షాకింగ్ రివ్యూ: రాకాస హిట్టా ? ఫట్టా? కానీ లాజిక్ ఎక్కడ?

Rakasa Review: ఈ వారం థియేటర్లలోకి ‘రాకాస’ (Rakasa) రూపంలో ఒక అసలు సిసలు ‘చందమామ కథ’ వచ్చేసింది. నిహారిక కొణిదెల నిర్మాణంలో, సంగీత్ శోభన్ హీరోగా వచ్చిన ఈ సోషియో ఫాంటసీ సినిమా బాక్సాఫీస్ దగ్గర ఎలాంటి రచ్చ చేస్తోంది? ముసుగులు తీసి అసలు మ్యాటర్ మాట్లాడుకుందాం.. మొహమాటాలు అస్సలే లేవు.. ఇక రివ్యూ చూసేద్దామా మరి..

కథ

అమెరికా నుంచి తన ప్రియురాలు సుకన్య కోసం ఊరికి వచ్చిన వీరబాబు అలియాస్ ఈరబాబు (సంగీత్ శోభన్), అక్కడ పరిస్థితుల వల్ల సుబ్బలక్ష్మి (నయన్ సారిక) ప్రేమలో పడతాడు. అయితే, ఊహించని విధంగా ఒక హత్య కేసులో ఇరుక్కున్న ఈరబాబుకు గ్రామస్తులు ఒక విచిత్రమైన శిక్ష వేస్తారు. ‘రాక్షసుడు ఉన్నాడని అందరూ నమ్మే’ ఒక పాత కోటలోకి అతడిని పంపిస్తారు. ఆ కోటలో నిజంగా రాక్షసుడు ఉన్నాడా? అసలు ఆ కోట వెనుక ఉన్న రహస్యం ఏంటి? ఈరబాబు ఆ గండం నుంచి ఎలా బయటపడ్డాడు? అనేదే ఈ ‘రాకాస’ కథ. విఠలాచార్య సినిమాల తరహాలో సాగే ఈ సోషియో ఫాంటసీ డ్రామాలో కామెడీ మస్తుగా ఉంది!

విశ్లేషణ

సినిమాకి అసలైన బలం సంగీత్ శోభన్ పెర్ఫార్మెన్స్! తన టైమింగ్‌తో సినిమాని భుజాల మీద వేసుకుని నడిపించాడు. ఫస్టాఫ్‌లో గెటప్ శ్రీనుతో, సెకండాఫ్‌లో వెన్నెల కిషోర్‌తో వచ్చే సీన్లు థియేటర్లో ఆడియన్స్‌ని నవ్వుల్లో ముంచెత్తుతాయి. ముఖ్యంగా వెన్నెల కిషోర్ – సంగీత్ కాంబో సీన్స్ సినిమాకి మేజర్ అసెట్. దర్శకురాలు మానస శర్మ పాత కథనే కొత్తగా, ఫాస్ట్ స్క్రీన్ ప్లేతో చూపించిన తీరు బాగుంది. ఎక్కడా బోర్ కొట్టకుండా జాగ్రత్త పడ్డారు. అనుదీప్ దేవ్ మ్యూజిక్ సినిమాకి బ్యాక్ బోన్ లా నిలిస్తే, రాజు ఎదురోలు సినిమాటోగ్రఫీ ఆ కోట వాతావరణాన్ని చాలా లైవ్లీగా, కలర్ ఫుల్ గా చూపించింది. నిహారిక కొణిదెల ప్యాషన్ ప్రతి ఫ్రేమ్ లోనూ కనిపిస్తోంది. పింక్ ఎలిఫెంట్ బ్యానర్ మేకింగ్ వాల్యూస్ సినిమా స్థాయిని పెంచాయి.

సినిమాలో కామెడీ పండినా, కొన్ని విషయాల్లో మాత్రం పాత వాసన కనిపిస్తుంది. కథ పరంగా చూస్తే ఇది మనం చిన్నప్పుడు విన్న చందమామ కథల తరహాలోనే ఉంటుంది. కథలో పెద్దగా ట్విస్టులు ఏమీ లేవు. ఇది ఒక ఫాంటసీ సినిమా కాబట్టి, బుర్రకు పని చెప్పకుండా, లాజిక్స్ వెతక్కుండా చూస్తేనే ఎంజాయ్ చేయగలరు. కొన్ని సీన్లు మరీ సినిమాటిక్ గా అనిపిస్తాయి. సెకండాఫ్ సినిమాకి ప్రాణం పోసినా, ముగింపు ఎలా ఉంటుందనేది సగటు ప్రేక్షకుడు ఈజీగా గెస్ చేయొచ్చు.