Low calcium: ఎముకల బలానికి కాల్షియం చాలా అవసరం. కానీ 30 ఏళ్ల వయస్సు తర్వాత మహిళల్లో కాల్షియం స్థాయిలు తగ్గడం మొదలవుతుంది. అయితే.. మహిళలు తరచుగా ఈ సమస్యను నిర్లక్ష్యం చేస్తారు. ఇది క్రమంగా ఆస్టియోపొరోసిస్కు దారితీస్తుంది. అందుకే.. కాల్షియం లోపాన్ని ముందుగానే గుర్తించడం ముఖ్యం. మహిళల్లో కాల్షియం లోపం వల్ల వచ్చే సంకేతాలు ఏంటో , దానిని నివారించడానికి ఏం చేయాలో ఇప్పుడు తెలుసుకుందాం.
కాల్షియం లోపం యొక్క 5 సంకేతాలు :
కండరాల నొప్పులు – కాళ్లు, చేతులు, భుజాలలో తరచుగా కండరాలు అదరడం లేదా బిగువుగా అనిపించడం కాల్షియం లోపానికి ఒక తొలి సంకేతం. నడిచేటప్పుడు లేదా కదిలేటప్పుడు తొడలు, చేతులలో నొప్పి అనిపించవచ్చు.
అధిక అలసట,నీరసం: తగినంత నిద్రపోయిన తర్వాత కూడా.. రోజంతా మీరు అలసటగా, నీరసంగా అనిపిస్తే.. ఇది ఎముకలు బలహీనపడుతున్నాయనడానికి సంకేతం కావచ్చు. ఇది మతిమరుపు, తలతిరగడం వంటి సమస్యలకు కూడా దారితీస్తుంది.
బలహీనమైన గోళ్లు, పొడి చర్మం: కాల్షియం లోపం వల్ల గోళ్లు పలుచగా, పెళుసుగా మారవచ్చు. చర్మం అధికంగా పొడిబారడం, దురద వంటివి కూడా ఎదురవుతాయి.
పంటి సమస్యలు: మన శరీరంలోని కాల్షియంలో అధిక భాగం మన పళ్లు, ఎముకలలో నిల్వ ఉంటుంది. కాల్షియం లోపం వల్ల పళ్లు బలహీనపడటం, చిగుళ్లలో నొప్పి రావడం, దంత క్షయం ఎక్కువగా సంభవించడం వంటివి జరగవచ్చు.
ఎముకలు బలహీనపడటం: చిన్నపాటి గాయాల వల్ల ఎముకలు విరగడం లేదా నిరంతర నడుము, మెడ నొప్పి వంటివి ఆస్టియోపొరోసిస్కు కారణం కావచ్చు. ఇది తీవ్రమైన కాల్షియం లోపం వల్ల వస్తుంది.
కాల్షియం లోపాన్ని ఎలా నివారించాలి ?
పాల ఉత్పత్తులను తినండి – పాలు, పెరుగు, జున్ను, మజ్జిగ కాల్షియంకు అద్భుతమైన మూలాలు. ప్రతి రోజూ కనీసం రెండు గ్లాసుల పాలు లేదా ఒక గిన్నెడు పెరుగును తప్పకుండా తీసుకోండి.
మీ ఆహారంలో పాలకూర, మెంతులు, బ్రోకలీ , బీన్స్ వంటి ఆకుపచ్చ కూరగాయలను చేర్చుకోండి . వీటిలో కాల్షియం, ఫైబర్ పుష్కలంగా ఉంటాయి.
గింజలు, నట్స్ – నువ్వులు, చియా గింజలు, బాదం, వాల్నట్లు అన్నీ కాల్షియంకు నిధి వంటివి. ఒక టేబుల్ స్పూన్ తెల్ల నువ్వులలో ఎక్కువ మొత్తంలో కాల్షియం ఉంటుంది.
విటమిన్ డి చాలా అవసరం – విటమిన్ డి లేకుండా మన శరీరం కాల్షియంను గ్రహించలేదు. అందుకే.. ప్రతిరోజూ 15-20 నిమిషాలు ఎండలో గడపండి.
కెఫీన్ , ఉప్పు తీసుకోవడాన్ని నియంత్రించండి – అధికంగా టీ, కాఫీ, ఉప్పు తీసుకోవడం వల్ల శరీరం నుంచి కాల్షియం హరించుకుపోతుంది. వీటిని మితంగా తీసుకోండి.
Share
నమ్మించి మోసం చేసిన ప్రేయసి... పగ తీర్చుకోవాలని ఎదురు చూసే ప్రియుడు... ఆకట్టుకునే క్లైమాక్స్
నిండు నూరేళ్ల సావాసం మార్చి 31: రణవీర్ ఇంటికి వెళ్లిన మనోహరి 
