Project Hail Mary: హృతిక్ రోషన్ ప్రమోషన్‌తో హాలీవుడ్ మూవీకి భారీ హైప్

Project Hail Mary: ఇండియన్ స్టార్ హీరో హృతిక్ రోషన్ మరోసారి తన ప్రత్యేక శైలితో అభిమానులను ఆకట్టుకున్నారు. ఈసారి ఆయన హాలీవుడ్ సైన్స్ ఫిక్షన్ సినిమా ప్రాజెక్ట్ హెయిల్ మేరీ ప్రమోషన్‌లో భాగమయ్యారు. భారతీయ ప్రేక్షకులకు ఈ సినిమాను మరింత చేరువ చేయాలనే ఉద్దేశంతో హృతిక్ ఒక వినూత్న వీడియోతో ముందుకొచ్చారు.

ఆకట్టుకున్న వీడియో..!

ఈ ప్రత్యేక వీడియోలో హృతిక్ తన సూపర్ హిట్ పాట ఏక్ పల్ కా జీనాలో చేసిన ప్రసిద్ధ స్టెప్‌ను ఒక ఏలియన్ పాత్రకు నేర్పిస్తున్నట్లు చూపించారు. ఆ ఏలియన్ పేరు రాకీ. హృతిక్, రాకీ మధ్య ఉన్న సరదా సన్నివేశాలు ప్రేక్షకులను ఆకట్టుకునేలా ఉన్నాయి. అంతేకాకుండా, హృతిక్ గతంలో చేసిన కోయీ మిల్ గయా సినిమాలో కనిపించిన ఏలియన్ జాదూ కూడా ఈ వీడియోలో కనిపించడం ప్రత్యేక ఆకర్షణగా నిలిచింది. జాదూ రియాక్షన్ చాలా క్యూట్‌గా ఉండటంతో వీడియో మరింత ఆసక్తికరంగా మారింది.

ఈ సినిమా ప్రముఖ రచయిత ఆండీ వీర్ రాసిన అదే పేరుతో ఉన్న నవల ఆధారంగా రూపొందింది. ఈ కథ అంతరిక్షంలో జరిగే ఒక సైన్స్ ఫిక్షన్ అడ్వెంచర్. ఇందులో ప్రధాన పాత్రలో హాలీవుడ్ స్టార్ హీరో ర్యాన్ గోస్లింగ్ నటించారు. ఈ కథలో సస్పెన్స్, భావోద్వేగం, సైన్స్ అంశాలు కలిసి ఉంటాయి.

హృతిక్ రోషన్ ఈ నవలపై తనకు చాలా ఇష్టం ఉందని గతంలో సోషల్ మీడియాలో చెప్పిన విషయం తెలిసిందే. ఇప్పుడు అదే కథపై తీసిన సినిమాను భారతదేశంలో ప్రమోట్ చేయడం ఆయనకు మరింత ప్రత్యేకంగా మారింది. ఈ విషయంపై సోనీ పిక్చర్స్ ఇండియా ప్రతినిధులు కూడా సంతోషం వ్యక్తం చేశారు.

ఈ సినిమాను ఫిల్ లార్డ్, క్రిస్టోఫర్ మిల్లర్ దర్శకత్వం వహించారు. సాండ్రా హుల్లర్, కెన్ లెయుంగ్ వంటి నటులు కూడా ముఖ్య పాత్రల్లో కనిపించనున్నారు.

‘ప్రాజెక్ట్ హెయిల్ మేరీ’ సినిమా ఇంగ్లీష్‌తో పాటు హిందీ, తెలుగు, తమిళ భాషల్లో విడుదల కానుంది. ఐమాక్స్ ఫార్మాట్‌లో 2026 మార్చ్ 26న భారతదేశవ్యాప్తంగా ఈ చిత్రం ప్రేక్షకుల ముందుకు రానుంది.

ALSO READ: Sitara Ghattamaneni:అభిమానులతో కలిసి జై బాబు అని అరిచిన సితార ఘట్టమనేని.‌. వీడియో వైరల్..!