ఎమ్మెల్యేనే మోసం చేసిన కేటుగాళ్లు.. రూ.10 లక్షల ఆశ చూపి లక్ష నొక్కేసిన కేటుగాడు!

Cyber Fraud: సైబర్ నేరగాళ్లు ఎంతటి వారినైనా బురిడీ కొట్టించగలరని నిరూపించే మరో ఘటన వెలుగులోకి వచ్చింది. సామాన్యులే కాదు, ప్రజా ప్రతినిధులు కూడా వీరి మాయలో పడుతుండటం గమనార్హం. జనగామ ఎమ్మెల్యే కూడా సైబర్ మోసానికి గురై లక్ష రూపాయలు కోల్పోయిన తీరు ఇప్పుడు హాట్ టాపిక్ గా మారింది.

పథకం ఏదైనా.. లక్ష్యం మాత్రం మీ డబ్బే!
సైబర్ కేటుగాళ్లు ఈసారి “వికసిత్ భారత్” అనే కేంద్ర ప్రభుత్వ పథకాన్ని ఆయుధంగా చేసుకున్నారు. జనగామ ఎమ్మెల్యేకి ఫోన్ చేసిన ఒక గుర్తు తెలియని వ్యక్తి, తాను ప్రభుత్వ అధికారిని అని నమ్మబలికాడు. వికసిత్ భారత్ పథకం కింద నిరుపేదలకు, అర్హులకు రూ. 10 లక్షల వరకు రుణాలు మంజూరు చేస్తున్నామని, మీ నియోజకవర్గంలోని అర్హుల జాబితా ఇస్తే వారికి ఈ లబ్ధి చేకూరుస్తామని మాయమాటలు చెప్పాడు. ప్రజా సేవలో భాగంగా తన నియోజకవర్గ ప్రజలకు మేలు జరుగుతుందన్న ఉద్దేశంతో ఎమ్మెల్యే ఆ ప్రతిపాదనకు అంగీకరించారు.

ప్రాసెసింగ్ ఫీజు పేరుతో పక్కా స్కెచ్
నమ్మకం కుదిరిన తర్వాత, సదరు కేటుగాడు తన అసలు రంగు బయటపెట్టాడు. రుణం పొందే ప్రతి అభ్యర్థి నుంచి రూ. 2,500 చొప్పున ప్రాసెసింగ్ ఫీజు చెల్లించాల్సి ఉంటుందని నిబంధన పెట్టాడు. మొత్తంగా 40 మందికి సంబంధించిన రూ. 1 లక్ష రూపాయలను తక్షణమే పంపాలని కోరాడు. అవతలి వ్యక్తి మాటలను నిజమని నమ్మిన ఎమ్మెల్యే, ఆలస్యం చేయకుండా ఫోన్ పే (PhonePe) ద్వారా లక్ష రూపాయలను నిందితుడు సూచించిన ఖాతాకు బదిలీ చేశారు.

అతి ఆశే కొంపముంచింది.. బయటపడ్డ బాగోతం!
లక్ష రూపాయలు అందిన తర్వాత కూడా సదరు మోసగాడి ఆశ తీరలేదు. మరోసారి ఫోన్ చేసి మరికొంత డబ్బు కావాలని డిమాండ్ చేయడంతో ఎమ్మెల్యేకు అనుమానం వచ్చింది. వెంటనే అప్రమత్తమై విచారించగా, అది ప్రభుత్వ పథకం కాదని, కేవలం తనను బురిడీ కొట్టించడానికి చేసిన ప్లాన్ అని అర్థమైంది. దీంతో తాను మోసపోయానని గ్రహించిన పల్లా, వెంటనే పోలీసులను ఆశ్రయించక తప్పలేదు.

రంగంలోకి దిగిన జూబ్లీహిల్స్ పోలీసులు
ఈ ఘటనపై ఎమ్మెల్యే హైదరాబాద్‌లోని జూబ్లీహిల్స్ పోలీస్ స్టేషన్‌లో ఫిర్యాదు చేశారు. కేసు నమోదు చేసుకున్న పోలీసులు దర్యాప్తును ముమ్మరం చేశారు. నిందితుడు వాడిన ఫోన్ నంబర్, బ్యాంక్ ఖాతా వివరాల ఆధారంగా అతడి ఆచూకీ కోసం గాలిస్తున్నారు. ఈ తరహా మోసాలు రోజురోజుకూ పెరిగిపోతున్నాయని, ఎంతటి వారైనా అపరిచిత వ్యక్తులకు డబ్బులు పంపే ముందు ఒకటికి రెండుసార్లు సరిచూసుకోవాలని పోలీసులు హెచ్చరిస్తున్నారు.

Also Read: ఏయూలో మెగా కల్చరల్ ఫెస్టివల్.. డిప్యూటీ సీఎం పవన్ కీలక వ్యాఖ్యలు, తనకు అర్హత లేదని వ్యాఖ్య

జాగ్రత్త.. అప్రమత్తతే రక్ష!
ప్రభుత్వ పథకాల పేరుతో వచ్చే ఫోన్ కాల్స్, మెసేజ్‌ల పట్ల ప్రజలు అత్యంత జాగ్రత్తగా ఉండాలి. ముఖ్యంగా ప్రాసెసింగ్ ఫీజులు, రిజిస్ట్రేషన్ చార్జీల పేరుతో ముందస్తుగా డబ్బులు అడిగితే అది కచ్చితంగా మోసమే అని గుర్తించాలి. ఎమ్మెల్యే స్థాయి వ్యక్తికే ఇలాంటి చేదు అనుభవం ఎదురైందంటే, సామాన్యులు ఎంత అప్రమత్తంగా ఉండాలో ఈ ఘటన స్పష్టం చేస్తోంది. డిజిటల్ లావాదేవీల విషయంలో అపరిచితులను నమ్మడం అంటే మన చేతులతో మనమే ఆపదను కొనితెచ్చుకోవడమే.

సైబర్ మోసగాళ్ల చేతిలో మోసపోయిన జనగామ ఎమ్మెల్యే

పల్లా రాజేశ్వర్ రెడ్డి నుంచి లక్ష రూపాయలు కాజేసిన కేటుగాడు

“వికసిత్ భారత్” పథకం పేరుతో నమ్మబలికిన నిందితుడు

అర్హుల జాబితా పంపిస్తే రూ.10 లక్షల రుణాలు అంటూ మోసం

ఒక్కొక్కరికి రూ.2,500 చొప్పున రూ. లక్ష ప్రాసెసింగ్ ఫీజు వసూలు

ఫోన్… pic.twitter.com/eJaB0s67rh

— BIG TV Breaking News (@bigtvtelugu) April 9, 2026