Telangana-Cabinet: తెలంగాణ కేబినెట్ కీలక నిర్ణయాలు.. బడ్జెట్ సమావేశాల షెడ్యూల్ ఖరారు, ఎప్పటినుంచంటే?

Telangana-Cabinet: రాష్ట్ర ప్రయోజనాలే లక్ష్యంగా తెలంగాణ మంత్రివర్గం అనేక కీలక తీర్మానాలకు ఆమోదముద్ర వేసింది. ముఖ్యంగా వైద్యారోగ్య శాఖలో భారీ మార్పులకు శ్రీకారం చుట్టింది. ఇప్పటివరకు ఉన్న తెలంగాణ వైద్య విధాన పరిషత్‌ పేరును ‘డైరెక్టరేట్ ఆఫ్ సెకండరీ హెల్త్’గా మారుస్తూ నిర్ణయం తీసుకుంది. ప్రజలకు ద్వితీయ శ్రేణి వైద్య సేవలను మరింత చేరువ చేసేందుకే ఈ నామకరణం చేసినట్లు ప్రభుత్వం పేర్కొంది. నగర రవాణా వ్యవస్థలో కీలకమైన హైదరాబాద్‌ మెట్రోను ప్రభుత్వం స్వాధీనం చేసుకోవాలని నిర్ణయించడం గమనార్హం. ప్రైవేట్ భాగస్వామ్యంతో కొనసాగుతున్న ఈ ప్రాజెక్టును ప్రభుత్వ పరిధిలోకి తీసుకురావడం ద్వారా సామాన్యులకు మరింత మేలు జరుగుతుందని భావిస్తున్నారు.

Also Read: Social drama OTT : తప్పిపోయిన కూతురి కోసం తల్లి ఆరాటం… ఓటీటీలోకి వరలక్ష్మి శరత్‌కుమార్ సోషల్ డ్రామా

20 ఎకరాల భూమిని కేటాయిస్తూ క్యాబినెట్ ఆమోదం

మతపరమైన, విద్యా సంబంధిత అంశాలకు సైతం ఈ భేటీలో ప్రాధాన్యం దక్కింది. ఖమ్మం జిల్లాలో తిరుమల తిరుపతి దేవస్థానం (TTD) కార్యకలాపాల నిమిత్తం 20 ఎకరాల భూమిని కేటాయిస్తూ క్యాబినెట్ ఆమోదం తెలిపింది. అటు విద్యా రంగాన్ని బలోపేతం చేసే దిశగా మహబూబాబాద్ జిల్లా గుమ్మడూరులో జేఎన్‌టీయూ (JNTU) ఇంజనీరింగ్ కాలేజీ నిర్మాణానికి 70 ఎకరాల భారీ కేటాయింపు జరిపింది. వీటితో పాటు అన్ని జిల్లాల్లో అధికార కాంగ్రెస్ పార్టీ కార్యాలయాల నిర్మాణానికి అవసరమైన స్థలాలను ఇచ్చేందుకు గ్రీన్ సిగ్నల్ ఇచ్చింది.

బడ్జెట్ రూపకల్పన

రాష్ట్ర శాసనసభ బడ్జెట్ సమావేశాల నిర్వహణపై ప్రభుత్వం స్పష్టత ఇచ్చింది. మార్చి 16వ తేదీ నుంచి 30 వరకు అసెంబ్లీ సమావేశాలు నిర్వహించాలని నిర్ణయించింది. షెడ్యూల్ ప్రకారం మార్చి 16న ఉభయ సభలను ఉద్దేశించి గవర్నర్ ప్రసంగిస్తారు. 17, 18 తేదీల్లో గవర్నర్ ప్రసంగానికి ధన్యవాద తీర్మానంపై చర్చ జరుగుతుంది. అత్యంత కీలకమైన రాష్ట్ర బడ్జెట్‌ను మార్చి 20వ తేదీన ఆర్థిక శాఖ మంత్రి భట్టి విక్రమార్క అసెంబ్లీలో ప్రవేశపెట్టనున్నారు. రాష్ట్ర ఆర్థిక పరిస్థితిని ప్రతిబింబించేలా ఈ బడ్జెట్ రూపకల్పన ఉండబోతోంది. పాలనలో వేగం పెంచడంతో పాటు సంక్షేమ పథకాల అమలుకు ఈ సమావేశం దిశానిర్దేశం చేసింది. మెట్రో స్వాధీనం వంటి సాహసోపేత నిర్ణయాలు నగర వాసుల్లో ఆసక్తిని కలిగిస్తున్నాయి. జిల్లాల్లో మౌలిక సదుపాయాల కల్పనతో పాటు విద్యా సంస్థల ఏర్పాటుకు పెద్దపీట వేయడంపై సర్వత్రా హర్షం వ్యక్తమవుతోంది. అసెంబ్లీ వేదికగా మరిన్ని కీలక ప్రకటనలు వచ్చే అవకాశం ఉన్నట్లు తెలుస్తోంది.

Also Read: Chiranjeevi vs Allu Arjun: చిరంజీవి vs అల్లు అర్జున్..ఫిలిం ఫేర్ అవార్డ్స్ రికార్డ్స్ లో నిజం ఏమిటంటే..!