The Rip ott : వాస్తవ సంఘటనల ఆధారంగా రూపొందిన కాప్ థ్రిల్లర్… ఊహించని ట్విస్టులు టర్నులు

The Rip ott : రీసెంట్ గా ఓ యాక్షన్ థ్రిల్లర్ మూవీ ఓటీటీలోకి వచ్చింది. అయితే ఇది స్ట్రీమింగ్ అయిన వెంటనే టాప్ 10 లో ట్రెండింగ్ అవుతోంది. సినిమా కథ చివరి వరకు మిమ్మల్ని కట్టిపడేస్తుంది. క్లైమాక్స్ అయితే ఎవరూ ఊహించనిదిగా ఉంటుంది. ఈ సినిమా కథ నిజమైన సంఘటనల ఆధారంగా తెరకెక్కింది. 20 మిలియన్ డాలర్ల నగదు చుట్టూ కథ తిరుగుతుంది. దీని పేరు, ఏ ఓటీటీలో ఉంది ? అనే వివరాల్లోకి వెళ్తే …

నెట్ ఫ్లిక్స్ లో స్ట్రీమింగ్

జో కార్నహన్ దర్శకత్వం వహించిన ఈ యాక్షన్ థ్రిల్లర్ మూవీ పేరు ‘ది రిప్’ (The Rip). ఈ అమెరికన్ కాప్ థ్రిల్లర్ లో మాట్ డామన్, బెన్ అఫ్లెక్, సాషా కాలే, స్కాట్ ఐకిన్స్, టెయానా టేలర్, స్టీవెన్ యూన్, లూసియానా బారోసో నటించారు. 1 గంట 52 నిమిషాల థ్రిల్లర్ డబ్బు, అవినీతి, మోసం చుట్టూ తిరుగుతుంది. ఈ చిత్రం 2026 జనవరి 16 నుంచి నెట్ ఫ్లిక్స్ లో స్ట్రీమింగ్ అవుతోంది. ఈ సినిమా ఇంగ్లీష్‌తో పాటు తెలుగు, హిందీ, తమిళం భాషల్లో కూడా అందుబాటులో ఉంది.

స్టోరీ ఏమిటంటే

ఈ సినిమా కథ ఒక స్పెషల్ పోలీసు టీం చుట్టూ తిరుగుతుంది. అయితే ఆ టీమ్ కెప్టెన్ జాకీ వెలెజ్ కథ మొదలయ్యే మొందే హత్యకు గురవుతుంది. ఆమె మరణం వెనుక ఆమె సొంత టీం వాళ్ళే ఉండవచ్చని ఎఫ్‌బీఐ అనుమానిస్తుంది. ఈ క్రమంలో లెఫ్టినెంట్ డేన్ డుమర్స్, అతని ప్రాణస్నేహితుడు జె.డి. బైర్న్ విచారణను ఎదుర్కోవాల్సి వస్తుంది. నిజానికి కెప్టెన్ చనిపోవడానికి ముందు డుమర్స్‌కు ఒక అడ్రస్ పంపిస్తుంది. అక్కడ డ్రగ్ కార్టెల్‌కు చెందిన భారీ మొత్తంలో డబ్బు ఉందని భావించిన డుమర్స్, తన టీమ్ సభ్యులను తీసుకుని ఆ ఇంటిపై రైడ్ చేస్తాడు. అక్కడ వాళ్ళకి ఎవరూ ఊహించని విధంగా సుమారు 20 మిలియన్ డాలర్ల నగదు దొరుకుతుంది.

ఆ భారీ నగదును చూడగానే టీమ్ మధ్య అత్యాశ, అనుమానాలు మొదలవుతాయి. డుమర్స్ తన పై అధికారులకు సమాచారం ఇవ్వకుండా, టీమ్ సభ్యుల ఫోన్లను లాగేసుకుని డబ్బును లెక్కించమని ఆదేశిస్తాడు. అతని ప్రవర్తన టీమ్‌లో గందరగోళాన్ని సృష్టిస్తుంది. ఆ ఇంట్లో నివసించే డెసీ అనే యువతి ఈ పోలీసులను దొంగ పోలీసులు గా అనుమానిస్తుంది. బయట నుండి ఒక పక్క కార్టెల్ సభ్యులు దాడులు చేస్తుండగా, టీమ్ లోపల కూడా ఒకరినొకరు చంపుకునే స్థితికి చేరుకుంటారు. ఇక సినిమా చివరలో అసలు ద్రోహి ఎవరనేది బయటపడుతుంది.