Gen Z Burnout: ఆధునిక సాంకేతిక పరిజ్ఞానం, విపరీతమైన ఆశయాలతో నేటి తరం యువత (Gen Z) కెరీర్‌లోకి అడుగుపెడుతోంది. అయితే, కెరీర్ ప్రారంభంలోనే చాలామంది తీవ్రమైన మానసిక అలసటకు (బర్నౌట్) గురవుతున్నారు. ఒకప్పుడు ఉద్యోగ విరమణ దశలోనో లేదా కెరీర్ మధ్యలోనో కనిపించే ఈ సమస్య, ఇప్పుడు 20 ఏళ్ల ప్రాయంలోనే యువతను వేధిస్తోంది.
నేటి యువత స్మార్ట్‌ఫోన్లు, సోషల్ మీడియా ప్రపంచంలోనే పెరిగింది. ఇది వారికి డిజిటల్ నైపుణ్యాలను తెచ్చిపెట్టినప్పటికీ.. వ్యక్తిగత జీవితానికి, వృత్తిపరమైన జీవితానికి మధ్య తేడాను చెరిపేసింది. ఆఫీస్ మెయిళ్లు, మెసేజ్‌లు నిరంతరం అందుబాటులో ఉండటం వల్ల వారు పని నుంచి ఎప్పటికీ విరామం తీసుకోలేకపోతున్నారు. దీనికి తోడు కెరీర్‌లో త్వరగా స్థిరపడాలనే తపన వారిపై అదనపు ఒత్తిడిని పెంచుతోంది.
Also Read: వానాకాలంలో ఈ 4 జాగ్రత్తలు తీసుకోకపోతే.. అనారోగ్యాన్ని కొని తెచ్చుకున్నట్టే!
కేవలం ఎక్కువ గంటలు పని చేయడం వల్లే అలసట వస్తుందనుకుంటే పొరపాటే. నిరంతర నోటిఫికేషన్లు, వర్చువల్ మీటింగ్‌లు యువతకు మానసిక ప్రశాంతత లేకుండా చేస్తున్నాయి. బయటకు ఎంతో ఉత్సాహంగా కనిపిస్తున్నా, లోపల మాత్రం డిజిటల్ అలసటతో నలిగిపోతున్నారు. మేనేజర్లు, ఉద్యోగుల మధ్య సరైన కమ్యూనికేషన్ లేకపోవడం వల్ల ఈ సమస్య మరింత తీవ్రమవుతోంది.
చాలామంది యువ ఉద్యోగులు తక్కువ సమయంలోనే పెద్ద విజయాలు సాధించాలని కోరుకుంటారు. బాధ్యతలు తీసుకోవడం మంచిదే అయినా, పరిమితికి మించి పనులు ఒప్పుకోవడం వల్ల ఒత్తిడికి లోనవుతున్నారు. ‘నో’ చెబితే తమ కెరీర్ దెబ్బతింటుందేమోననే భయంతో, క్లారిటీ లేని పనులను కూడా నెత్తిన వేసుకుని సతమతమవుతున్నారు.
ఈ సమస్య నుంచి బయటపడాలంటే యువత తమ పని వేళలకు స్పష్టమైన సరిహద్దులు పెట్టుకోవాలి. సమయానికి నిద్రపోవడం, స్క్రీన్ సమయాన్ని తగ్గించడం, క్రమం తప్పకుండా వ్యాయామం చేయడం వంటి అలవాట్లు చేసుకోవాలి. అలాగే, యాజమాన్యాలు కూడా ఉద్యోగులు ఎల్లప్పుడూ అందుబాటులో ఉండాలని ఆశించకుండా, వారి పని ఫలితాలకు ప్రాధాన్యత ఇవ్వాలి. ఆఫీస్ వేళల తర్వాత మెసేజ్‌లను తగ్గించి, వారికి తగిన మద్దతు ఇస్తేనే ఆరోగ్యకరమైన వాతావరణం ఏర్పడుతుంది.
Also Read: టాయిలెట్‌లో ఫోన్ వాడుతున్నారా? చేతులారా దరిద్రాన్ని కొనితెచ్చుకోవడమే.. వాస్తు ఏం చెబుతోంది?
Share
టైప్ చేసే పనిలేదు.. Google Gemini 3.5తో మాట్లాడితే చాలు, క్షణాల్లో 70 భాషల్లోకి అనువాదం!
వాస్కులర్ డిసీజ్ అంత ప్రమాదకరమా? కాళ్ల నొప్పులు, మధుమేహంతో దీనికి ఉన్న లింక్ ఏంటి?
