Kavitha: జూబ్లీహిల్స్ ఓటమిపై కవిత ట్వీట్.. కర్మ హిట్స్ బ్యాక్ అంటూ అన్నకు కౌంటర్!

Kavitha: శుక్రవారం (నవంబర్ 14న) వెలువడిన జూబ్లీహిల్స్ ఉపఎన్నిక (Jubilee Hills By-Election) ఫలితాలపై కేటీఆర్ సోదరి, జాగృతి అధ్యక్షురాలు కవిత చేసిన ఒక ట్వీట్ ఇప్పుడు బీఆర్ఎస్ వర్గాల్లో సంచలనం సృష్టిస్తోంది. “Karma hits back” (కర్మ తిరిగి దెబ్బతీస్తుంది) అంటూ ఆమె ‘ఎక్స్’ (ట్విట్టర్) వేదికగా చేసిన పోస్ట్, నేరుగా పార్టీ ఓటమిని, నాయకత్వాన్ని ఉద్దేశించి చేసిందేనని రాజకీయ వర్గాలు భావిస్తున్నాయి.

ఇటీవల కాలంలో సొంత కుటుంబం స్థాపించిన బీఆర్ఎస్ పార్టీ నుండి సస్పెన్షన్, రాజీనామా వంటి నాటకీయ పరిణామాల నేపథ్యంలో, తన సోదరుడు కేటీఆర్ ప్రతిష్టాత్మకంగా తీసుకున్న జూబ్లిహిల్స్ ఎన్నికలో పార్టీ ఓటమిని ప్రస్తావిస్తూ ఆమె ఈ వ్యాఖ్య చేసిందా అని పార్టీ వర్గాల్లో తీవ్ర చర్చనీయాంశమైంది. ఈ ట్వీట్ బీఆర్ఎస్‌లోని తీవ్రమైన అంతర్గత విభేదాలను, కుటుంబంలోని రాజకీయ పోరును మరోసారి బహిర్గతం చేసింది.

Karma hits back !!! 🙏🙏🙏🙏

— Kavitha Kalvakuntla (@RaoKavitha) November 14, 2025

వరంగల్ సభ అనంతరం పార్టీలోని పరిణామాలపై ఫీడ్‌బ్యాక్ ఇస్తూ ఆమె కేసీఆర్ కు ఓ లేఖ రాసిన సంగతి తెలిసిందే. అయితే మీడియాకు బహిర్గతమైన కవిత లేఖ తెలంగాణ రాజకీయాల్లో, బీఆర్ఎస్ పార్టీలో తీవ్ర కలకలం రేపింది. ఈ లేఖ ద్వారా, పార్టీ అధినేత కేసీఆర్ చుట్టూ ఉన్న కోటరీ (సన్నిహిత వర్గం)పై ఆమె పలు తీవ్రమైన ఆరోపణలు చేశారు.

బీజేపీ విషయంలో పార్టీ వైఖరిపై స్పష్టత లేకపోవడాన్ని కూడా ఆమె ఆ లేఖలో ప్రశ్నించారు . బీజేపీని గట్టిగా టార్గెట్ చేయకపోవడం వల్ల కాంగ్రెస్ లబ్ధి పొందిందని, అది వ్యక్తిగతంగా తనకు కూడా ఇబ్బంది కలిగించిందని ఆమె అభిప్రాయపడ్డారు. నెలల తరబడి పార్టీతో, కుటుంబంతో కొనసాగుతున్న బహిరంగ విభేదాల తర్వాత, తన తండ్రి కేసీఆర్ రాజకీయ వారసత్వం నుండి ఆమె ఉద్దేశపూర్వకంగానే, పూర్తిగా బయటకు వస్తున్నారనడానికి ఈ చర్య ఒక స్పష్టమైన సంకేతంగా కనిపిస్తోంది.

ప్రస్తుతం కవిత ఒక పాదయాత్రను ప్రారంభించి, తనను తాను రాజకీయంగా పునర్నిర్మించుకుని (సెల్ఫ్ రీబ్రాండ్) సొంత మార్గాన్ని నిర్మించుకునేందుకు ప్రయత్నిస్తున్నారని రాజకీయ విశ్లేషకులు చెబుతున్నారు. మొత్తమ్మీద, జూబ్లీహిల్స్ ఓటమి, కవిత ‘కర్మ’ ట్వీట్, బీఆర్ఎస్ భవిష్యత్తుపై తీవ్ర ప్రభావం చూపే అవకాశం ఉందని అభిప్రాయం వ్యక్తమవుతోంది.