రద్దీ రోడ్డుపై ఆరేళ్ల మనవరాలికి కారు డ్రైవింగ్ నేర్పిన ఎస్ఐ.. నిలదీస్తే ‘నా ఇష్టం’ అంటూ హల్‌చల్!

Child Driving: చట్టాన్ని రక్షించాల్సిన వారే నడిరోడ్డుపై నిబంధనలను ఉల్లంఘిస్తే ఎలా ఉంటుందో చూపించే ఘటనిది. హైదరాబాద్ పరిధిలోని గంధంగూడ–బైరాగిగూడ ప్రధాన రహదారిపై ఒక పోలీస్ ఆఫీసర్ బాధ్యతారహితంగా వ్యవహరించిన తీరు ప్రస్తుతం తీవ్ర కలకలం రేపుతోంది. రద్దీగా ఉండే మెయిన్ రోడ్డుపై తన ఆరేళ్ల మనవరాలితో కారు నడిపించి సామాన్య ప్రజల ప్రాణాలతో చెలగాటం ఆడారు.

ఆరేళ్ల మనవరాలికి కారు డ్రైవింగ్..

రంగారెడ్డి జిల్లాకు చెందిన సదరు సబ్ ఇన్‌స్పెక్టర్ (SI), నిత్యం వందలాది వాహనాలతో బిజీగా ఉండే గంధంగూడ ప్రధాన రహదారిపై తన ఆరేళ్ల మనవరాలికి కారు డ్రైవింగ్ నేర్పించడం మొదలుపెట్టారు. ఒక మైనర్ బాలిక, అది కూడా ఆరేళ్ల చిన్నారి కారు స్టీరింగ్ పట్టుకోవడంతో ఆ వాహనం రోడ్డుపై ప్రమాదకరంగా కదిలింది. దీనివల్ల వెనుక వచ్చే వాహనాలు నిలిచిపోయి, కిలోమీటర్ల మేర ‘బంపర్ టు బంపర్’ ట్రాఫిక్ జామ్ ఏర్పడింది. రోడ్డు భద్రతను గాలికొదిలేసి చేసిన ఈ పనితో వాహనదారులు తీవ్ర ఇబ్బందులు పడ్డారు.

ప్రశ్నించిన జనం.. ఎస్ఐ దబాయింపు!

రోడ్డుపై భారీగా ట్రాఫిక్ నిలిచిపోవడంతో స్థానికులు, వాహనదారులు సదరు ఎస్ఐని ప్రశ్నించారు. ఇంత రద్దీగా ఉండే చోట చిన్నారితో డ్రైవింగ్ ఏంటని నిలదీయగా.. ఆ అధికారి కనీసం తప్పు తెలుసుకోకుండా దురుసుగా ప్రవర్తించారు. ‘నా ఇష్టం.. నన్ను అడగడానికి మీరెవరు?’ అంటూ ప్రజలపైనే దబాయించడం అక్కడ ఉన్నవారిని ముక్కున వేలేసుకునేలా చేసింది.

Also Read: వైసీపీ అధికార ప్రతినిధి నాగార్జున యాదవ్ అరెస్ట్!

సోషల్ మీడియాలో వైరల్.. యాక్షన్ కి డిమాండ్

ఈ ఉదంతాన్ని కొందరు మొబైల్స్‌లో రికార్డ్ చేయడంతో దీనికి సంబంధించిన వీడియో ప్రస్తుతం సోషల్ మీడియాలో వైరల్‌గా మారింది. నెటిజన్లు, స్థానికులు ఈ ఘటనపై తీవ్ర ఆగ్రహం వ్యక్తం చేస్తున్నారు. చట్టం, ట్రాఫిక్ నిబంధనలు సామాన్యులకేనా, పోలీసులకు వర్తించవా? అని ప్రశ్నిస్తున్నారు. ఉన్నతాధికారులు స్పందించి సదరు ఎస్ఐపై కఠిన చర్యలు తీసుకోవాలని డిమాండ్ చేస్తున్నారు.

?igsh=a2prZmdnMXd2YjVh