సుమంత్ ప్రభాస్ ‘గోదారి గట్టుపైన’ చేసిన హంగామా ప్రేక్షకులను మెప్పించిందా?..

Godari Gattupaina Review: గోదావరి నేపథ్యం అంటేనే పచ్చని ప్రకృతితో పాటు గుండెల్ని పిండేసే ఎమోషన్స్ ఆశిస్తాం. ‘మేమ్ ఫేమస్’ సినిమాతో తనకంటూ ఒక స్టైల్ క్రియేట్ చేసుకున్న సుమంత్ ప్రభాస్ హీరోగా, సీనియర్ నటుడు జగపతి బాబు ప్రధాన పాత్రలో నటించిన చిత్రం ‘గోదారి గట్టుపైన’. మరి ఈ సినిమా ప్రేక్షకులను ఎంతవరకు ఆకట్టుకుందో చూద్దాం.

స్టోరీ ఏంటంటే..

శ్యామ్ బాబు (జగపతి బాబు) తన కూతురు మాయ (నిధి ప్రదీప్)ను ప్రాణంగా ప్రేమిస్తాడు. ఆమె అడిగిందల్లా చేస్తూ మహారాణిలా చూసుకుంటాడు. అదే ఊరిలో ఆటో నడుపుకునే కుర్రాడు రాజు (సుమంత్ ప్రభాస్)తో మాయ ప్రేమలో పడుతుంది. అయితే, తన తండ్రి తనపై ఉంచిన గౌరవాన్ని, నమ్మకాన్ని పోగొట్టుకోకూడదని మాయ తన ప్రేమకు దూరంగా ఉంటుంది. ఈ తండ్రీకూతుళ్ల సెంటిమెంట్ మధ్యలో ఆటో రాజు ప్రేమ కథ ఏ తీరానికి చేరిందనేదే ఈ చిత్ర కథాంశం.

విశ్లేషణ

దర్శకుడు సుభాష్ చంద్ర ఎంచుకున్న పాయింట్ చాలా పాతది. ఒకప్పుడు మనం పదే పదే చూసిన తండ్రీకూతుళ్ల సెంటిమెంట్ డ్రామానే మరోసారి గుర్తుకు తెస్తుంది. పాయింట్ పాతదైనా, కనీసం స్క్రీన్ ప్లే లోనైనా కొత్తదనం చూపిస్తారేమో అని ఆశిస్తే నిరాశే ఎదురవుతుంది. సినిమా ప్రారంభమైన కాసేపటికే తర్వాత ఏం జరుగుతుందో ప్రేక్షకుడు ఈజీగా ఊహించేయవచ్చు. ముఖ్యంగా సెకండాఫ్ లో సాగదీత ఎక్కువగా అనిపిస్తుంది. దర్శకుడు రాసుకున్న ట్విస్టులు ప్రభావం చూపించలేకపోయాయి. ప్రధాన పాత్రల మధ్య ఎమోషనల్ కనెక్టివిటీ మిస్ అవ్వడం సినిమాకు పెద్ద దెబ్బ. సుమంత్ ప్రభాస్ తన మార్క్ ఎనర్జీతో సినిమాను నిలబెట్టే ప్రయత్నం చేశాడు కానీ అది ఎంత వరకూ పండిందో ప్రేక్షకుడే నిర్ణయించాలి. ఇక ఫస్టాఫ్ లో వచ్చే సుదర్శన్ కామెడీ అక్కడక్కడా నవ్విస్తుంది. జగపతి బాబు తన పరిధి మేర పాత్రకు న్యాయం చేశారు.

సాంకేతికంగా..

టెక్నికల్ గా సినిమా యావరేజ్ గానే ఉంది. సంగీతం పెద్దగా ఆకట్టుకోదు, పాటలు గుర్తుపెట్టుకునేలా లేవు. నేపథ్య సంగీతం కూడా పాత సినిమాలను గుర్తుకు తెస్తుంది. అయితే గోదావరి అందాలను చూపించిన విధానం బాగుంది. ఎడిటింగ్ పై ఇంకాస్త దృష్టి పెట్టి ఉంటే సెకండాఫ్ లోని బోరింగ్ సీన్లను తగ్గించవచ్చు.