చిన్న సినిమాలకు శాపంగా పెద్ద హీరోలు.. అప్పుడు బాలయ్య ఇప్పుడు రామ్ చరణ్..

Release Confusion: తెలుగు చలనచిత్ర పరిశ్రమలో ప్రస్తుతం ఒక వింత పరిస్థితి నెలకొంది. వందల కోట్ల బడ్జెట్‌తో రూపుదిద్దుకుంటున్న అగ్ర హీరోల సినిమాలు తమ విడుదల తేదీలను పదే పదే మార్చుతుండటంతో, చిన్న సినిమాల నిర్మాతలు దిక్కుతోచని స్థితిలో పడిపోతున్నారు. దీనివల్ల ఆర్థిక నష్టాలే కాకుండా, కష్టపడి నిర్మించిన చిత్రాలకు సరైన థియేటర్లు దొరకని పరిస్థితి ఏర్పడుతోంది.

అప్పుడు అఖండ-2 ప్రభావం..

గత ఏడాది నందమూరి బాలకృష్ణ ‘అఖండ 2’ విడుదల విషయంలో జరిగిన గందరగోళం ఇందుకు ఒక ప్రధాన ఉదాహరణ. ఈ సినిమా ఒక నిర్దిష్ట తేదీన వస్తుందని భావించి, ఆ సమయంలో పోటీ పడలేక మోగ్లే, సైక్ సిద్ధార్థ వంటి చిన్న చిత్రాలు తమ విడుదల తేదీలను మార్చుకున్నాయి. తీరా చూస్తే, ‘అఖండ 2’ అనుకున్న సమయానికి రాలేదు. దీంతో ఖాళీగా ఉన్న మంచి తేదీలు వృధా అయ్యాయి. మళ్లీ కొత్త తేదీల కోసం వెతుక్కోవాల్సి రావడంతో ప్రమోషన్ ఖర్చులు పెరిగి, నిర్మాతలు భారీగా నష్టపోయారు. ఒక నిర్మాత అయితే బహిరంగంగానే తన ఆవేదనను వ్యక్తపరిచారు.

ఇప్పుడు ‘పెద్ది’ వంతు..

ప్రస్తుతం మెగా పవర్ స్టార్ రామ్ చరణ్ నటిస్తున్న ‘పెద్ది’ సినిమా విషయంలోనూ ఇదే రిపీట్ అవుతోంది. వందల కోట్ల బడ్జెట్‌తో వస్తున్న ఈ సినిమా విడుదల తేదీపై స్పష్టత లేకపోవడంతో, ఆ సమయంలో రావాల్సిన చిన్న సినిమాలు అయోమయంలో ఉన్నాయి. ఇప్పటికే ‘పెద్ది’ ఒకసారి వాయిదా పడటంతో, అప్పుడు రావాల్సిన సినిమాలు ప్లాన్ మార్చుకున్నాయి. ఇప్పుడు మళ్ళీ ఈ సినిమా విడుదల తేదీపై సందిగ్ధత నెలకొనడంతో, చిన్న సినిమాల నిర్మాతలు ‘పెద్ది’ ఎప్పుడు వస్తుందో అని వేయి కళ్లతో ఎదురుచూస్తున్నారు.

నిర్మాతలకు సమస్య

ఒక తేదీ అనుకుని పబ్లిసిటీ చేసిన తర్వాత వాయిదా వేస్తే, మళ్ళీ మొదటి నుంచి ఖర్చు చేయాల్సి వస్తుంది. విడుదల ఆలస్యమయ్యే కొద్దీ తెచ్చిన పెట్టుబడిపై వడ్డీలు పెరిగిపోతున్నాయి. పెద్ద సినిమా ఉందంటే థియేటర్లన్నీ బ్లాక్ అవుతాయి. తీరా ఆ సినిమా రాకపోతే, ఆ గ్యాప్‌లో చిన్న సినిమాలు సిద్ధంగా ఉండవు. సినీ పరిశ్రమలో సమన్వయం లోపించడం వల్ల చిన్న సినిమాలు బలి అవుతున్నాయి. పెద్ద సినిమాల నిర్మాతలు కనీసం రెండు మూడు నెలల ముందే తమ విడుదల తేదీపై ఒక స్పష్టమైన ప్రకటన ఇచ్చి, దానికి కట్టుబడి ఉంటేనే చిన్న చిత్రాలకు మనుగడ ఉంటుంది. లేదంటే, అగ్ర హీరోల సినిమాల నీడలో చిన్న నిర్మాతలు చితికిపోయే ప్రమాదం ఉంది. దీనికి సంబంధించి సినిమా పెద్దలు తగిన చర్యలు తీసుకుంటే చిన్న సినిమాలు బతుకు తాయని నిర్మాతలు ఆవేదన వ్యక్తం చేస్తున్నారు.