సీఎం రేవంత్‌కు పాలాభిషేకాలు చేయాల్సిందే.. TGPSC ప్రకటనపై చనగాని దయాకర్!

Chanagani Dayakar: టీపీసీసీ జనరల్ సెక్రటరీ చనగాని దయాకర్ తెలంగాణ రాష్ట్ర ఆవిర్భావ దినోత్సవం సందర్భంగా నిరుద్యోగ యువతకు ఉద్యోగాల కల్పనపై కీలక వ్యాఖ్యలు చేశారు. సీఎం రేవంత్ రెడ్డి నేతృత్వంలోని కాంగ్రెస్ ప్రభుత్వం నిరుద్యోగుల సంక్షేమమే ధ్యేయంగా ముందుకు సాగుతోందని ఆయన కొనియాడారు. ఈ మేరకు ఆయన పత్రికా ప్రకటన విడుదల చేశారు.

ఏడాదిలోనే 60 వేల ఉద్యోగాల భర్తీ

రాష్ట్రంలో ప్రజా పాలన వచ్చిన తర్వాతే నిరుద్యోగులకు నిజమైన న్యాయం జరుగుతోందని చనగాని దయాకర్ అన్నారు. మాటల్లో కాకుండా చేతల్లో చూపిస్తూ, కేవలం ఏడాది కాలంలోనే రేవంత్ రెడ్డి సర్కార్ 60 వేల ఉద్యోగాలను భర్తీ చేసి రికార్డు సృష్టించిందని గుర్తుచేశారు. తాజాగా ఉద్యోగాల భర్తీ ప్రక్రియపై TGPSC (తెలంగాణ పబ్లిక్ సర్వీస్ కమిషన్) స్పష్టమైన ప్రకటన చేయడాన్ని ఆయన హృదయపూర్వకంగా స్వాగతించారు.

బీఆర్ఎస్ విష ప్రచారాలకు చెక్

గత ప్రభుత్వం, బీఆర్ఎస్ నాయకులు నిరుద్యోగులను తప్పుదోవ పట్టించేలా ఎన్నో విష ప్రచారాలు చేశారని దయాకర్ మండిపడ్డారు. అయితే, తెలంగాణ యువత వాస్తవాలను గ్రహించి, ఆ ఆపప్రచారాలను తిప్పికొట్టిందని స్పష్టం చేశారు. సీఎం రేవంత్ రెడ్డి నిరుద్యోగుల పాలిట ఆశాదీపంగా మారారని, ఈ సంతోష సమయంలో యువత అంతా ఆయనకు పాలాభిషేకాలు చేసి తమ కృతజ్ఞతలు చాటుకోవాలని పిలుపునిచ్చారు.

యువత భవిష్యత్తే లక్ష్యంగా పాలన

ముఖ్యమంత్రి రేవంత్ రెడ్డి ఆలోచనలన్నీ యువత భవిష్యత్తు చుట్టూనే ఉంటాయని దయాకర్ పేర్కొన్నారు. విద్యా రంగంలో సంస్కరణలు, ఉపాధి అవకాశాల పెంపు, ఉద్యోగాల కల్పన అనే మూడు సూత్రాల లక్ష్యంగా ప్రస్తుత ప్రభుత్వం శ్రమిస్తోందని, రాబోయే రోజుల్లో మరిన్ని నోటిఫికేషన్లతో తెలంగాణ యువతకు ఉద్యోగ భద్రత కల్పిస్తామని ఆయన ఆశాభావం వ్యక్తం చేశారు.

Also Read: కాంగ్రెస్ ఎస్సీ విభాగం విస్తృత స్థాయి సమావేశం.. ఎస్సీ నాయకులకు టీపీసీసీ చీఫ్ దిశానిర్దేశం!