కేటీఆర్, కవితలపై రఘునందన్ రావు ఫైర్.. 2007లో ఎక్కడున్నారు? అంటూ ప్రశ్నల వర్షం!

Raghunandan Rao: బీజేపీపై తీవ్ర విమర్శలు చేస్తున్న కేటీఆర్, కవితలకు మెదక్ రఘునందన్ రావు చురకలు అంటించారు. బీజేపీ ఆధ్వర్యంలో బొల్లికుంట వాగ్డేవి కాలేజీలో జరుగుతున్న ప్రత్యేక శిక్షణా కార్యక్రమానికి హాజరై ఆయన మాట్లాడారు. బీజేపీని పదే పదే టార్గెట్ చేస్తున్న కేటీఆర్.. 2007లో ఎక్కడ ఉన్నారని రఘునందన్ రావు ప్రశ్నించారు. పదేళ్ల బీఆర్ఎస్ పాలనలో రాష్ట్రానికి ఏం చేశారని నిలదీశారు. మరోవైపు టీఆర్ఎస్ అధినేతి కవిత.. బాధ్యతారాహిత్యంగా మాట్లాడుతున్నారని మండిపడ్డారు. అటు వడ్ల కొనుగోలుపై సీఎం రేవంత్ రెడ్డి అబద్దాలు మాట్లాడటం సరికాదని రఘునందన్ రావు పేర్కొన్నారు.

రాష్ట్రంలో ధాన్యం కొనుగోలుపై అవగాహన లేకుండా నాయకులు మాట్లాడుతున్నారని మెదక్ ఎంపీ రఘునందన్ రావు అన్నారు. 50 లక్షల మెట్రిక్ టన్నులు కొనుగోలు చేసేందుకు కేంద్ర అనుమతి ఇచ్చిందని పేర్కొన్నారు. కాంగ్రెస్ పార్టీ తన మ్యానిఫెస్టోలో ప్రతి గింజ కొనుగోలు చేస్తాం అని ఎన్నికల ముందు చెప్పింది నిజం కాదా? అని ప్రశ్నించారు. వన్ నేషన్.. వన్ రేషన్ తీసుకువచ్చిన ఘనత ప్రధాని మోదీకే దక్కుతుందని ఆయన అన్నారు. కాంగ్రెస్ పాలనలో గోదాంలలో రేషన్ ను ఎలుకలు తినేవని రఘునందన్ రావు ఎద్దేవా చేశారు. కానీ బీజేపీ పాలనలో రేషన్ దుకాణాలను డిజిటల్ చేసినట్లు గుర్తుచేశారు.

కేంద్రంలోని ఎన్డీఏ ప్రభుత్వం వ్యవసాయ రంగానికి పెద్ద పీట వేస్తోందని రఘునందన్ రావు స్పష్టం చేశారు. దేశ ప్రజల ఆశీస్సులు మోదీకి ఉన్నాయని పేర్కొన్నారు. మోదీ అధికారంలోకి వచ్చాక పంటలకు మద్దతు ధర పెంచింది మర్చిపోయారా? అని రఘునందన్ రావు ప్రశ్నించారు. రైతు సరుకులను కేంద్రం కొనుగోలు చేస్తోందని తెలియజేశారు. ధాన్యం కొనుగోలుపై చర్చకు తాము సిద్దమని సవాలు విసిరారు.

Also Read: రేవంత్‌కు క్లోజ్‌గా ఉండటంతో.. నా ఫోనూ ట్యాప్ చేశారు.. ఎంపీ చామల కీలక వ్యాఖ్యలు

నరేంద్ర మోదీ మరోమారు దేశానికి ప్రధాని అవుతారని ఎంపీ రఘునందన్ రావు జోస్యం చెప్పారు. 2047 నాటికి మోదీ పాలనలో భారత్ ప్రపంచంలోనే అగ్రగామిగా ఉంటుందని ఆశాభావం వ్యక్తం చేశారు. మరోవైపు ఏపీ, తెలంగాణ అంటూ మాట్లాడుతున్న బీఆర్ఎస్ నేతలకు రఘునందన్ రావు చురకలు అంటించారు. వైసీపీ మహిళా నేత రోజా ఇంట్లో విందు భోజనం చేస్తూ.. రాయలసీమను రతనాల సీమ చేస్తానని కేసీఆర్ అనడం నిజం కాదా? అని ప్రశ్నించారు. మరోవైపు ప్రజాస్వామ్యంలో ఎవరైన ఎక్కడైనా పోటీ చేసే హక్కు ఉందని రఘునందన్ రావు స్పష్టం చేశారు.

Also Read: ఆండ్రాయిడ్ ఫోన్లను.. ఘోరంగా అవమానించిన యాపిల్.. నెట్టింట రచ్చ రచ్చ!