తల్లి టూర్లో, తండ్రికి చుక్కలు చూపించే పిల్లలు… పర్ఫెక్ట్ ఫ్యామిలీ ఎంటర్టైనర్

Family Drama : ఎవరు చేయాల్సిన పని వాళ్ళు చేస్తేనే బాగుంటుంది. ముఖ్యంగా ఆడవాళ్ళు ఇంటిని చక్కదిద్దితే, మగవాళ్ళు సంపాదించడం. ఇప్పుడు ఇద్దరూ సంపాదిస్తున్నారు అనుకోండి. అది వేరే సంగతి. కానీ ‘జంబలకిడిపంబ’ వంటి తెలుగు సినిమాలలో చూపించినట్టు ఆడవాళ్ళ పనులు మగవాళ్ళు, మగవాళ్ళ పనులు ఆడవాళ్ళు చేస్తే… అలాంటి కథతో రూపొందిన మూవీనే ‘ది బ్రెడ్‌విన్నర్’ (The Breadwinner 2026). మరి ఈ సినిమాను ఏ ఓటీటీలో చూడవచ్చు ? కథ ఏంటి ? అన్న విషయాలను తెలుసుకుందాం.

కథలోకి వెళ్తే…

కథలో హీరో పేరు నేట్ విల్కాక్స్. అతను సేల్స్‌మన్. అతని భార్య కేటీ ముగ్గురు ఆడపిల్లలను చూసుకుంటూ ఇల్లాలుగా ఉంటుంది. ఇంట్లోని పనులన్నీ కేటీనే చూసుకోవడం వల్ల ఇల్లు ఎప్పుడూ పద్ధతిగా సాగుతుంది. కానీ కేటీ సొంత ఆలోచనతో ఇంటికి సంబంధించి ఒక వస్తువును ఆవిష్కరిస్తుంది. ఆమె ఐడియా నచ్చి ప్రముఖ బిజినెస్ షో ‘షార్క్ ట్యాంక్’లో భారీ డీల్ దక్కుతుంది. దీనివల్ల కేటీ తన బిజినెస్ పని మీద నెల రోజుల పాటు బిజినెస్ ట్రిప్‌కు వెళ్లాల్సి వస్తుంది.

అప్పటి వరకు కేవలం సంపాదన మాత్రమే చూసుకున్న నేట్, ఇప్పుడు మొదటిసారిగా ఇంట్లో ఉండి ముగ్గురు పిల్లల బాధ్యతలను చూసుకోవాల్సి వస్తుంది. వాషింగ్ మెషీన్ ఎలా వాడాలో, గుడ్డు ఎలా ఉడకబెట్టాలో కూడా తెలియని నేట్ ఇల్లు మెయింటెన్ చేయడానికి తీవ్రంగా ఇబ్బంది పడతాడు. పిల్లలు కూడా తమ తండ్రి అమాయకత్వాన్ని చూసి ఆటపట్టిస్తుంటారు. ఒకానొక దశలో ఇల్లు మొత్తం చిందరవందరగా మారిపోతుంది. నేట్ ముగ్గురు కూతుళ్ల స్కూల్ టైమింగ్స్, వారి హోంవర్క్‌లు, రొటీన్ పనులను సరిగ్గా నిర్వహించలేక చేతులెత్తేస్తాడు.

కానీ క్రమంగా అతను తన కొత్త బాధ్యతలను అర్థం చేసుకుంటాడు. ఇల్లాలుగా ఇల్లు నడపడం ఆఫీస్ పని కంటే ఎంత కష్టమో నేట్ గ్రహిస్తాడు. చివరికి తన కూతుళ్ల సహాయంతో, అమ్మ పద్ధతిలో కాకపోయినా తనదైన ‘డాడ్ స్టైల్’లో ఇంటిని, పిల్లలను మేనేజ్ చేసి భార్యకు సర్‌ప్రైజ్ ఇస్తాడు. ఇవన్నీ భార్య చేతుల్లో ఉంటే సులభంగా అనిపిస్తాయి. కానీ ఆ బాధ్యతలు తండ్రి భుజాల మీద పడితే ఏం జరుగుతుంది ? అన్న విషయం తెలుసుకోవాలంటే ఈ సినిమాను చూడాల్సిందే.

మూడు ఓటీటీలలో స్ట్రీమింగ్

హాలీవుడ్ ఫ్యామిలీ కామెడీ డ్రామా ‘ది బ్రెడ్ విన్నర్’. విల్ ఫెర్రెల్ ఫేమ్ నేట్ బార్గట్జే ప్రధాన పాత్రలో నటించిన ఈ సినిమా మే 29న థియేటర్లలో విడుదలైంది. కుటుంబ బాధ్యతలు, భర్త-భార్యల సమానత్వం, పిల్లల పెంపకం గురించి ఆలోచింపజేసే చిత్రం ఇది. ఈ సినిమా ప్రస్తుతం అమెజాన్ ప్రైమ్ వీడియో, Google Play, YouTubeలలో రెంట్ విధానంలో అందుబాటులో ఉంది. తెలుగు డబ్బింగ్ అందుబాటులో లేదు.