MLC Kavitha: కేటీఆర్ తీరుపై విరుచుకుపడ్డ కవిత.. ‘పదేళ్లు గుర్తుకురాని జిల్లా.. ఇప్పుడు ఉద్యమాలా?’

మాజీ మంత్రి, బీఆర్‌ఎస్ కార్యనిర్వాహక అధ్యక్షుడు కేటీఆర్ లక్ష్యంగా ఎమ్మెల్సీ కవిత సంచలన వ్యాఖ్యలు చేశారు. సికింద్రాబాద్‌ను ప్రత్యేక జిల్లాగా ప్రకటించాలంటూ కేటీఆర్ చేపట్టిన ఆందోళనలపై ఆమె తీవ్రస్థాయిలో ధ్వజమెత్తారు. పదేళ్ల పాటు అధికారంలో ఉన్న సమయంలో లేని డిమాండ్, ఇప్పుడు ప్రతిపక్షంలోకి రాగానే గుర్తుకురావడం హాస్యాస్పదంగా ఉందని ఆమె విమర్శించారు.

అధికారంలో ఉన్నప్పుడు ఏమైంది..?

సికింద్రాబాద్ జిల్లా చేయాలని ప్రస్తుతం ఉద్యమం చేస్తున్న కేటీఆర్‌ను చూస్తుంటే తనకు నవ్వు వస్తోందని కవిత వ్యాఖ్యానించారు. గత పదేళ్ల కాలంలో బీఆర్‌ఎస్ ప్రభుత్వం అధికారంలో ఉన్నప్పుడు అనేక కొత్త జిల్లాలను ఏర్పాటు చేశామని, అప్పుడు సికింద్రాబాద్‌ను జిల్లాగా మార్చే అవకాశం ఉన్నా ఎందుకు పట్టించుకోలేదని ఆమె ప్రశ్నించారు. ప్రజల అవసరాల కంటే రాజకీయ ప్రయోజనాలే ముఖ్యమని భావించినందువల్లే అప్పట్లో ఈ నిర్ణయం తీసుకోలేదని ఆమె ఆరోపించారు.

కేటీఆర్‌పై తీవ్ర స్థాయిలో విరుచుకుపడిన కవిత

సికింద్రాబాద్ జిల్లా చేయాలని ఉద్యమం చేస్తున్న కేటీఆర్‌ని చూసి నవ్వుకున్నానన్న కవిత

పదేండ్లు అధికారంలో ఉండి జిల్లా చేయకుండా, జిల్లా చేయాలని ఉద్యమం చేసినవారిపై కేసులు పెట్టి.. ఇప్పుడు ఉద్యమం చేయడం చూస్తే నవ్వొస్తుందంటూ ఆరోపణలు pic.twitter.com/I0M5xS1Doq

— BIG TV Breaking News (@bigtvtelugu) January 21, 2026

నాడు కేసులు.. నేడు ఉద్యమాలు..

గతంలో సికింద్రాబాద్‌ను జిల్లా చేయాలని కోరుతూ అనేక ప్రజా సంఘాలు, స్థానిక నాయకులు ఉద్యమాలు చేశారని కవిత గుర్తు చేశారు. అయితే, అప్పట్లో అధికారంలో ఉన్న కేటీఆర్ ప్రభుత్వం ఆ ఉద్యమకారుల గోడు వినకపోగా, వారిపై అక్రమ కేసులు పెట్టి వేధించారని ఆమె ఆరోపించారు. ‘నాడు జిల్లా కావాలని అడిగిన వారిని జైలుకు పంపిన వారే, నేడు అదే డిమాండ్‌తో వీధుల్లోకి రావడం విడ్డూరంగా ఉంది’ అని ఆమె ఎద్దేవా చేశారు.

ప్రజలను తప్పుదోవ పట్టించడమే లక్ష్యం.. 

ప్రస్తుత కాంగ్రెస్ ప్రభుత్వంపై ఒత్తిడి తెచ్చే పేరుతో కేటీఆర్ కేవలం రాజకీయ ఉనికి కోసమే ఇటువంటి డ్రామాలు ఆడుతున్నారని కవిత విమర్శించారు. అధికారంలో ఉన్నప్పుడు ప్రజల ఆకాంక్షలను కాలరాసి, ఇప్పుడు అవే ఆకాంక్షల కోసం పోరాడుతున్నట్లు నటించడం ప్రజలను మోసం చేయడమేనని మండిపడ్డారు. కేటీఆర్ వైఖరిని ప్రజలు గమనిస్తున్నారని, ఆయన ద్వంద్వ ప్రమాణాలకు కాలమే సమాధానం చెబుతుందని ఆమె స్పష్టం చేశారు.

ALSO READ: Allipudi Murder Case: తెదేపా కార్యకర్త హత్య కేసులో నిందితులను రోడ్డుపై నడిపించిన పోలీసులు!