Jagga Reddy: జగ్గారెడ్డిపై ఎఫ్ఐఆర్.. సీఐపై తిట్ల పురాణం వెనుక అసలు కారణం ఇదే!

Jagga Reddy: సంగారెడ్డి మున్సిపల్ ఎన్నికల సందర్భంగా చోటుచేసుకున్న పరిణామాల నేపథ్యంలో కాంగ్రెస్ పార్టీ సీనియర్ నాయకుడు, మాజీ ఎమ్మెల్యే జగ్గారెడ్డిపై పోలీసులు కేసు నమోదు చేశారు. పోలింగ్ కేంద్రం వద్ద ఎన్నికల విధులకు ఆటంకం కలిగించారని ఫ్లయింగ్ స్క్వాడ్ టీమ్ అధికారి వినయ్ ఇచ్చిన ఫిర్యాదు మేరకు ఈ చర్యలు తీసుకున్నారు. ఈ కేసులో జగ్గారెడ్డిని ఏ1గా, కాంగ్రెస్ నాయకుడు అడ్డు అలియాస్ హమీద్‌ను ఏ2గా ఎఫ్ఐఆర్‌లో పేర్కొన్నారు. జగ్గారెడ్డిపై భారతీయ న్యాయ సంహిత (BNS) లోని 223, 351, 352, 132, 329, 191(2), 215(1)(b) వంటి పలు కఠిన సెక్షన్ల కింద కేసులు నమోదు చేశారు.

ఈ ఘటనపై జగ్గారెడ్డి స్పందిస్తూ ఒక ప్రెస్ నోట్ విడుదల చేశారు. నిన్నటి పోలింగ్ సమయంలో ఒక సీఐ (CI) తమ పార్టీ నాయకుడు హమీద్‌ను దుర్భాషలాడుతూ, గల్లా పట్టి ఈడ్చుకురావడంతోనే తాను అక్కడికి వెళ్లాల్సి వచ్చిందని ఆయన వివరణ ఇచ్చారు. తన పార్టీ నాయకుడిని రక్షించుకోవాల్సిన బాధ్యత తనపై ఉందని, అందుకే ఆ సీఐని తిట్టాల్సి వచ్చిందని ఆయన ఒప్పుకున్నారు. సదరు పోలీస్ అధికారి ప్రత్యర్థి పార్టీ అభ్యర్థికి మద్దతుగా వ్యవహరిస్తూ, లా అండ్ ఆర్డర్ దెబ్బతినేలా చేశారని ఆయన ఆరోపించారు. ఈ అంశంపై కోర్టులో ఎవరిది తప్పో, ఎవరిది ఒప్పో తేలుతుందని, ఎన్నికల నిబంధనల ప్రకారం తీసుకునే చర్యలను తాను స్వాగతిస్తానని పేర్కొన్నారు.

ఇదే క్రమంలో బీఆర్ఎస్ నాయకులు కేటీఆర్, హరీష్ రావులపై జగ్గారెడ్డి తీవ్ర స్థాయిలో విరుచుకుపడ్డారు. గతంలో వారు కూడా పోలీసు అధికారులను దుర్భాషలాడిన సందర్భాలు ఉన్నాయని, ఆ వీడియోలను ఇప్పుడు బయటపెడుతున్నానని ఆయన తెలిపారు. కేటీఆర్ ఒక పోలీస్ అధికారిని బహిరంగంగా తిట్టిన విషయాన్ని, అలాగే హరీష్ రావు పోలీసులను తన్నిన ఉదంతాలను ఆయన గుర్తు చేశారు. బీఆర్ఎస్ సోషల్ మీడియా ముందుగా తమ నాయకుల ప్రవర్తనపై సమాధానం చెప్పి, ఆ తర్వాతే తన గురించి మాట్లాడాలని ఆయన డిమాండ్ చేశారు.

ఈ వివాదంపై తెలంగాణ పోలీస్ వ్యవస్థ, ప్రజలు ఆలోచన చేయాలని జగ్గారెడ్డి కోరారు. నిన్న సాయంత్రానికే తాను ఈ విషయాన్ని వదిలేశానని, కానీ బీఆర్ఎస్ కావాలనే దీనిని రాజకీయం చేస్తోందని ఆయన ఆరోపించారు. ప్రస్తుతం సంగారెడ్డిలో ఈ ఉదంతం రాజకీయంగా పెద్ద చర్చకు దారితీసింది. ఎన్నికల అధికారులు నివేదిక ఆధారంగా తదుపరి చర్యలు తీసుకోనున్నారు.