Kachiguda Cylinder Blast: సిలిండర్ బ్లాస్ట్.. ముక్కలైన ఇంటి పైకప్పు.. పెను ప్రమాదం నుంచి బయటపడ్డ కుటుంబం

Kachiguda Cylinder Blast: హైదరాబాద్‌లోని కాచిగూడ పోలీస్ స్టేషన్ పరిధిలోని కృష్ణానగర్‌లో ఆదివారం ఒక ఇంట్లో గ్యాస్ సిలిండర్ పేలి భారీ ప్రమాదం సంభవించింది. సిలిండర్ ఒక్కసారిగా పేలడంతో ఆ ధాటికి ఇంటి పైకప్పు ముక్కలు ముక్కలుగా విరిగిపడింది. భారీ శబ్దంతో జరిగిన ఈ పేలుడు వల్ల స్థానికులు తీవ్ర భయాందోళనకు గురయ్యారు.

సిలిండర్ పేలిన సమయంలో ఇంట్లో ఉన్న వారు పని మీద బయటకు వెళ్లినట్లు సమాచారం. ప్రమాద సమయంలో ఇంట్లో ఎవరూ లేకపోవడంతో పెను ప్రమాదం తప్పిందని పోలీసులు ప్రాథమికంగా నిర్ధారించారు. పేలుడు తీవ్రతకు ఇంటి గోడలు పగుళ్లు ఇవ్వగా.. పైకప్పు రేకులు.. సిమెంట్ పెచ్చులు చెల్లాచెదురుగా పడిపోయాయి.

ప్రమాదం జరిగిన వెంటనే సమాచారం అందుకున్న కాచిగూడ పోలీసులు.. అగ్నిమాపక సిబ్బంది ఘటనా స్థలానికి చేరుకున్నారు. ఫైర్ సిబ్బంది మంటలను అదుపులోకి తీసుకురావడంతో మంటలు పక్క ఇళ్లకు వ్యాపించకుండా ఆగిపోయాయి. గ్యాస్ లీకేజీ వల్ల ఈ ప్రమాదం జరిగి ఉండవచ్చని అగ్నిమాపక అధికారులు అనుమానిస్తున్నారు. ఈ ఘటనపై పోలీసులు కేసు నమోదు చేసి దర్యాప్తు చేస్తున్నారు.

కాచిగూడలో గ్యాస్ సిలిండర్ పేలుడు!

కాచిగూడలోని కృష్ణానగర్‌లో పెను ప్రమాదం తప్పింది. ఒక ఇంట్లో గ్యాస్ సిలిండర్ భారీ శబ్దంతో పేలిపోయింది. ప్రమాద సమయంలో ఇంట్లో ఎవరూ లేకపోవడంతో ప్రాణాపాయం తప్పింది. అయితే, పేలుడు ధాటికి ఇంటి పైకప్పు ముక్కలు ముక్కలై కుప్పకూలింది. పోలీసులు, ఫైర్… pic.twitter.com/jvYBPHuY0u

— ChotaNews App (@ChotaNewsApp) February 22, 2026