Hyderabad: వారెవ్వా.. హైదరాబాద్‌లో AI ఉపయోగించి పరీక్షల్లో కాపీయింగ్.. చివరకు సీన్ కట్ చేస్తే..?

హైదరాబాద్‌లోని గచ్చిబౌలిలో ఆర్టిఫిషియల్ ఇంటెలిజెన్స్ (AI) సాంకేతికతను ఉపయోగించి పరీక్షల్లో భారీ కాపీయింగ్‌కు పాల్పడిన ఘటన వెలుగులోకి వచ్చింది. సాంకేతిక పరిజ్ఞానాన్ని అడ్డుపెట్టుకుని అక్రమాలకు పాల్పడుతున్న హర్యానాకు చెందిన ఇద్దరు యువకులను గచ్చిబౌలి పోలీసులు అరెస్ట్ చేశారు. ఈ ఘటన విద్యా వర్గాల్లో, పోలీసు వర్గాల్లో తీవ్ర కలకలం రేపింది.

హెచ్‌సీయూలో ఘటన..

హైదరాబాద్ సెంట్రల్ యూనివర్సిటీ (HCU) ఇటీవల నాన్-టీచింగ్ ఉద్యోగాల భర్తీ కోసం నియామక పరీక్షను నిర్వహించింది. ఈ పరీక్షకు హాజరైన అభ్యర్థుల్లో హర్యానాకు చెందిన అనీల్, సతీష్ అనే ఇద్దరు యువకులు హైటెక్ పద్ధతిలో కాపీ కొట్టాలని పథకం వేశారు. సాధారణంగా జరిగే కాపీయింగ్ తరహాలో కాకుండా, వీరు ఏకంగా ఆర్టిఫిషియల్ ఇంటెలిజెన్స్‌ను రంగంలోకి దించారు.

ఏఐ (AI) తో మాస్టర్ ప్లాన్

నిందితులు తమ చొక్కా బటన్లకు అత్యంత సూక్ష్మమైన మైక్రో స్కానర్లను అమర్చుకున్నారు. పరీక్షా కేంద్రంలోకి వెళ్లిన తర్వాత, ఆ స్కానర్ల సాయంతో ప్రశ్నపత్రాన్ని స్కాన్ చేశారు. ఈ చిత్రాలను బయట ఉన్న తమ నెట్‌వర్క్‌కు లేదా ఏఐ సాఫ్ట్‌వేర్‌కు చేరవేశారు. పరీక్షా సమయంలో నిందితులు తరచూ బాత్‌రూమ్‌కు వెళ్తూ, అక్కడ ఏఐ సాయంతో సేకరించిన సమాధానాలను తెలుసుకునేవారు. తమ చెవిలో పెట్టుకున్న అతి చిన్న బ్లూటూత్ పరికరాల ద్వారా అవతలి వైపు నుంచి వస్తున్న జవాబులను వింటూ పరీక్ష పత్రంలో రాశారు.

ఎంత పక్కాగా ప్లాన్ చేసినా.. ఒక చిన్న పొరపాటు నిందితులను పట్టించింది. అనీల్ పరీక్ష రాస్తుండగా.. అతని చెవిలో ఉన్న బ్లూటూత్ పరికరం నుంచి అకస్మాత్తుగా బీప్ అనే శబ్దం వచ్చింది. ఆ వింత శబ్దాన్ని గమనించిన ఇన్విజిలేటర్‌కు అనుమానం వచ్చి అతడిని క్షుణ్ణంగా తనిఖీ చేశారు. ఆ తనిఖీల్లో చొక్కా బటన్ల వెనుక దాగి ఉన్న మైక్రో స్కానర్లు, చెవిలోని బ్లూటూత్ పరికరాలు బయటపడటంతో అధికారులు విస్తుపోయారు.

పోలీసుల చర్యలు

యూనివర్సిటీ అధికారులు వెంటనే పోలీసులకు సమాచారం అందించారు. రంగంలోకి దిగిన గచ్చిబౌలి పోలీసులు నిందితులు అనీల్, సతీష్‌లను అదుపులోకి తీసుకున్నారు. వారి వద్ద ఉన్న హైటెక్ పరికరాలను, స్కానర్లను స్వాధీనం చేసుకున్నారు. నిరుద్యోగుల భవిష్యత్తుతో ఆడుకుంటూ.. సాంకేతికతను దుర్వినియోగం చేస్తున్న ఇలాంటి ముఠాల వెనుక ఇంకా ఎవరైనా ఉన్నారా అనే కోణంలో పోలీసులు విచారణ జరుపుతున్నారు. ఈ ఘటన నేపథ్యంలో పరీక్షా కేంద్రాల వద్ద నిఘాను మరింత కఠినతరం చేయాలని అధికారులు భావిస్తున్నారు.

ALSO READ: Bhadradri District: అక్షరాల రూ.98లక్షల విలువైన గంజాయి.. కంటైనర్‌లో తీసుకెళ్తుండగా, పోలీసులు ఎంటర్..!