Eye Infection in Winter: చలికాలం మొదలైతే కంటి ఇన్ఫెక్షన్లు ఎందుకు ఎక్కువవుతాయి?

శీతాకాలంలో చలి గాలి కళ్లపై నేరుగా ప్రభావం చూపుతుంది. సాధారణంగా మన కళ్లపై పలుచని నీటి పొర ఉంటుంది. ఆ పొర కళ్లకు తడి, రక్షణ అందిస్తుంది. చలికాలంలో ఈ నీటి పొర త్వరగా ఆరిపోవడం వల్ల కళ్లలో పొడిబారడం, గరుకుగా అనిపించడం, మంట, ఇరిటేషన్ వంటి సమస్యలు ఎక్కువవుతాయి. ఇలా కళ్ల పొడిబారితే వైరస్‌లు, బ్యాక్టీరియా, అలెర్జీ కళ్లలో సులభంగా చేరి ఇన్ఫెక్షన్‌కు దారితీస్తాయి. అందుకే శీతాకాలం ప్రారంభంకాగానే కంటి వైద్యులను కలిసే వారి సంఖ్య పెరుగుతుంది. కళ్లు ఎర్రబారడం, నీళ్లు కారడం, కంటిపాపలు అంటుకట్టడం, ఉదయం లేచినప్పుడు కళ్ళు అతుక్కోవడం వంటి సమస్యలు ఎక్కువ మందికి వస్తాయి.

చలికాలంలో ఇన్ఫెక్షన్ పెరగడానికి కారణమే
చలికాలంలో మనం సాధారణంగా ఎక్కువసేపు ఇళ్లలోనే గడుపుతాం. పిల్లలు, పెద్దలు, ఆఫీసు ఉద్యోగులు అందరూ గదుల్లో ఎక్కువగా ఉండటం వల్ల వైరస్‌లు, బ్యాక్టీరియా త్వరగా వ్యాపించే అవకాశం పెరుగుతుంది. ఒకరికి కళ్ల ఇన్ఫెక్షన్ ఉంటే అతని కంట్లోకి నేరుగా చేరడం, కళ్లను తాకిన చేతులతో వస్తువులు తాకడం ద్వారా మిగిలిన వారికి కూడా వ్యాపించే ప్రమాదం ఉంటుంది. హీటర్ ఉపయోగించే గదుల్లో గాలి ఇంకా పొడిగా మారుతుంది. దీని వల్ల కళ్ల తడి త్వరగా ఆరిపోతుంది. రోగనిరోధక వ్యవస్థ కూడా చలికాలంలో కొంచెం తగ్గుతుంది. ఈ పరిస్థితులు మొత్తం కలిసి కంజెక్టివైటిస్ వంటి ఇన్ఫెక్షన్లు ఎక్కువగా కనిపించేందుకు కారణమవుతాయి. ఈ ఇన్ఫెక్షన్ వస్తే కళ్ళు ఎర్రగా మారడం, మంట, చీమలు తిరుగుతున్నట్లుగా అనిపించడం, నీళ్లు రావడం, పసుపు రంగు మచ్చలు, చూపు మందగించడం వంటి సమస్యలు కనిపిస్తాయి. వైరల్ ఇన్ఫెక్షన్ అయితే సాధారణంగా వారం రోజుల వరకు ఇబ్బంది పెడుతుంది.

కళ్లను ఎలా రక్షించుకోవాలి?
కళ్ల ఇన్ఫెక్షన్‌లను నివారించడానికి కొన్ని సులభమైన చిట్కాలు చాలా ప్రభావవంతంగా ఉంటాయి. ముందుగా చేతులను పరిశుభ్రంగా ఉంచడం చాలా ముఖ్యం. బయట నుండి వచ్చిన వెంటనే, కళ్ళను తాకే ముందు సబ్బుతో చేతులు కడగాలి. కళ్ళు రుద్దకూడదు. గదుల గాలి చాలా పొడిగా ఉంటే హ్యూమిడిఫైయర్ పెట్టడం, లేకపోతే చిన్న నీటి పాత్రలు గదిలో ఉంచడం ద్వారా గాలి తడి పెరుగుతుంది. బయటికి వెళ్తప్పుడు కళ్ళు గాలికి, ధూళికి, పొగకు నేరుగా తగలకుండా సన్‌గ్లాసులు ధరించడం ఉపయోగపడుతుంది. కాంటాక్ట్ లెన్స్ వాడేవారు ఈ కాలంలో మరింత జాగ్రత్త తీసుకోవాలి. లెన్స్ ఎక్కువసేపు వాడకూడదు. వాటిని వేసేముందు, తీసేసిన తర్వాత కూడా చేతులు శుభ్రం చేసుకోవాలి. గాలి కారణంగా కళ్ళు పొడిబారుతున్నట్లు అనిపిస్తే వైద్యుడు చెప్పిన లూబ్రికేటింగ్ డ్రాప్‌లు ఉపయోగించాలి.

తీసుకోవాల్సిన జాగ్రత్తలు
శీతాకాలంలో కళ్ల ఆరోగ్యం చాలా మంది పట్టించుకోరు. చేతులు కడగకుండా కళ్ళు తాకడం, కళ్లు రుద్దడం వంటి అలవాట్లు ఇన్ఫెక్షన్‌ను మరింత పెంచుతాయి. కళ్ళు ఎర్రబారడం, నీళ్లు కారడం, మయ్యరావడం, చూపు మందగించడం, వెలుతురు చూస్తే అసహనం అనిపించడం వంటి లక్షణాలు కనిపిస్తే వెంటనే కంటి వైద్యుడిని సంప్రదించాలి. ఆలస్యం చేస్తే ఇన్ఫెక్షన్ పెరిగి కుటుంబ సభ్యులకు కూడా వ్యాపించవచ్చు. శీతాకాలం కేవలం చలి కాక, కళ్ల ఆరోగ్యానికి కూడా సున్నితమైన సమయం. కాబట్టి కళ్లను అప్పుడప్పుడు విరామం ఇవ్వడం, రోజూ తగినంత నీరు తాగడం, పోషకాహారం తీసుకోవడం, పరిశుభ్రత పాటించడం వంటివి తప్పనిసరిగా పాటించాలి. ఇలా సాధారణ జాగ్రత్తలతో ఈ శీతాకాలాన్ని కళ్ల సమస్య లేకుండా సురక్షితంగా గడపవచ్చు.