‘సతీ లీలావతి’గా లావణ్య త్రిపాఠి ఎలా చేసిందంటే?.. ఫుల్ రివ్యూ..

Sathi Leelavathi Review : లావణ్య త్రిపాఠి ప్రధాన పాత్రలో నటించిన ‘సతీ లీలావతి’ ఒక మిస్టరీ థ్రిల్లర్. పెళ్లి తర్వాత కొన్ని సెలెక్టివ్ సినిమాలకు మాత్రమే పరిమితమైన ఈ అందాల రాక్షసి ‘సతీ లీలావతి’ అంటూ ప్రేక్షకుల ముందుకు వచ్చేశారు. అయితే ఈ సినిమా ఫుల్ రివ్యూ ఎలా ఉందో ఇక్కడ చూసేద్దామా..

కథ ఏంటంటే..

లీలావతి (లావణ్య త్రిపాఠి) ఒక సక్సెస్‌ఫుల్ సినిమా డైరెక్టర్. తన భర్త రామ్ సేతు (దేవ్ మోహన్) అంటే ఆమెకు ప్రాణం. అయితే, రామ్ సేతు మాత్రం నికోలా (మడోన్నా సెబాస్టియన్) అనే మరో అమ్మాయితో ప్రేమలో పడతాడు. అంతేకాదు, లీలావతికి విడాకులు ఇచ్చి నికోలాను పెళ్లి చేసుకోవాలని నిర్ణయించుకుంటాడు. తన భర్తను ఎలాగైనా తన దారికి తెచ్చుకోవాలని లీలావతి ఒక వినూత్నమైన ప్లాన్ వేస్తుంది. అసలు ఆ ప్లాన్ ఏంటి, దాని వల్ల మళ్లీ తన భర్తను దక్కించుకుందా అన్నది అసలు కథ. అది ఏంటో తెలియాలి అంటే సినిమా చూడాల్సిందే..

నటీనటులు..

లావణ్య త్రిపాఠి తన కెరీర్‌లోనే విభిన్నమైన పాత్రలో కనిపించింది. లీలావతిగా ఆమె నటన ప్రేక్షకులను మెప్పిస్తుంది. భర్తను కాపాడుకోవాలనే తపన ఉన్న భార్యగా ఎమోషన్స్‌ను బాగా పండించింది. నరేష్ తన అనుభవంతో మెప్పించగా, సప్తగిరి అక్కడక్కడా నవ్వించే ప్రయత్నం చేశాడు. దేవ్ మోహన్, మడోన్నా వీరిద్దరూ తమ పాత్రల పరిధి మేరకు నటించినప్పటికీ, వారి పాత్రల చిత్రీకరణ అంత బలంగా లేదు.

విశ్లేషణ

సినిమాటోగ్రఫీ రిచ్‌గా ఉంది. ఇల్లు పరిసరాలను అందంగా చూపించారు. అయితే, సినిమాకు ప్రధాన బలహీనత ఎడిటింగ్, స్క్రీన్ ప్లే. కథలో వేగం లేదు. ముఖ్యంగా డబ్బింగ్ విషయంలో చాలా అశ్రద్ధ వహించినట్లు కనిపిస్తుంది. ఇది ప్రేక్షకులకు సినిమాపై ఆసక్తిని తగ్గిస్తుంది. సంగీతం పరంగా మిక్కీ జే మేయర్ కూడా అంతగా ఆకట్టుకోలేదు. ఎన్నో హిట్ సినిమాలను అందించిన మిక్కీ జే మేయర్ ఈ సినిమాకు తగిన న్యాయం చేయలేకపోయారు.

దర్శకుడు కామెడీ ఎంటర్టైనర్‌గా దీన్ని మలచాలని చూసినా, సన్నివేశాల్లో బలం లేకపోవడంతో అది సాధ్యపడలేదు. భార్యాభర్తల మధ్య ఉండాల్సిన ఎమోషన్ చాలా తక్కువగా ఉంది. సినిమా ప్రథమార్ధం పర్వాలేదనిపించినా, ద్వితీయార్ధం మాత్రం మరీ సాగదీసినట్లు అనిపిస్తుంది. క్లైమాక్స్ కూడా ఊహించిన విధంగానే ఉంటుంది. పవన్ కళ్యాణ్ మేనరిజమ్స్, రిఫరెన్స్‌లను వాడి మెగా అభిమానులను అలరించే ప్రయత్నం చేశారు. అవి ఎంతవరకూ సినిమాకు ప్లస్ అవుతాయే మున్ముందు చూడాలి మరి.. మొత్తానికి ‘సతీ లీలావతి’ ఒక సాధారణ ఫ్యామిలీ డ్రామా. కథలో కొత్తదనం ఉన్నా, కథనంలో పట్టు లేకపోవడం వల్ల ఆశించిన ఫలితాన్ని ఇవ్వలేదని చెప్పవచ్చు.