుబాయ్ను సందర్శించిన తర్వాత, ఆహ్వానించిన వ్యక్తికి AED 3,000(సుమారు రూ. 78,590) కంటే ఎక్కువ విలువైన రివార్డులు అందించనున్నట్లు అధికారులు ప్రకటించారు. ఈ బహుమతుల్లో విలాసవంతమైన హోటళ్లలో బస చేసే అవకాశం, ప్రముఖ రెస్టారెంట్లలో ప్రత్యేక భోజనం, ప్రముఖ పర్యాటక ప్రాంతాలకు ఉచితంగా, రాయితీ టికెట్లు, షాపింగ్ ఆఫర్లు, లైఫ్స్టైల్ వోచర్లు లాంటి బోలెడు ప్రయోజనాలు ఉంటాయి.
ఈ కార్యక్రమం ప్రధాన ఉద్దేశ్యం దుబాయ్ పర్యాటక రంగాన్ని మరింత ప్రోత్సహించడం. అదే సమయంలో అక్కడ నివసిస్తున్న వారికి తమ కుటుంబ సభ్యులు, స్నేహితులను దుబాయ్కు తీసుకురావడానికి అదనపు ప్రోత్సాహాన్ని కల్పించడం కూడా దీని లక్ష్యం. ఇలా చేయడం ద్వారా మరింత మంది పర్యాటకులు దుబాయ్ను సందర్శించే అవకాశం ఉందని అధికారులు భావిస్తున్నారు.
దుబాయ్ ప్రపంచంలోనే అత్యంత ప్రజాదరణ పొందిన పర్యాటక నగరాల్లో ఒకటిగా కొనసాగుతోంది. బుర్జ్ ఖలీఫా, పామ్ జుమైరా, దుబాయ్ మాల్, డెజర్ట్ సఫారీ, అద్భుతమైన బీచ్లు లాంటి ఎన్నో అద్భుతమైన ఆకర్షణలు ఉన్నాయి. ప్రతి ఏడాది లక్షలాది మంది పర్యాటకులను ఆకట్టుకుంటాయి. ఇప్పుడు ‘దుబాయ్ ఇన్వైట్’ కార్యక్రమం ద్వారా అక్కడి నివాసితులు తమ బంధువులను ఆహ్వానించి, నగర విశిష్టతను చూపించే అవకాశంతో పాటు విలువైన బహుమతులు కూడా పొందనున్నారు.
ఈ కార్యక్రమంలో పాల్గొనాలంటే సంబంధిత అర్హత నిబంధనలు, నమోదు ప్రక్రియను తప్పనిసరిగా పూర్తి చేయాలి. అన్ని నిబంధనలను పాటించిన వారికి మాత్రమే ఈ రివార్డులు వర్తిస్తాయి. మొత్తానికి, దుబాయ్లో నివసిస్తున్న వారికి ఇది మంచి అవకాశంగా చెప్పుకోవచ్చు. ఒకవైపు తమ కుటుంబ సభ్యులతో కలిసి సమయం గడిపే అవకాశం లభిస్తే, మరోవైపు వేల దిర్హామ్ల విలువైన బహుమతులు కూడా పొందే అవకాశం ఉంది. ఈ కొత్త కార్యక్రమం దుబాయ్లోని ప్రవాసులు, స్థానికుల్లో మంచి ఆసక్తిని కలిగిస్తోంది.
Read Also: భారత్ లో ఎడమ వైపు, అమెరికాలో కుడివైపు.. వాహనాలు నడిపే విధానంలో ఎందుకీ తేడా?
Share
నేషనల్ అవార్డు విమర్శలపై ధనుష్ సంచలన వ్యాఖ్యలు!
విదేశీ పర్యటన సమయంలో పాస్పోర్ట్ పోగొట్టుకున్నారా? వెంటనే ఈ పనులు చేయాలి
