Political Thriller OTT : దేశం కోసం ప్రాణాలకు తెగించే టీచర్ … యూత్ చూడాల్సిన పొలిటికల్ థ్రిల్లర్

Political Thriller OTT : ఎలక్షన్లు వచ్చాయంటే పరిస్థితి మామూలుగా ఉండదు. ప్రచారాలు, హంగామాలు, ఆర్భాటాలు, ఓట్లకు డబ్బులు ఇదంతా ఒక రణరంగంలో సాగుతూ ఉంటుంది. అయితే ఓటింగ్ అయిన తర్వాత బ్యాలెట్ బాక్స్ లను భద్రపరచడం కూడా కత్తి మీద సామే. ఇక ఈ నేపథ్యంలో ఒక మూవీ అందర్నీ ఆశ్చర్యపరిచేలా చేసింది. గెలవడానికి ఎంత దాకా అయినా వెళ్లే నరరూప రాక్షసుల మధ్య ఒక టీచర్ చిక్కుకుంటుంది. అక్కడ బ్యాలెట్ బాక్స్ ను ఆ దుర్మార్గుల చేతికి చిక్కకుండా కాపాడే ప్రయత్నంలో ఈ స్టోరీ సాగుతుంది. ఇక ఎన్నికల సమయంలో టీచర్లు పడే కష్టాలను ఈ సినిమా కళ్లకు కట్టినట్లు చూపిస్తుంది.

నెట్‌ఫ్లిక్స్ (Netflix) లో స్ట్రీమింగ్

ఈ ఫిలిప్పీన్ పొలిటికల్ థ్రిల్లర్ సినిమా పేరు ‘బలోటా’ (Balota). 2024లో వచ్చిన ఈ సినిమాకు కిప్ ఓబండా దర్శకత్వం వహించారు. ప్రముఖ ఫిలిప్పీన్ నటి మరియన్ రివెరా, ఈ చిత్రంలో టీచర్ ఎమ్మీ పాత్రలో నటించారు. ఈమె నటనకు గాను సినిమలయా (Cinemalaya) ఫిల్మ్ ఫెస్టివల్‌లో ఉత్తమ నటి అవార్డు లభించింది. ఇది ఆగస్టు 2024లో ఫిలిప్పీన్స్‌లో విడుదలై విమర్శకుల ప్రశంసలు అందుకుంది. ప్రస్తుతం ఈ సినిమా నెట్‌ఫ్లిక్స్ (Netflix) లో అందుబాటులో ఉంది.

స్టోరీ ఏమిటంటే

ఈ కథ అంతా ఒక చిన్న ఊరిలో జరిగే లోకల్ ఎలక్షన్ల చుట్టూ తిరుగుతుంది. ఇద్దరు రాజకీయ నాయకులు మేయర్ సీటు కోసం కొట్టుకుంటూ ఉంటారు. ఆ ఊర్లో ఓట్లు వేయడం అంటే సామాన్యమైన విషయం కాదు, అంతా రౌడీయిజం, పైసల పంపిణీ, వెన్నుపోట్లు నడుస్తుంటాయి. సరిగ్గా ఓట్ల లెక్కింపు టైమ్‌లో గొడవ ముదిరిపోయి, ఒక వర్గం వాళ్లు బ్యాలెట్ బాక్సులను ఎత్తుకెళ్లడానికి ప్లాన్ చేస్తారు. ఈ గొడవ మధ్యలో టీచర్ ఎమ్మీ చిక్కుకుపోతుంది. తను ఎలక్షన్ డ్యూటీలో ఉన్న సిన్సియర్ టీచర్. బ్యాలెట్ బాక్సును దొంగలించకుండా కాపాడాలని ఎమ్మీ డిసైడ్ అవుతుంది.

ఇక ఆ బాక్సును పట్టుకుని ప్రాణాలకు తెగించి అడవిలోకి పారిపోతుంది. వెనకాల రౌడీలు, రాజకీయ నాయకుల మనుషులు తుపాకులతో వేటాడుతుంటే, ఒంటరిగా ఆ బాక్సును రక్షించడానికి ఆమె చేసే పోరాటం చూస్తుంటే ఒళ్లు గగుర్పొడుస్తుంది. అడవిలో తలదాచుకుంటూ, ఆకలితో అలమటిస్తూ, చుట్టూ ఉన్న ప్రమాదాలను తప్పించుకుంటూ ఎమ్మీ సాగించే ప్రయాణమే ఈ సినిమా. కేవలం బాక్సును కాపాడటమే కాదు, అసలైన ప్రజాస్వామ్యం అంటే ఏంటి? ఒక ఓటు విలువ ఎంత? అనేది ఈ సినిమాలో పచ్చిగా, నాటుగా చూపించారు.