Sleeping: ఆలస్యంగా నిద్ర పోతున్నారా ? డేంజర్‌లో పడ్డట్లే !

Sleeping : ప్రస్తుత బిజీ లైప్ స్టైల్ కారణంగా చాలా మంది అర్థరాత్రి వరకు మేల్కొని ఉంటున్నారు. ఇలా చేయడం వల్ల నిద్రపై తీవ్ర ప్రభావం పడుతుందని ఆరోగ్య నిపుణులు చెబుతున్నారు. ఆలస్యంగా నిద్రపోయిన వారు ఆలస్యంగా మేల్కొంటుంటారు. ఇది చాలా మందికి ఒక సాధారణ అలవాటుగా మారింది. ఆలస్యంగా మేల్కొనే అలవాటు మీ మొత్తం ఆరోగ్యాన్ని మాత్రమే కాకుండా మీ గుండె, మెదడును కూడా ప్రతికూలంగా ప్రభావితం చేస్తుంది.

ఆలస్యంగా మేల్కొని ఉండటం, తగినంత నిద్ర లేకపోవడం ఈ రెండు శరీరంలోని అవయవాలకు చాలా ప్రమాదకరమని శాస్త్రీయ పరిశోధన, వైద్య నిపుణులు చెబుతున్నారు. దీని గురించిన పూర్తి వివరాలను ఇప్పుడు తెలుసుకుందాం.

మెదడుపై ప్రభావం:
మనం నిద్రపోతున్నప్పుడు, మన మెదడు మరమ్మత్తు జరుగుతుంది. నిద్రలో.. మెదడు రోజులోని సమాచారాన్ని క్రమబద్ధీకరిస్తుంది. జ్ఞాపకాలను ఏకీకృతం చేస్తుంది. అంతే కాకుండా బీటా-అమిలాయిడ్ వంటి వాటిని తొలగిస్తుంది.

రాత్రి వరకు మేల్కొని ఉండటం వల్ల మెదడుకు ఈ ముఖ్యమైన ప్రక్రియను పూర్తి చేయడానికి సమయం ఉండదు. ఫలితంగా ఇది జ్ఞాపక శక్తి కోల్పోవడం, ఏకాగ్రత ఇబ్బంది, నిర్ణయం తీసుకునే సామర్థ్యం బలహీనపడటం, మానసిక స్థితిలో చిరాకు పెరగడానికి దారి తీస్తుంది. దీర్ఘకాలిక నిద్ర లేమి కూడా నిరాశ, ఆందోళన వంటి మానసిక ఆరోగ్య సమస్యల ప్రమాదాన్ని పెంచుతుంది.

గుండెపై ప్రభావం:
మెదడు లాగే.. తగినంత నిద్ర కూడా గుండెకు చాలా ముఖ్యం . నిద్ర లేకపోవడం, రాత్రి ఆలస్యంగా మేల్కొనే అలవాటు శరీరాన్ని నిరంతరం ఒత్తిడి స్థితిలో ఉంచుతుంది. ఇది శరీరంలో ఒత్తిడి హార్మోన్ల స్థాయిని పెంచుతుంది. అంతే కాకుండా రక్త పోటుకు దారి తీస్తుంది.

సాధారణ పరిస్థితులలో.. రాత్రి సమయంలో రక్తపోటు తగ్గుతుంది. కానీ నిద్ర లేకపోవడం వల్ల రక్తపోటు ఎక్కువగా ఉంటుంది. ఇది గుండెపై అదనపు ఒత్తిడిని కలిగిస్తుంది. ఇది భవిష్యత్తులో గుండెపోటు, స్ట్రోక్ , ఇతర తీవ్రమైన గుండె సంబంధిత వ్యాధుల ప్రమాదాన్ని పెంచుతుంది. గుండెను ఆరోగ్యంగా ఉంచడానికి, ప్రతి రోజు రాత్రి 7 నుంచి 8 గంటల గాఢ నిద్ర పొందడం అవసరం.

హార్మోన్ల సమస్యలు:
రాత్రి ఆలస్యంగా మేల్కొనడం వల్ల శరీరం యొక్క ‘సర్కాడియన్ రిథమ్’ లేదా జీవ గడియారం ప్రభావితం అవుతుంది. ఇది మన నిద్ర, మేల్కొలుపు చక్రాన్ని నియంత్రిస్తుంది. ఈ గడియారం చెదిరిపోయినప్పుడు, ఇది మన హార్మోన్ల సమతుల్యతను నేరుగా ప్రభావితం చేస్తుంది. ఇది ఆకలిని ప్రేరేపించే హార్మోన్ల స్థాయిని పెంచుతుంది. ఫలితంగా ఆకలిని నియంత్రించే హార్మోన్ల స్థాయి తగ్గుతుంది.

Also Read: కల్తీ పన్నీర్ ఎలా గుర్తించాలి ?

నిద్ర లేకపోవడం వల్ల మనకు అర్ధరాత్రి ఆకలిగా ఉన్నట్టు అనిపిస్తుంది. ఇలాంటి సమయంలో ఎక్కువగా తినడం వల్ల కూడా ఊబకాయం, టైప్ 2 డయాబెటిస్ వంటి సమస్యలు వస్తాయి. అందుకే తగినంత నిద్ర పోవడం చాలా ముఖ్యమని ఆరోగ్య నిపుణులు చెబుతుంటారు. గుండె జబ్బులు, మెదడు పనితీరు మెరుగ్గా ఉండాలంటే ప్రతి రోజు నిద్ర తగినంతగా ఉండేలా జాగ్రత్తలు తీసుకోవాలి.