Release Dates Controversy: డేట్లు ప్రకటిస్తారు కానీ సినిమాలు రావు… ఇదేం ట్రెండ్ సామీ..!

Release Dates Controversy in Tollywood:

ప్రస్తుతం టాలీవుడ్‌లో ఒక విచిత్రమైన.. గందరగోళ పరిస్థితి కొనసాగుతోంది. పెద్ద సినిమాలు రిలీజ్ డేట్లు ప్రకటిస్తున్నాయి కానీ ఆ డేట్లు వచ్చినప్పుడు థియేటర్లలో సినిమాలే కనిపించడం లేదు. దీని వల్ల పండుగలు, సెలవుల సమయంలో కూడా థియేటర్లు ఖాళీగా ఉండే పరిస్థితి ఏర్పడుతోంది. ఇది సినిమా ఇండస్ట్రీకి అస్సలు మంచిది కాదనే అభిప్రాయం వినిపిస్తోంది.

రెండు పెద్ద సినిమాలు..

ఇటీవల మార్చి చివర్లో రెండు భారీ సినిమాలు రిలీజ్ అవుతాయని ప్రకటించారు. ఒకటి పెద్ది. ఈ సినిమాలో హీరోగా రామ్ చరణ్ నటిస్తుండగా, దర్శకత్వం బుచ్చిబాబు సానా చేస్తున్నారు. మరో సినిమా ది ప్యారడైస్. ఇందులో నాని హీరోగా నటిస్తున్నారు. ఈ రెండు సినిమాల రిలీజ్ డేట్లు ప్రకటించిన వెంటనే సోషల్ మీడియాలో భారీ చర్చ మొదలైంది. బడ్జెట్, కథ..స్టార్ పవర్ అంటూ అభిమానులు పోలికలు పెట్టుకున్నారు. మార్చి చివర టాలీవుడ్‌లో పెద్ద బాక్సాఫీస్ క్లాష్ జరుగుతుందని అంతా భావించారు.

కానీ వాస్తవ పరిస్థితి మాత్రం పూర్తిగా భిన్నంగా మారింది. ఈ రెండు సినిమాల షూటింగ్ ఇంకా పూర్తికాలేదు. పోస్ట్ ప్రొడక్షన్ పనులపై కూడా స్పష్టత లేకపోవడంతో సినిమాలు రిలీజ్‌కు సిద్ధంగా లేవు. దీంతో ఎలాంటి అధికారిక ప్రకటన లేకుండానే ఈ సినిమాలు ఆ డేట్ల నుంచి తప్పుకున్నాయి. ఫలితంగా సంవత్సరంలోనే అత్యంత కీలకమైన ఒక మంచి రిలీజ్ విండో పూర్తిగా ఖాళీగా మిగిలిపోయింది.

ఇది కేవలం మార్చి నెలకే పరిమితం కాలేదు. దసరా పండుగ సమయానికి కూడా ఇదే పరిస్థితి మళ్లీ రిపీట్ అవుతున్నట్లు కనిపిస్తోంది. సినిమాలు టైమ్‌కు పూర్తవ్వవని తెలిసినా కూడా రిలీజ్ డేట్లు ప్రకటిస్తున్నారు. అసలు ఉద్దేశ్యం ఆ డేటును బ్లాక్ చేసి, చిన్న సినిమాలు ఆ స్లాట్‌లోకి రాకుండా చేయడమే అన్న విమర్శలు వినిపిస్తున్నాయి.

అయోమయంలో పెద్ద సినిమాల నిర్మాతలు..

ఈ అయోమయ పరిస్థితి వల్ల చిన్న, మధ్యస్థ బడ్జెట్ సినిమాల నిర్మాతలు తీవ్రంగా నష్టపోతున్నారు. ఎప్పుడైనా పెద్ద సినిమా వచ్చి డేట్ మార్చేస్తుందేమో అనే భయంతో వారు రిలీజ్ డేట్లు ఖరారు చేయలేకపోతున్నారు. పండుగల సమయంలో థియేటర్లకు వచ్చే ప్రేక్షకులను కోల్పోయే పరిస్థితి ఏర్పడుతోంది.

ఒకప్పుడు టాలీవుడ్ చాలా జాగ్రత్తగా ప్లాన్ చేసుకుని సినిమాలను రిలీజ్ చేసేది. సెలవులు, పండుగలను పూర్తిగా ఉపయోగించుకునేది. కానీ ఇప్పుడు సినిమాలకంటే ముందు రిలీజ్ డేట్లే వస్తున్నాయి. ఈ ట్రెండ్ ఇలాగే కొనసాగితే థియేటర్లు, డిస్ట్రిబ్యూటర్లు, ముఖ్యంగా చిన్న సినిమాలే ఎక్కువగా నష్టపోతాయి. ఇకనైనా టాలీవుడ్ నిజాయితీతో కూడిన ప్లానింగ్, వాస్తవానికి దగ్గరైన టైమ్‌లైన్లు పాటిస్తేనే ఈ సమస్యకు పరిష్కారం లభిస్తుంది.

Also Read: Janasenani : జనసేనానికి కొత్త చిక్కులు.. వైసీపీకి ఇది అస్త్రం కానుందా?