‘స్పిరిట్’ టైటిల్ వివాదంపై కన్నీరు పెట్టుకున్న నిర్మాత!.. అసలు ఏంజరిగిందంటే?

Spirit Controversy: టాలీవుడ్ స్టార్ హీరో రెబల్ స్టార్ ప్రభాస్, క్రేజీ డైరెక్టర్ సందీప్ రెడ్డి వంగా కాంబినేషన్‌లో రాబోతున్న భారీ ప్రాజెక్ట్ ‘స్పిరిట్’ (Spirit) చుట్టూ ఇప్పుడు ఒక ఊహించని టైటిల్ వివాదం రాజుకుంది. ఒక పెద్ద నిర్మాణ సంస్థ నుండి వచ్చిన లీగల్ నోటీసుల వల్ల రోడ్డున పడ్డామంటూ ఒక సాధారణ రైతు కుటుంబానికి చెందిన మహిళా నిర్మాత నరసమ్మ ఓ మీడియా ఇంటర్వ్యూలో కన్నీటి పర్యంతమయ్యారు.

ఈ వివాదంపై ఆమె నేరుగా హీరో ప్రభాస్‌కు హృదయవిదారక విజ్ఞప్తి చేశారు. ప్రభాస్ గారు చాలా మంచి వారని, పక్కవారి కష్టాన్ని దోచుకునే వ్యక్తి ఆయన కానే కాదని ఆమె పేర్కొన్నారు. ఇండస్ట్రీలో ఎంతో మందికి సహాయం చేసే పెద్ద మనసున్న ప్రభాస్, తమ లాంటి చిన్న వారి బాధను కూడా అర్థం చేసుకోవాలని కోరారు.

“ఆ పెద్ద సినిమా వేరు, మా చిన్న సినిమా వేరు” అని ప్రభాస్ ఒక్క మాట చెబితే తమకు ఎలాంటి ఇబ్బంది ఉండదని, తమ సినిమాను ఏదో ఒక మూల రిలీజ్ చేసుకుంటామని ఆమె వేడుకున్నారు. 13 ఏళ్ల క్రితం తమ సర్వస్వాన్ని, ఇల్లు వాకిలి, ఆస్తులను అమ్ముకుని ఎంతో ఇష్టంతో ఈ ‘స్పిరిట్’ అనే సినిమాను ప్రారంభించామని, ఇందులో తమ చనిపోయిన కొడుకు కూడా నటించాడని ఆమె ఆవేదన వ్యక్తం చేశారు.

తమకు ఎలాంటి డబ్బు ఆశ లేదని, కేవలం కొడుకు జ్ఞాపకంగా ఉన్న ఈ సినిమా థియేటర్లలో విడుదల కావడమే తమకు ముఖ్యమని స్పష్టం చేశారు. మరి ఈ చిన్న నిర్మాతల ఆవేదన టాలీవుడ్ డార్లింగ్ ప్రభాస్ వరకు చేరుతుందా? ఈ టైటిల్ వివాదానికి ఒక సానుకూల పరిష్కారం దొరుకుతుందా? అనేది ఇప్పుడు సినీ వర్గాల్లో ఆసక్తికరంగా మారింది.