క్రికెటర్ తిలక్ వర్మతో లవ్.. స్పందించిన హీరోయిన్ శ్రీలీల టీమ్!..

Sreeleela Rumours: టాలీవుడ్ యంగ్ అండ్ సెన్సేషనల్ హీరోయిన్ శ్రీలీల గురించిన ఒక క్రేజీ రూమర్ గత కొన్ని రోజులుగా సోషల్ మీడియాలో జోరుగా ప్రచారమవుతోంది. టీమిండియా యంగ్ క్రికెటర్, తెలుగు కుర్రాడు తిలక్ వర్మ తో ఈ ముద్దుగుమ్మ ప్రేమలో ఉందంటూ కొన్ని వెబ్ సైట్లు, సోషల్ మీడియా పేజీలు కథనాలను అల్లేశాయి. ఈ వార్తలు కాస్తా నెట్టింట వైరల్‌గా మారడంతో తాజాగా శ్రీలీల టీమ్ అధికారికంగా స్పందించింది. ఈ ప్రచారంలో ఎలాంటి నిజం లేదంటూ ఒక సుదీర్ఘ ప్రకటనను విడుదల చేసింది. కాగా ఇప్పటికే దీనికి సంబంధించిన వార్త సోషల్ మీడియాలో తెగ హల్ చల్ చేస్తోంది.

కనీస పరిచయం కూడా..

శ్రీలీల అఫీషియల్ టీమ్ విడుదల చేసిన ప్రెస్ నోట్‌లో ఈ రూమర్లను తీవ్రంగా ఖండించింది. “క్రికెటర్ తిలక్ వర్మ, నటి శ్రీలీలల మధ్య లింక్ పెడుతూ వస్తున్న వార్తలు పూర్తిగా ఆధారరహితం, అవాస్తవం. వీరిద్దరి మధ్య కనీసం ఎలాంటి పరిచయం గానీ, మాటల గానీ జరగలేదు. ఇప్పటివరకు వారిద్దరూ ఒకరినొకరు కలుసుకోలేదు కూడా. ఇలాంటి కల్పిత కథనాల్లో ఎలాంటి నిజం లేదు” అని శ్రీలీల ప్రతినిధులు స్పష్టం చేశారు.

మీడియాకు విజ్ఞప్తి..

ఇదే విషయమై సోషల్ మీడియా యూజర్లకు, మీడియా సంస్థలకు శ్రీలీల టీమ్ ఒక కీలక విజ్ఞప్తి చేసింది. ఒకరి వ్యక్తిగత జీవితానికి సంబంధించిన విషయాలపై వార్తలు రాసేటప్పుడు కనీస బాధ్యతతో వ్యవహరించాలని కోరింది. ఎలాంటి ఆధారాలు లేకుండా, నిజానిజాలు తెలుసుకోకుండా ఇలాంటి అన్-వెరిఫైడ్ వార్తలను ప్రచారం చేయవద్దని, బాధ్యతాయుతమైన జర్నలిజం పాటించాలని సదరు ప్రకటనలో పేర్కొన్నారు. ప్రస్తుతం శ్రీలీల టీమ్ ఇచ్చిన ఈ క్లారిటీతో గత కొన్ని రోజులుగా సోషల్ మీడియాలో తిలక్ వర్మ, శ్రీలీలల డేటింగ్ వ్యవహారంపై నడుస్తున్న ఊహాగానాలకు పూర్తిగా తెరపడినట్లయింది. సినిమాల విషయానికొస్తే.. శ్రీలీల ప్రస్తుతం పలు క్రేజీ ప్రాజెక్టులతో బిజీగా ఉండగా, తిలక్ వర్మ క్రికెట్ మైదానంలో తన ఆటతో రాణిస్తున్నాడు. కాగా తిలక్ వర్మ మాత్రం ఈ విషయంపై ఇప్పటి వరకూ స్పందించలేదు.