CM Revanth: దేశంలోని ఫస్ట్ ఫిజికల్ ఇంటెలిజెన్స్ సిటీగా హైదరాబాద్‌.. సీఎం రేవంత్ రెడ్డి కీలక వ్యాఖ్యలు

CM Revanth: తెలంగాణ రాజధాని హైదరాబాద్‌ను దేశంలోనే అత్యంత నివాసయోగ్య నగరంగా మార్చడానికి ప్రభుత్వం సాంకేతిక పరిజ్ఞానాన్ని పూర్తి స్థాయిలో ఉపయోగించనుంది. దీనిలో భాగంగా.. హైదరాబాద్‌ను భారతదేశంలోనే మొట్టమొదటి ఫిజికల్ ఇంటెలిజెన్స్ సిటీగా అభివృద్ధి చేయాలని ముఖ్యమంత్రి ఎ. రేవంత్ రెడ్డి నిర్ణయించారు. ఈ మేరకు గురువారం ఉదయం అనలాగ్ ఏఐ (Analog AI) సీఈఓ అలెక్స్ కిప్‌మన్ సీఎం రేవంత్ రెడ్డితో భేటీ అయ్యారు.

ముఖ్యమంత్రి రేవంత్ రెడ్డి అలెక్స్ కిప్‌మన్‌తో ట్రాఫిక్ సమస్యలు, అర్బన్ ఫ్లడింగ్ నివారణ, నగరంలోని సరస్సుల రక్షణ, మెరుగైన వాతావరణ అంచనా, పారిశ్రామిక కాలుష్య నియంత్రణ లాంటి పలు కీలక అంశాలను చర్చించారు. ఈ సమస్యలన్నింటికీ ఆధునిక సాంకేతికత ద్వారా పరిష్కారాలు కనుగొనే మార్గాలపై దృష్టి సారించారు. ఫిజికల్ ఇంటెలిజెన్స్ ఆధారంగా పనిచేసే ఒక రియల్‌ టైమ్ సెన్సార్ నెట్వర్క్, స్మార్ట్ సిటీ నిర్వహణ పద్ధతులను అమలు చేయవచ్చు అని కిప్‌మన్ అభిప్రాయపడ్డారు. దీనిని హైదరాబాద్ నగరంలో పైలెట్ ప్రాజెక్టుగా చేపట్టాలని ముఖ్యమంత్రి నిర్ణయించారు. ఈ కీలక పైలెట్ ప్రోగ్రాం మొత్తం ఎనిమిది వారాల పాటు అమలు కానుంది.

ఈ ప్రతిష్టాత్మక పైలెట్ ప్రోగ్రాంలో భాగంగా నగరంలో ఇప్పటికే ఉన్న సీసీ టీవీ వ్యవస్థను రియల్‌ టైమ్ సిటీ ఇంటెలిజెన్స్ ప్లాట్‌ఫారమ్‌గా మారుస్తారు. ట్రాఫిక్ నిర్వహణ, ప్రజా భద్రత, అత్యవసర సేవలు అన్నీ కృత్రిమ మేధస్సు (AI) ఆధారిత అంచనాలతో ఒకేచోట సమన్వయం చేయబడతాయి. ఈ మొత్తం వ్యవస్థను హైదరాబాద్‌లోని ఇంటిగ్రేటేడ్ కమాండ్ కంట్రోల్ సెంటర్ నుంచి లైవ్గా పర్యవేక్షిస్తారు. ఈ ఎనిమిది వారాల పైలెట్ ప్రోగ్రాం విజయవంతంగా పూర్తయితే, హైదరాబాద్ దేశంలోనే మొట్టమొదటి ఫిజికల్ ఇంటెలిజెన్స్ సిటీగా మారుతుందని అధికారులు అంచనా వేస్తున్నారు. ఈ చర్య నగర పాలనలో ఒక సరికొత్త అధ్యాయాన్ని మొదలు పెడుతుంది.

సీఎం రేవంత్ రెడ్డి ఈ సందర్భంగా తెలంగాణ రైజింగ్ 2047 లక్ష్యాలను అలెక్స్ కిప్‌మన్‌కు వివరించారు. భారత్‌కు భవిష్యత్ నగర పరిశోధనలకు సుస్థిర పారిశ్రామిక కేంద్రంగా తెలంగాణను అభివృద్ధి చేయాలని ప్రభుత్వం సంకల్పించిందని ఆయన తెలిపారు. నగరం ఆర్థిక వృద్ధికి సైతం ఫిజికల్ ఇంటెలిజెన్స్ అద్భుతమైన పరిష్కారాలను అందిస్తుందని కిప్‌మన్ నమ్మకాన్ని వ్యక్తం చేశారు. డిసెంబర్ 8, 9 తేదీల్లో జరగనున్న తెలంగాణ రైజింగ్ గ్లోబల్ సమ్మిట్‌కు హాజరు కావాలని ముఖ్యమంత్రి అలెక్స్ కిప్‌మన్‌ను ఆహ్వానించారు. ఈ భేటీ ద్వారా హైదరాబాద్ నగరంలో సాంకేతికత వినియోగంపై బలమైన నిబద్ధత వెల్లడైంది.

ALSO READ: IBomma: ఐ బొమ్మ కేసు.. ఫస్ట్ డే విచారణలో రవి సంచలన విషయాలు