Alzheimer’s: ఈ లక్షణాలు మీలో ఉన్నాయా ? అయితే అల్జీమర్స్ ఉన్నట్లే !

Alzheimer’s: అల్జీమర్స్ వ్యాధి అనేది వృద్ధాప్యంలో వచ్చే అత్యంత సాధారణమైన డిమెన్షియా రకం. ఇది మెదడు కణాలను క్రమంగా నాశనం చేసే నాడీ సంబంధిత సమస్య. ఈ వ్యాధి జ్ఞాపకశక్తి, ఆలోచనా నైపుణ్యాలు, ప్రవర్తనపై తీవ్ర ప్రభావం చూపుతుంది. ప్రారంభంలో లక్షణాలు చాలా స్వల్పంగా ఉంటాయి. కానీ కాలక్రమేణా తీవ్రమవుతాయి. అల్జీమర్స్ వ్యాధిని గుర్తించడానికి సహాయపడే 10 ముఖ్యమైన హెచ్చరిక సంకేతాలు, లక్షణాలను గురించిన పూర్తి వివరాలను ఇప్పుడు తెలుసుకుందాం.

అల్జీమర్స్ లక్షణాలు:
1. జ్ఞాపకశక్తి తగ్గిపోవడం:
ఇది అత్యంత సాధారణ, ముఖ్యమైన లక్షణం. ముఖ్యంగా ఇటీవల జరిగిన సంఘటనలను, మాట్లాడిన విషయాలను లేదా కొత్తగా తెలుసుకున్న సమాచారాన్ని మర్చిపోవడం.
ఒకే ప్రశ్నను పదేపదే అడగడం లేదా ముఖ్యమైన తేదీలను, ఈవెంట్‌లను గుర్తుంచుకోలేకపోవడం.

2. ప్రణాళికలో ఇబ్బందులు:
సాధారణ రోజువారీ పనులను నిర్వహించడంలో కష్టం. ఉదాహరణకు.. నెలవారీ బిల్లులు చెల్లించడం, వంటకాలు చేయడం లేదా ఒక పనిని పూర్తి చేయడానికి దశలను అనుసరించడంలో ఇబ్బంది పడటం.

3. రోజువారీ పనులు పూర్తి చేయడంలో కష్టం:
ఇంతకు ముందు సులభంగా చేయగలిగిన పనులను నిర్వహించడంలో ఇబ్బంది పడటం. ఉదాహరణకు.. డ్రైవింగ్ చేయడం, ఇష్టమైన ఆట ఆడటం లేదా టీవీ రిమోట్‌ను ఉపయోగించడం.

4. సమయం,స్థానంపై అయోమయం:
తాము ఎక్కడ ఉన్నారో.. అక్కడికి ఎలా వచ్చారో లేదా ఏ రోజు.. ఏ సీజన్‌లో ఉన్నారో మర్చిపోవడం.జరిగబోయే సంఘటనలను తక్షణమే జరుగుతున్నట్లుగా భావించడం.

5. దృష్టిలో మార్పులు:
చూసే వాటిని అంచనా వేయడంలో కష్టం. ఉదాహరణకు..దూరాన్ని అంచనా వేయలేకపోవడం, రంగులు లేదా కాంట్రాస్ట్‌ను గుర్తించడంలో ఇబ్బంది.ఇది డ్రైవింగ్‌ను ప్రమాదకరంగా మారుస్తుంది.

6. మాట్లాడటం లేదా రాయడంలో సమస్యలు:
మాట్లాడేటప్పుడు తడబడటం. సరైన పదాలను కనుగొనలేకపోవడం. మధ్యలో ఆగిపోవడం లేదా అదే విషయాన్ని మళ్లీ మళ్లీ చెప్పడం. అంతే కాకుండా ఇతరుల మాటలను అనుసరించడం లేదా అర్థం చేసుకోవడం కష్టం కావడం.

7. వస్తువులను పోగొట్టుకోవడం, వాటిని వెతకలేకపోవడం:
వస్తువులను అసాధారణమైన ప్రదేశాలలో ఉంచడం. ఆ తర్వాత ఆ వస్తువులు ఎక్కడ పెట్టారో గుర్తుకు రాకపోవడం, వాటిని ఎవరైనా దొంగిలించారా అని అనుమానించడం.

8. సరిగా ఆలోచించడంలో కష్టం:
సరిగా ఆలోచించకుండా తప్పుడు నిర్ణయాలు తీసుకోవడం. ఉదాహరణకు.. డబ్బును అనాలోచితంగా ఖర్చు చేయడం లేదా వాతావరణానికి తగిన బట్టలు ధరించకపోవడం.

Also Read: మోడ్రన్ ప్రేమాయణం..పెళ్లి కాకుండా కలిసి జీవించడం ఎంతవరకు సేఫ్?

9. సామాజిక పనుల నుంచి తప్పించుకోవడం :
ఇతరులతో కలవడానికి.. హాబీలలో లేదా పనిలో పాల్గొనడానికి ఆసక్తి చూపకపోవడం.

ఈ మార్పులు జ్ఞాపక శక్తి కోల్పోవడం వల్ల వచ్చే ఇబ్బంది కారణంగా సంభవించవచ్చు.

10. వ్యక్తిత్వం, మానసిక స్థితిలో మార్పులు:
తొందరగా కలత చెందడం, భయం, ఆందోళన, నిస్పృహ, లేదా అనుమానం పెరగడం.

పరిచయం లేని లేదా వారి కంఫర్ట్ జోన్ వెలుపల ఉన్న ప్రదేశాలలో ఇబ్బంది పడటం.

ఈ లక్షణాలలో ఏవైనా ఒకరిలో కనిపిస్తే.. అది వృద్ధాప్యం వల్ల కావచ్చు లేదా ఇతర ఆరోగ్య సమస్య వల్ల కావచ్చు. కానీ.. ఈ లక్షణాలు రోజు వారీ జీవితాన్ని ప్రభావితం చేసేంత తీవ్రంగా ఉంటే..ఆలస్యం చేయకుండా డాక్టర్‌ని లేదా న్యూరాలజిస్ట్‌ను సంప్రదించడం చాలా ముఖ్యం