Sarpanch Elections: సర్పంచ్ ఎన్నికలకు రంగం సిద్ధం.. డేట్స్ కూడా ఫిక్స్..! ఎప్పుడంటే..?

Sarpanch Elections: : తెలంగాణ రాష్ట్రంలో గ్రామ పంచాయతీ ఎన్నికలకు ముహూర్తం ఖరారైంది. రాష్ట్ర ఎన్నికల సంఘం సర్పంచ్ ఎన్నికల నిర్వహణకు విస్తృత ఏర్పాట్లు చేస్తోంది. ఈ నెల 26వ తేదీన అధికారికంగా ఎన్నికల నోటిఫికేషన్ విడుదల కానుంది.

మూడు విడతలుగా పోలింగ్

సర్పంచ్ ఎన్నికలను అధికారులు మూడు విడతలుగా నిర్వహించడానికి సన్నాహాలు చేస్తున్నారు. డిసెంబర్ నెలలో 11, 14, 17 తేదీల్లో ఈ ఎన్నికలు జరపే ఆలోచనలో ప్రభుత్వం ఉన్నట్టు తెలుస్తోంది. రాష్ట్రవ్యాప్తంగా అన్ని గ్రామ పంచాయతీలలో పోలింగ్ ప్రశాంతంగా, పారదర్శకంగా నిర్వహించేందుకు ఎన్నికల యంత్రాంగం చర్యలు చేపట్టింది. ప్రతి విడత ఎన్నికలు పూర్తయిన వెంటనే అదే రోజున ఓట్ల లెక్కింపు, ఫలితాల ప్రకటన చేపట్టేందుకు ప్రణాళికలు రూపొందుతున్నాయి.

పాత రిజర్వేషన్లే అమలు

ఈ ఎన్నికలకు సంబంధించి పాత రిజర్వేషన్లను వర్తింపజేయాలని ప్రభుత్వం నిర్ణయించింది. రిజర్వేషన్ల ప్రక్రియ ఇప్పటికే పూర్తయింది. సోమవారం రోజున రాష్ట్రంలోని గ్రామాల వారీగా రిజర్వేషన్ల రోస్టర్‌ను విడుదల చేయడానికి రంగం సిద్ధమైంది. దీని ద్వారా ఏ గ్రామం ఏ సామాజిక వర్గానికి రిజర్వ్ అయిందో స్పష్టమవుతుంది.

ఈ రిజర్వేషన్ల కేటాయింపు వివరాలు ఇలా ఉన్నాయి:

బీసీ వర్గానికి: 23 శాతం స్థానాలు

ఎస్సీ వర్గానికి: 17 శాతం స్థానాలు

ఎస్టీ వర్గానికి: 10 శాతం స్థానాలు

ఈ రిజర్వేషన్ల పద్ధతి పాటిస్తూనే సర్పంచ్ స్థానాల భర్తీ ప్రక్రియ మొదలవుతుంది. ఈ ఎన్నికల ద్వారా రాష్ట్రంలో దాదాపు 12,751 గ్రామ పంచాయతీలకు కొత్త సర్పంచులు ఎన్నిక కానున్నారు.

ఎన్నికల నోటిఫికేషన్ విడుదల తేదీ దగ్గర పడుతుండటంతో గ్రామీణ ప్రాంతాలలో రాజకీయ వాతావరణం వేడెక్కింది. సర్పంచ్ పదవికి పోటీ చేయాలనుకునే అభ్యర్థులు తమ ప్రచారం మొదలుపెట్టారు. వివిధ రాజకీయ పార్టీలు గ్రామ స్థాయిలో తమ అభ్యర్థులను ఎంపిక చేసే పనిలో నిమగ్నమై ఉన్నాయి. అటు అధికారులు, ఇటు రాజకీయ నాయకులు ఎన్నికల నిర్వహణ, విజయాలపై దృష్టి సారించారు. తెలంగాణ పల్లెల్లో త్వరలో పండగ వాతావరణం నెలకొననుంది. ఈ ఎన్నికల ఫలితాలు రాష్ట్ర రాజకీయాలపై గణనీయమైన ప్రభావం చూపే అవకాశం ఉంది. ఎన్నికల కోడ్ అమలులోకి వచ్చిన తర్వాత నామినేషన్ల స్వీకరణ, పరిశీలన లాంటి ముఖ్య ఘట్టాలు చకచకా జరగనున్నాయి.

ALSO READ: Mahesh Kumar Goud: నేను మళ్లీ చెబుతున్నా.. బీజేపీ, బీఆర్ఎస్ ఒక్కటే: మహేష్ కుమార్ గౌడ్