Maoist Surrender: మావోయిస్ట్ పార్టీకి బిగ్ షాక్.. సీఎం రేవంత్ సమక్షంలో అతిపెద్ద లొంగుబాటు, అడవి బాట వీడిన 130 మంది మావోలు

తెలంగాణ రాష్ట్ర చరిత్రలో ఒక కీలక ఘట్టం నమోదైంది. మావోయిస్టు ఉద్యమ గమనంలో మునుపెన్నడూ లేని విధంగా అతిపెద్ద లొంగుబాటు ప్రక్రియ చోటుచేసుకుంది. ముఖ్యమంత్రి రేవంత్ రెడ్డి సమక్షంలో ఏకంగా 130 మంది మావోయిస్టులు ఆయుధాలను వీడి జనజీవన స్రవంతిలో కలిశారు.

రాష్ట్ర సచివాలయంలో జరిగిన ఈ కార్యక్రమంలో మావోయిస్టులు తమ వద్ద ఉన్న భారీ ఆయుధ సంపత్తిని పోలీసులకు అప్పగించారు. లొంగిపోయిన వారిలో కీలక నేతలు ఉండటం విశేషం. ముగ్గురు రాష్ట్ర కమిటీ సభ్యులు అలాగే ఒక రీజినల్ కమిటీ సభ్యుడు ఉన్నారు. పది మంది డివిజనల్ కమిటీ సభ్యులతో పాటు 46 మంది ఏరియా కమిటీ సభ్యులు కూడా ఈ జాబితాలో చేరారు. మిగిలిన 70 మంది పార్టీ సాధారణ సభ్యులుగా పోలీసులు గుర్తించారు. వీరంతా ఏళ్ల తరబడి అడవిని నమ్ముకుని పోరాటం సాగించిన వారు కావడం గమనార్హం.

లొంగుబాటు సందర్భంగా మావోయిస్టులు భారీగా మారణాయుధాలను ప్రభుత్వానికి అప్పగించారు. మొత్తం 124 తుపాకులను పోలీసులు స్వాధీనం చేసుకున్నారు. ఇందులో అత్యంత ప్రమాదకరమైన ఒక INSAS LMG రైఫిల్ ఉంది. వీటితో పాటు 31 AK-47 రైఫిళ్లు ఉన్నాయి. మరో 21 INSAS రైఫిళ్లు ఉండగా 20 SLR రైఫిళ్లు కూడా పోలీసులకు చిక్కాయి. 18 సంఖ్యలో 303 రైఫిళ్లు సహా 33 ఇతర రకాల తుపాకులను వారు వదిలిపెట్టారు. కేవలం తుపాకులే కాకుండా 5205 తూటాలను సైతం అప్పగించి అడవి బాటను వీడారు.

తెలంగాణలో మావోయిస్టుల ఉనికిని తుడిచిపెట్టే క్రమంలో ప్రభుత్వం చేపట్టిన చర్యలు సత్ఫలితాలను ఇస్తున్నాయి. ఇప్పటి వరకు రాష్ట్ర పోలీసులు ముందు మొత్తం 721 మంది మావోయిస్టులు లొంగిపోయారు. వీరి నుంచి ఇప్పటి దాకా 266 ఆయుధాలను అధికారులు స్వాధీనం చేసుకున్నారు. ప్రస్తుతం తెలంగాణ నుంచి కేవలం ఏడుగురు మావోయిస్టులు మాత్రమే అజ్ఞాతంలో ఉన్నట్లు నిఘా వర్గాలు గుర్తించాయి. కేంద్ర కమిటీలో ముగ్గురు సభ్యులు కొనసాగుతుండగా అందులో ఇద్దరు తెలంగాణ రాష్ట్రానికి చెందిన వారే కావడం గమనార్హం.

ముఖ్యమంత్రి రేవంత్ రెడ్డి లొంగిపోయిన మావోయిస్టులకు స్వాగతం పలికారు. ప్రభుత్వం కల్పించే పునరావాస ప్యాకేజీల ద్వారా గౌరవప్రదమైన జీవితాన్ని గడపాలని సూచించారు. హింసా మార్గం ద్వారా ఆశించిన మార్పు రాదని ప్రజాస్వామ్య పద్ధతులే పరిష్కారమని ఆయన పేర్కొన్నారు. అజ్ఞాతంలో ఉన్న మిగిలిన వారు కూడా ఆయుధాలు వీడి కుటుంబ సభ్యులతో కలిసి జీవించాలని పిలుపునిచ్చారు. ఈ భారీ లొంగుబాటుతో తెలంగాణలో మావోయిస్టు ప్రాబల్యం దాదాపు కనుమరుగైనట్లు విశ్లేషకులు భావిస్తున్నారు.

ALSO READ: Civils Ranker: సివిల్స్‌లో సత్తా చాటిన పెద్దపల్లి జిల్లా యువతి, పేరెంట్స్ ఆనందానికి అవధుల్లేవ్, ఏడేళ్ల కష్టానికి ఇది ఫలితం..