బలిదానాలు వద్దు.. పోరాడి సాధిద్దాం, ఆర్టీసీ సమ్మెకు మద్దతు ప్రకటించిన జనసేన

తెలంగాణలో తమ న్యాయమైన డిమాండ్ల పరిష్కారం కోరుతూ ఆర్టీసీ కార్మికులు చేపట్టిన సమ్మెకు జనసేన పార్టీ సంపూర్ణ మద్దతు ప్రకటించింది. కార్మికులు చేస్తున్న ఈ పోరాటంలో తాము భాగస్వాములం అవుతామని స్పష్టం చేసింది. ఈ మేరకు పార్టీ నాయకుడు, నటుడు ఆర్.కె. సాగర్ ఒక ప్రత్యేక వీడియో సందేశాన్ని విడుదల చేశారు. సుమారు 38 వేల మంది కార్మికుల కుటుంబాల భవిష్యత్తుతో ముడిపడి ఉన్న ఈ సమ్మెకు జనసేనాని పవన్ కళ్యాణ్ ఆదేశాల మేరకు మద్దతు ఇస్తున్నట్లు ఆయన వివరించారు. ప్రభుత్వ మొండి వైఖరిని ఎండగడుతూనే కార్మికుల్లో ధైర్యం నింపే ప్రయత్నం చేశారు.

సమ్మెలో భాగంగా నర్సంపేట డిపోకు చెందిన కార్మికుడు శంకర్ గౌడ్ ఆత్మహత్యకు పాల్పడటం పట్ల జనసేన తీవ్ర దిగ్భ్రాంతి వ్యక్తం చేసింది. ఆయన మరణం అత్యంత విచారకరమని పార్టీ పేర్కొంది. శంకర్ గౌడ్ మరణంతో ఆయన భార్యతో పాటు ఇద్దరు కుమార్తెలు అలాగే ఒక కుమారుడు అనాథలయ్యారని ఆవేదన వ్యక్తం చేసింది. ఒక కుటుంబానికి పెద్దదిక్కుగా ఉన్న వ్యక్తి ఇలా అర్ధాంతరంగా తనువు చాలించడం ఆ కుటుంబానికి తీరని లోటని సాగర్ వాపోయారు. ఇలాంటి ఘటనలు పునరావృతం కాకూడదని ఆయన ఆకాంక్షించారు.

ఈ సందర్భంగా కార్మికులకు జనసేన పార్టీ ఒక ముఖ్యమైన విజ్ఞప్తి చేసింది. హక్కుల సాధన కోసం ప్రాణత్యాగాలకు పాల్పడవద్దని కోరింది. చనిపోయి సాధించేది ఏమీ ఉండదని.. బ్రతికి ఉండి పోరాడితేనే విజయాలు వస్తాయని హితవు పలికింది. గతంలో ప్రత్యేక తెలంగాణ ఉద్యమ సమయంలో వందలాది మంది యువకులు త్యాగాలు చేశారని గుర్తుచేసింది. విద్యార్థులు ప్రాణాలర్పించినా ఏ ప్రభుత్వమూ వారిని కనీసం పట్టించుకోలేదని జనసేన విమర్శించింది. ఆ చేదు అనుభవాలను దృష్టిలో ఉంచుకుని కార్మికులు ఆత్మహత్యల వంటి కఠిన నిర్ణయాలు తీసుకోవద్దని సూచించింది.

సమస్య ఏదైనా చర్చల ద్వారా పరిష్కరించుకోవాలని జనసేన అభిప్రాయపడింది. ఆర్టీసీ కార్మికుల డిమాండ్లు న్యాయమైనవని.. వాటిని ప్రభుత్వం వెంటనే సానుకూలంగా పరిశీలించాలని డిమాండ్ చేసింది. వేలాది మంది కార్మికులు రోడ్ల మీద ఉంటే పాలకులు పట్టించుకోకపోవడం సరికాదని మండిపడింది. కార్మికులు అధైర్యపడకుండా ఐక్యంగా ఉండి ఉద్యమించాలని పిలుపునిచ్చింది. జనసేన సైనికులు సైతం కార్మికులకు అండగా నిలుస్తారని భరోసా ఇచ్చింది.

ప్రభుత్వం మొండితనం వీడాలని.. కార్మికుల ఆవేదనను అర్థం చేసుకోవాలని జనసేన నాయకుడు సాగర్ కోరారు. ప్రాణాలు వదలడం వల్ల సమస్యలు పరిష్కారం కావని.. కేవలం ఆయా కుటుంబాలు మాత్రమే రోడ్డున పడతాయని హెచ్చరించారు. ధైర్యంగా పోరాటం సాగించాలని.. విజయం సాధించే వరకు జనసేన పార్టీ వెన్నంటి ఉంటుందని స్పష్టం చేశారు. కార్మికుల పక్షాన నిలబడటం తమ బాధ్యతగా భావిస్తున్నామని ప్రకటనలో పేర్కొన్నారు.

ALSO READ: ఆర్టీసీ డ్రైవర్ శంకర్ గౌడ్ కుటుంబానికి ప్రభుత్వం అండ.. రూ. 10 లక్షల పరిహారం, ఉద్యోగ హామీ!