Begumpet SKAT Air Show: హైదరాబాద్ ఆకాశంలో అబ్బురపరిచే విన్యాసాలు.. డేట్ సేవ్ చేసుకోండి

Begumpet SKAT Air Show: హైదరాబాద్ అద్భుతమైన వైమానిక విన్యాసాలకు సిద్ధమైంది. వింగ్స్ ఇండియా 2026లో భాగంగా జనవరి 28, 29 తేదీల్లో బేగంపేట విమానాశ్రయంలో ఇండియన్ ఎయిర్ ఫోర్స్ కు చెందిన సూర్యకిరణ్ ఏరోబాటిక్ టీమ్ (SKAT) వైమానిక విన్యాసాలు ప్రదర్శించనుంది. సూర్యకిరణ్ ఏరోబాటిక్ టీమ్ ఈ మేరకు షెడ్యూల్ విడుదల చేసింది.

అబ్బురపరిచే విన్యాసాలు

ఇప్పటికే సూర్యకిరణ్ టీమ్ ముమ్మరంగా ప్రాక్టీస్ చేస్తున్న వీడియోలను సోషల్ మీడియాలో పోస్టు చేసింది. వరుసగా రెండు రోజులు జరిగే ఈ విన్యాసాలను వీక్షించేందుకు పెద్ద సంఖ్యలో జనం వస్తుంటారు. వింగ్స్ ఇండియా హైదరాబాద్ లో.. హై-ప్రొఫైల్ వైమానిక ప్రదర్శనలను ఏటా నిర్వహిస్తుంటుంది.

1966లో ఏర్పడిన సూర్యకిరణ్ ఏరోబాటిక్ బృందం.. ఇండియన్ ఎయిర్ ఫోర్స్ రాయబారులుగా ప్రసిద్ధి చెందింది. బీదర్ ఎయిర్ ఫోర్స్ స్టేషన్‌ చెందిన ఈ టీమ్ BAE హాక్ Mk.132 విమానాలను నడుపుతుంది. ఈ యూనిట్‌లో 13 మంది పైలట్లు ఉన్నారు. 9 మంది ఈ ప్రదర్శనలో పాల్గొంటారు. దశాబ్దాలుగా.. ఈ టీమ్ ఏరోబాటిక్ విన్యాసాలు చేస్తూ ప్రశంసలు అందుకుంది.

బేగంపేట ఎయిర్ పోర్టులో ఎయిర్ షో

వింగ్స్ ఇండియా బేగంపేట ఎయిర్ పోర్టులో నిర్వహించే ఈ ఎయిర్ షో ఆసియాలోనే అతిపెద్ద ఈవెంట్ గా పరిగణిస్తారు. పౌర విమానయాన మంత్రిత్వ శాఖ నిర్వహించిన ఈ ఎయిర్ షోను 2008లో ప్రారంభించారు. వింగ్స్ ఇండియా 2024లో.. భారత వైమానిక దళానికి చెందిన సారంగ్ హెలికాప్టర్ టీమ్ ఈ ప్రదర్శనలో అద్భుతమైన విన్యాసాలతో ప్రేక్షకులను ఆకట్టుకుంది. వింగ్స్ ఇండియా 2026 ఎడిషన్ ను దేశంలోని వివిధ ప్రాంతాల్లో జనవరి 28 నుంచి 31 వరకు నిర్వహిస్తారు.

Also Read: హైదరాబాద్‌లో ముస్తాబవుతున్న చెరువులు.. సంక్రాంతికి అంతా సిద్దం!

మే 2025లో జరిగిన కర్టెన్ రైజర్ ఈవెంట్ లో కేంద్ర పౌర విమానయాన మంత్రి రామ్ మోహన్ నాయుడు వింగ్స్ ఇండియా 2026 థీమ్‌ను ఆవిష్కరించారు. “భారత విమానయానం: డిజైన్ నుండి విస్తరణ వరకు, తయారీ నుండి నిర్వహణ వరకు, ఆవిష్కరణకు, భద్రత నుండి స్థిరత్వం వరకు భవిష్యత్తును సుగమం చేయడం” అని ప్రకటించారు.