Warangal Politics: మున్సిపల్ ఎన్నికలు సమీపిస్తున్న వేళ వరంగల్ తూర్పు నియోజకవర్గంలో కాంగ్రెస్ పార్టీలో కీలక రాజకీయ పరిణామాలు చోటు చేసుకుంటున్నాయి. నిన్నటి వరకు ఆధిపత్యం చెలాయించిన కొండా ఫ్యామిలీ (కొండా సురేఖ, కొండా మురళి)కి గట్టి ఎదురుదెబ్బ తగులుతోంది. కొండా అనుచరులు, కీలక నేతలు ఒక్కొక్కరుగా ఆ కుటుంబాన్ని వీడుతున్నారు. కొండా వ్యతిరేక వర్గమైన ఎమ్మెల్సీ బస్వరాజు సారయ్య గ్రూపులో చేరుతుండటం వరంగల్ రాజకీయాల్లో ఇప్పుడు హాట్ టాపిక్ గా మారింది. ఈ పరిణామాలు తూర్పు నియోజకవర్గ కాంగ్రెస్ రాజకీయ ముఖచిత్రాన్ని సమూలంగా మార్చేసే అవకాశం ఉంది.
ఈ వలసల పరంపరలో భాగంగా.. కొండా అనుచరులలో ప్రముఖుడైన వరంగల్ డీసీసీ నాయకుడు ఆయూబ్ తాజాగా ఎమ్మెల్సీ బస్వరాజు సారయ్య గూటికి చేరారు. అంతేకాక, కొండా ఫ్యామిలీకి అత్యంత వీరాభిమానిగా, నమ్మిన బంటుగా పేరొందిన కీలక నేత నల్గొండ రమేష్ సైతం అనూహ్యంగా కొండా వర్గంతో తెగదెంపులు చేసుకున్నారు. ఆయన కూడా ఎమ్మెల్సీ సారయ్య గ్రూపులో చేరడం కొండా ఫ్యామిలీకి అతి పెద్ద షాక్గా రాజకీయ విశ్లేషకులు భావిస్తున్నారు. కొండా వర్గంలో కీలకంగా వ్యవహరించిన ఈ ఇద్దరు ముఖ్య నాయకుల ఫిరాయింపులు, ఇతర నాయకులు, కార్యకర్తలపై తీవ్ర ప్రభావాన్ని చూపే అవకాశం ఉంది.
నిన్నటి వరకు కొండా ఫ్యామిలీకి అండగా ఉన్న నల్గొండ రమేష్, ఆయూబ్ వంటి కీలక నేతలు సైతం వర్గాన్ని వీడడంతో.. కొండా ఫ్యామిలీని నమ్ముకుని ఉన్న ఇతర అనుచరుల్లో తీవ్ర అయోమయం, ఆందోళన నెలకొంది. కొండా ఫ్యామిలీ పట్టు కోల్పోతుండటం, సారయ్య బలం పుంజుకోవడం తూర్పు నియోజకవర్గంలో స్పష్టంగా కనిపిస్తోంది. ఈ పరిణామాలు కేవలం కొండా ఫ్యామిలీకే కాక, స్థానిక కాంగ్రెస్ పార్టీ శ్రేణులకు కూడా పెద్ద తలనొప్పిగా మారాయి. మున్సిపల్ ఎన్నికల ముందు ఈ విధంగా నాయకులు వర్గాలు మారడం, పార్టీలో చీలికలు ఏర్పడడం స్థానికంగా పార్టీ విజయావకాశాలపై ప్రభావం చూపే అవకాశం ఉందని కాంగ్రెస్ కార్యకర్తలు ఆందోళన వ్యక్తం చేస్తున్నారు.
ఈ మొత్తం వ్యవహారం కొండా ఫ్యామిలీ వర్సెస్ ఎమ్మెల్సీ సారయ్య మధ్య జరుగుతున్న పాత ఆధిపత్య పోరుకు పరాకాష్ఠగా నిలుస్తోంది. వరంగల్ తూర్పు నియోజకవర్గంలో తమ పట్టును నిరూపించుకోవడానికి ఇరువర్గాలు చేస్తున్న ప్రయత్నంలో సారయ్య వర్గం ప్రస్తుతం పైచేయి సాధిస్తున్నట్లు కనిపిస్తోంది.
ఈ ఆధిపత్య పోరు చిలికి చిలికి గాలివానలా మారి పార్టీకి నష్టం చేస్తుందేమోనని కాంగ్రెస్ జిల్లా నాయకత్వం కూడా కలవరపడుతున్నట్లు సమాచారం. మున్సిపల్ ఎన్నికల ముందు పార్టీలో ఏర్పడిన ఈ అంతర్గత కలహాలు, నాయకుల వలసలను జిల్లా కాంగ్రెస్ నేతలు ఏ విధంగా చక్కదిద్దుతారు అనేది ప్రశ్నార్థకంగా మారింది. వరంగల్ తూర్పు కాంగ్రెస్లో రాబోయే రోజుల్లో మరిన్ని కీలక పరిణామాలు చోటు చేసుకునే అవకాశం ఉంది.
ALSO READ: Pawan Kalyan : అన్న బాటలో నడుస్తున్న పవన్ కళ్యాన్.. హైకోర్టుకు ఏపీ డిప్యూటీ సీఎం
Share
Tomatoes: టమాటాల వల్లే కిడ్నీలో రాళ్లు ఏర్పడతాయా?.. డాక్టర్లు చెప్పిన నిజాలు వింటే నమ్మలేరు!
AP Politics: విజయసాయిరెడ్డి.. పొలిటికల్ రీఎంట్రీ ఇస్తారా?
