Venkatesh AK47: వెంకటేశ్ – త్రివిక్రమ్ ఏకే47పై టెన్షన్.. షూటింగ్ మధ్యలో మార్పులు..!

Venkatesh AK47: వెంకటేశ్ – త్రివిక్రమ్ శ్రీనివాస్ కాంబినేషన్‌లో సినిమా చూడాలని అభిమానులు ఎన్నో ఏళ్లుగా ఎదురుచూస్తున్నారు. ఆ నిరీక్షణకు ఇప్పుడు ముగింపు వచ్చినట్టే కనిపిస్తోంది. ఆదర్శ కుటుంబం – ఏకే 47 (AK47) అనే టైటిల్‌తో ఈ సినిమా అధికారికంగా ప్రారంభమైంది. ఇటీవలే పూజా కార్యక్రమాలు జరగగా, షూటింగ్ కూడా మొదలైంది. అయితే సినిమా మొదలైనప్పటి నుంచే కొన్ని పరిణామాలు అభిమానుల్లో కాస్త ఆందోళనను కలిగిస్తున్నాయి.

ఈ సినిమాను వేసవి సీజన్‌లో విడుదల చేయాలని నిర్మాతలు మొదట ప్లాన్ చేశారు. దర్శకుడు త్రివిక్రమ్ శ్రీనివాస్ ఈ కథను కుటుంబ భావోద్వేగాలతో పాటు క్రైమ్ నేపథ్యాన్ని కలిపి రూపొందిస్తున్నారని సమాచారం. సినిమా క్వాలిటీ విషయంలో ఎలాంటి రాజీ ఉండకూడదని భావించిన చిత్రబృందం మొదట అనుభవం ఉన్న టెక్నీషియన్లను ఎంపిక చేసింది. కానీ షూటింగ్ మొదలైన తర్వాత టెక్నికల్ టీమ్‌లో మార్పులు చోటు చేసుకోవడం చర్చకు దారి తీసింది.

ముందుగా సినిమాటోగ్రాఫర్ మార్పు జరిగిందనే వార్తలు వినిపించాయి. ఆ తర్వాత ఆర్ట్ డైరెక్టర్ కూడా మారారు. మొదట ఈ సినిమాకు ఆర్ట్ డైరెక్టర్‌గా వైన్ేష్ బంగ్లాన్ పని చేశారు. ఆయన పర్యవేక్షణలో భారీ సెట్ కూడా నిర్మించారు. అయితే ఆ సెట్ అవుట్‌పుట్‌పై దర్శకుడు త్రివిక్రమ్ పూర్తిగా సంతృప్తి చెందలేదని తెలుస్తోంది. దీంతో కొంతకాలం షూటింగ్‌ను ఆపి, కొత్త ఆర్ట్ డైరెక్టర్‌గా ప్రకాష్‌ను తీసుకున్నారు. ఆయన సెట్‌ను మళ్లీ డిజైన్ చేసి తిరిగి నిర్మించారు. ఈ మార్పుల తర్వాతే మళ్లీ షూటింగ్ ప్రారంభమైంది.

ఈ ఆలస్యాల కారణంగా ప్రస్తుతం ప్రధాన సెట్ పూర్తయ్యేలోపు ఇతర సన్నివేశాలను చిత్రీకరిస్తున్నారు. ఇప్పుడు షూటింగ్ వేగంగా సాగుతోందని చిత్రబృందం చెబుతోంది. ఈ సినిమాలో హీరోయిన్‌గా శ్రీనిధి శెట్టి నటిస్తున్నారు. కీలక పాత్రలో నారా రోహిత్ కనిపించనున్నారు. ఆయన పాత్రకు రొమాంటిక్ ట్రాక్ కూడా ఉంటుందని టాక్.

ఇన్ని మార్పులు, ఆలస్యాలు జరిగినా కూడా నిర్మాతలు వేసవి విడుదల లక్ష్యాన్ని మాత్రం వదలలేదు. కానీ వరుసగా జరిగిన మార్పులు చూసి సినిమా అనుకున్న సమయానికి విడుదల అవుతుందా అనే సందేహాలు అభిమానుల్లో ఉన్నాయి. అయినప్పటికీ వెంకటేశ్ – త్రివిక్రమ్ శ్రీనివాస్ కాంబినేషన్‌పై ఉన్న నమ్మకంతో అభిమానులు ఆశగా ఎదురుచూస్తూనే ఉన్నారు.

ALSO READ: Paya Paya Video Song: ఈశ్వరా పవనేశ్వరా.. అంటూ స్టెప్పులు వేసిన బండ్ల గణేష్..!