Local Body Elections: తెలంగాణలోని ఆ గ్రామాల్లో ఎన్నికలు బంద్!

Local Body Elections: తెలంగాణలో ప్రజాస్వామ్య పండుగలుగా భావించే స్థానిక సంస్థల ఎన్నికలు.. ప్రతి సారి ఉత్సాహంగా జరుగుతుంటాయి. కానీ రాష్ట్రంలోని కొన్ని ప్రత్యేక ప్రాంతాల్లో మాత్రం ఎన్నికలు జరగకపోవడం సర్వసాధారణమైపోయింది. సుప్రీంకోర్టులో పెండింగ్‌లో ఉన్న పలు కేసుల కారణంగా గ్రామస్థాయి ప్రజలు ఎన్నో ఏళ్లుగా ఓటు హక్కు నుంచి దూరమవుతున్నారు. ఈసారి జరగనున్న ఎన్నికల్లో కూడా ఆ గ్రామాల్లో ప్రజలకు తమ నాయకులను ఎన్నుకునే అవకాశం లేకపోవడం తీవ్ర ఆవేదన కలిగిస్తోంది.

ఎన్నికలకు దూరమైన స్థానాలు

తెలంగాణలో మొత్తం 14 MPTC స్థానాలు, 27 సర్పంచ్ పదవులు, 256 వార్డులు ఈసారి కూడా ఎన్నికలకు దూరమయ్యాయి. వీటిలో ఎక్కువ భాగం ములుగు జిల్లాలోని మంగపేట మండలంలో ఉన్నాయి. ఇక్కడ 14 MPTCలు, 25 సర్పంచ్ స్థానాలు, 230 వార్డులు గత 15 ఏళ్లుగా ఎన్నికలు లేకుండా ఖాళీగా ఉన్నాయి.

అదేవిధంగా, కరీంనగర్ జిల్లాలో రెండు స్థానాలు, మంచిర్యాల జిల్లాలోని గూడెం గ్రామం కూడా ఈ ఎన్నికలకు దూరమవ్వాల్సి వచ్చింది. ఇది కేవలం స్థానిక సమస్య కాకుండా.. ప్రజాస్వామ్యానికి తలెత్తిన పెద్ద సమస్యగా భావిస్తున్నారు.

ట్రైబల్ – నాన్ ట్రైబల్ వివాదం

మంగపేట మండలంలో ఎన్నికలు నిలిచిపోవడానికి ప్రధాన కారణం గిరిజన – అగిరిజన (ట్రైబల్ – నాన్ ట్రైబల్) వివాదం. కొన్ని గ్రామాల్లో గిరిజనులకు రిజర్వ్ చేసిన సర్పంచ్, వార్డు స్థానాలను అగిరిజనులు సవాలు చేశారు. ఈ వివాదం న్యాయస్థానాల వరకు చేరి, అప్పటినుంచి సుప్రీంకోర్టులో కేసులు పెండింగ్‌లోనే ఉన్నాయి. కేసులు పరిష్కారం కానంతవరకు అక్కడ ఎన్నికలు జరగడం అసాధ్యం అయ్యింది.

ప్రజల్లో ఆవేదన

ఈ పరిస్థితుల వలన స్థానిక ప్రజలు తమ అభిప్రాయాలను వెల్లడించే అవకాశాన్ని కోల్పోతున్నారు. మాకు ఓటు వేయడానికి అవకాశం లేకుండా పోయింది. అభివృద్ధి పనులు పూర్తిగా ఆగిపోయాయి. ప్రభుత్వ పథకాల అమలు కూడా ఆలస్యమవుతోంది అని స్థానికులు చెబుతున్నారు.

15 ఏళ్లుగా ఎన్నికలు జరగకపోవడం వలన.. పాత నాయకులే నిర్వహణ బాధ్యతలు చూస్తున్నా, కొత్త అభివృద్ధి దిశగా ముందడుగు వేయలేకపోతున్నామని వారు అంటున్నారు. ముఖ్యంగా గిరిజన – అగిరిజన మధ్య తలెత్తిన సమస్యలు గ్రామాల ఐక్యతను కూడా దెబ్బతీస్తున్నాయని గ్రామస్తులు ఆవేదన చెందుతున్నారు.

ప్రభుత్వం – అధికారుల వైఖరి

ప్రభుత్వం కూడా ఈ సమస్యను పరిష్కరించేందుకు పలు సార్లు యత్నించింది. కానీ కోర్టు కేసులు పెండింగ్‌లో ఉండటంతో ఎన్నికలు నిర్వహించలేకపోయింది. అధికారులు మాత్రం సుప్రీంకోర్టు తీర్పు వెలువడగానే ఎన్నికలు జరిపేందుకు సిద్ధంగా ఉన్నాం అని చెబుతున్నారు.

Also Read: ఎమ్మెల్యేకు చేదు అనుభవం.. చొక్కాపట్టి లాగి నడిరోడ్డుపై నిలదీసిన స్థానికులు, వీడియో వైరల్

ప్రజాస్వామ్యానికి దెబ్బ

దేశంలోనే అతి చిన్న స్థాయి ప్రజాస్వామ్య వ్యవస్థ అయిన గ్రామ పంచాయితీలు, వార్డు ఎన్నికలు జరగకపోవడం ప్రజాస్వామ్య బలహీనతగా విశ్లేషకులు భావిస్తున్నారు. గ్రామ ప్రజలకు తమ నాయకులను ఎంచుకునే హక్కు లేకపోవడం వలన అభివృద్ధి క్షీణిస్తుంది. అలాగే ప్రజల్లో ప్రజాస్వామ్యంపై విశ్వాసం దెబ్బతింటుందని నిపుణులు హెచ్చరిస్తున్నారు.