Air India: ఎయిర్ ఇండియా సంస్థ కీలక నిర్ణయం తీసుకుంది. క్యాబిన్ సిబ్బంది కోసం కొత్తగా ఆరోగ్య ఫిట్నెస్ నిబంధనల విధానాన్ని ప్రవేశపెట్టనుంది. దీని ప్రకారం బాడీ మాస్ ఇండెక్స్ పరిధికి వెలుపల ఉన్నవారు రోస్టర్ నుండి తొలగించవచ్చు, లేకుంటే జీతంలో కోత పెట్టవచ్చు. ఏంటి ఈ కొత్త రూల్స్. ఎప్పుడు అమల్లోకి రానుంది?
ఎయిర్ ఇండియా కీలక నిర్ణయం
ఎయిర్ ఇండియా సంస్థ తన క్యాబిన్ సిబ్బంది ఫిట్నెస్ విషయంలో ఓ అడుగు ముందుకేసింది. నిర్దేశించిన బరువు కంటే ఎక్కువగా ఉంటే సిబ్బందిని విధులకు దూరం పెట్టవచ్చు. లేకుంటే వారి జీతాల్లో కోత విధించాలని భావిస్తోంది. సంస్థ ప్రతిష్టను, సేవల నాణ్యతను అంతర్జాతీయ ప్రమాణాలకు అనుగుణంగా మెరుగుపరిచే చర్యల్లో వీటిని కఠినతరం చేసింది. మే ఒకటి నుంచి అమలు చేయాలని ఆలోచన చేస్తోంది.
కొత్త నిబంధనల ప్రకారం.. సిబ్బంది ఫిట్నెస్కు సంబంధించి బాడీ మాస్ ఇండెక్స్-BMIని క్రమం తప్పకుండా పర్యవేక్షిస్తారు. విమాన ప్రయాణాలకు ముందు, ఆ తర్వాత సహా వివిధ దశలలో BMI తనిఖీలు తప్పనిసరి చేసింది. దీని ఆధారంగా సిబ్బంది BMI ఆధారంగా వారిని నాలుగు వర్గాలుగా అంచనా వేస్తారు.
క్యాబిన్ క్రూ ఫిట్నెస్ ఇష్యూ, తేడా వస్తే జీతంలో కోత
18 నుండి 24.9 మధ్య పరిధిని సాధారణమైన వర్గానికి చెందినవారుగా వర్గీకరిస్తారు. వీరిని ఆమోద యోగ్యమైనదిగా పరిగణిస్తారు. బాడీ మాస్ ఇండెక్స్ 18 కంటే తక్కువ ఉన్నవారిని తక్కువ బరువు ఉన్నవారిగా పేర్కొంటారు. 25 నుండి 29.9 మధ్య ఉన్నవారిని అధిక బరువు వారిగా గుర్తిస్తారు. వైద్య-క్రియాత్మక మదింపుల ద్వారా అనుమతి లభించిన తర్వాత ఈ రెండు వర్గీకరణలు ఆమోదయోగ్యంగా ఉంటాయి.
కేవలం బాహ్య సౌందర్యం కోసమే కాకుండా అత్యవసర పరిస్థితుల్లో సిబ్బంది చురుగ్గా వ్యవహరించేందుకు శారీరక దృఢత్వం చాలా అవసరమని యాజమాన్యం భావన. ఎయిర్ ఇండియా బ్రాండ్ ఇమేజ్ని ప్రపంచ స్థాయిలో మెరుగుపరిచేందుకు చేపడుతున్న సంస్కరణల్లో భాగంగా కఠిన నిబంధనలను అమల్లోకి తేనుంది.
తక్కువ బరువు లేకుంటే అధిక బరువు ఉన్నవారిని క్రియాశీల విమానయాన జాబితాల నుండి తొలగించి ఎయిర్లైన్ శిక్షణా అకాడమీకి పంపుతారు. అక్కడ వైద్య, క్రియాత్మక మదింపుల్లో రెండింటిలోనూ ఉత్తీర్ణత సాధించిన తర్వాత తిరిగి విధుల్లో చేరడానికి అనుమతిస్తారు. ఒకవేళ సిబ్బంది అవసరమైన ప్రమాణాలను అందుకోలేకపోతే వారు అధికారికంగా విమానం నడపడానికి ప్రకటించబడే వరకు జీతం లేని సెలవుపై ఉంచబడతారు.
ALSO READ: రామేశ్వరం ట్రిప్.. మరీ ఇంత తక్కువ ధరలోనా?
బాడీ మాస్ ఇండెక్స్-BMI 30 లేదా అంతకంటే ఎక్కువ ఉన్న సిబ్బందికి నిబంధనలు మరింత కఠినంగా ఉంటాయి. వారిని ఊబకాయం విభాగానికి చెందినవారుగా వర్గీకరిస్తారు. అలాంటి సిబ్బందిని వెంటనే విధుల నుండి తొలగిస్తారు, లేదనుకుంటే జీతం కోల్పోయే అవకాశం ఉంది. ఆరోగ్య ప్రమాదాలను అంచనా వేయడానికి సిబ్బంది ఏడు రోజులలోపు వైద్య పరీక్షలు చేయించుకోవాలి.
నిబంధనలకు కట్టుబడని సిబ్బందికి BMI పరిధికి తిరిగి రావడానికి ఎయిర్లైన్ నెల రోజుల గడువు ప్రవేశపెట్టింది. ఆలోగా ప్రమాణాలను పాటించడంలో విఫలమైతే హెచ్చరిక లేఖ జారీ చేయబడుతుంది. ఇదే సమస్య మరో 30 రోజులు కొనసాగితే క్రమశిక్షణా చర్యల పేరిట హెచ్చరిక జారీ చేయబడుతుంది. విమాన ప్రయాణాలకు ముందు, తర్వాత నిర్వహించే BMI తనిఖీల ద్వారా నిరంతర పర్యవేక్షణ కొనసాగుతుంది.
Share
Vehicles Pooja: వాహనాలకు నిమ్మకాయలు, మిరపకాయలు ఎందుకు కడతారో తెలుసా
Salil Arora-SRH: 5 బంతుల్లో 5 సిక్సర్లు..SRHలో మరో కాటేరమ్మ కొడుకు..ఇంతకీ ఎవరీ సలీల్ అరోరా ?
