చరిత్ర సృష్టించిన బెంగళూరు -విజయవాడ కారిడార్.. వరల్డ్‌లోనే ఫస్ట్ టైం 4 గిన్నిస్ రికార్డులు

భారతదేశ రహదారి మౌలిక సదుపాయాల కల్పనలో సరికొత్త అధ్యాయం మొదలైంది. ఐటీ రాజధాని బెంగళూరు, వాణిజ్య నగరం విజయవాడ మధ్య ప్రయాణ కష్టాలను తీరుస్తూ నిర్మిస్తున్న NH-544G ఎకనామిక్ కారిడార్ ప్రపంచ వేదికపై సత్తా చాటింది. ప్రస్తుతం ఈ రెండు నగరాల మధ్య 635 కిలోమీటర్ల దూరాన్ని దాటడానికి దాదాపు 12 గంటల సమయం పడుతోంది. ట్రాఫిక్ ఇబ్బందులు, మలుపులతో కూడిన రోడ్ల వల్ల ప్రయాణికులు తీవ్ర ఇబ్బందులు పడుతున్నారు. ఈ సమస్యకు శాశ్వత పరిష్కారంగా కేంద్ర ప్రభుత్వం భారతమాల ప్రాజెక్టులో భాగంగా 518 కిలోమీటర్ల మేర ఆరు లేన్ల యాక్సెస్ కంట్రోల్డ్ ఎక్స్‌ప్రెస్‌ వే నిర్మాణాన్ని చేపట్టింది.

ఈ ప్రాజెక్టు కేవలం రెండు ప్రధాన నగరాలను అనుసంధానించడమే కాకుండా రాయలసీమ ప్రాంత అభివృద్ధికి వెన్నెముకలా మారనుంది. కడప, కర్నూలు వంటి వెనుకబడిన జిల్లాల గుండా వెళ్లే ఈ రహదారి ద్వారా స్థానిక రైతులు పండించే మిల్లెట్లు, ఉద్యానవన పంటలను గ్లోబల్ మార్కెట్‌కు తరలించడం సులభమవుతుంది. లాజిస్టిక్ పార్కులు, ఫుడ్ ప్రాసెసింగ్ యూనిట్ల ఏర్పాటుకు ఈ కారిడార్ ఊతం ఇస్తుంది. తక్కువ కనెక్టివిటీ ఉన్న ప్రాంతాలను ఐటీ హబ్‌లతో కలపడం ద్వారా ఈ ప్రాంత ఆర్థిక ముఖచిత్రం పూర్తిగా మారిపోనుంది.

జనవరి 2026లో ఈ రహదారి నిర్మాణంలో చరిత్ర సృష్టించాలనే లక్ష్యంతో NHAI, రాజ్‌పథ్ ఇన్‌ఫ్రాకాన్ సంస్థలు నడుం బిగించాయి. పుట్టపర్తి సమీపంలో చేపట్టిన పనుల్లో కేవలం ఒకే వారంలో నాలుగు గిన్నిస్ వరల్డ్ రికార్డులు నమోదయ్యాయి. జనవరి 6వ తేదీన 24 గంటల వ్యవధిలోనే 9.63 కిలోమీటర్ల పొడవైన మూడు లేన్ల బిటుమినస్ కాంక్రీట్ రోడ్డును నిర్మించి తొలి రికార్డు సాధించారు. అదే రోజున 10,655 మెట్రిక్ టన్నుల కాంక్రీట్‌ను ఉపయోగించి రెండో ప్రపంచ రికార్డును సొంతం చేసుకున్నారు. ఈ భారీ నిర్మాణ ప్రక్రియలో 600 మందికి పైగా ఇంజనీర్లు, కార్మికులు నిరంతరం శ్రమించారు.

విజయోత్సాహంతో టీమ్ మరింత వేగంగా ముందుకు సాగింది. జనవరి 11వ తేదీన 156 లేన్ కిలోమీటర్ల (52 కిలోమీటర్ల పొడవు) మేర రహదారిని అత్యంత వేగంగా నిర్మించి పాత రికార్డులను చెరిపివేశారు. దీనితో పాటు 57,500 మెట్రిక్ టన్నుల కాంక్రీట్‌ను నిరంతరాయంగా వాడి నాలుగో రికార్డును ఖాతాలో వేసుకున్నారు. ఐఐటీ బాంబే పర్యవేక్షణలో అత్యున్నత నాణ్యత ప్రమాణాలతో ఈ పనులు జరగడం విశేషం. ఈ అసాధారణ విజయానికి గుర్తింపుగా గిన్నిస్ ప్రతినిధులు అందించిన సర్టిఫికెట్లను కేంద్ర మంత్రి నితిన్ గడ్కరీ, ఏపీ సీఎం చంద్రబాబు నాయుడు వర్చువల్‌గా స్వీకరించారు.

ఈ ఎక్స్‌ప్రెస్ వే అందుబాటులోకి వస్తే ప్రయాణ సమయం 12 గంటల నుండి 8 గంటలకు తగ్గుతుంది. దూరం కూడా వంద కిలోమీటర్ల మేర తగ్గుముఖం పడుతుంది. 17 ఇంటర్‌ఛేంజ్‌లు, 5.3 కిలోమీటర్ల టన్నెల్, అటవీ ప్రాంతాల గుండా సాగే గ్రీన్ ఫీల్డ్ అలైన్‌మెంట్ ఈ ప్రాజెక్టు ప్రత్యేకతలు. రద్దీగా ఉండే పట్టణాల్లోకి వెళ్లే అవసరం లేకుండా సిగ్నల్ ఫ్రీగా ప్రయాణించే అవకాశం కలగనుంది. సరకు రవాణా చేసే డ్రైవర్లకు, వ్యాపారులకు ఈ రహదారి సమయంతో పాటు ఇంధనాన్ని ఆదా చేస్తుంది. దక్షిణాది రాష్ట్రాల ఆర్థిక ప్రగతికి ఈ కారిడార్ ఒక గేమ్ ఛేంజర్‌గా నిలవనుంది.

ALSO READ: తెలంగాణ రైల్వే రంగంలో చారిత్రాత్మక అడుగు.. కేంద్ర ప్రభుత్వం సంచలన నిర్ణయం..!