Processed Food: ప్రాసెస్డ్ ఫుడ్స్ ప్రస్తుత లైఫ్ స్టైల్లో భాగంగా మారాయి. రుచి, ఎక్కడ పడితే అక్కడ దొరుకుతాయని ఎక్కువగా ప్రాసెస్ చేసిన ఫుడ్ తింటే దీర్ఘకాలిక ఆరోగ్య సమస్యలకు దారితీస్తాయని అనేక పరిశోధనల్లో రుజువైంది. ప్రాసెస్డ్ ఫుడ్స్ తినడం వల్ల కలిగే ఆరోగ్య సమస్యలను గురించిన పూర్తి వివరాలను ఇప్పుడు తెలుసుకుందాం.
ఆరోగ్య సమస్యలు:
అల్ట్రా-ప్రాసెస్డ్ ఫుడ్స్ ఎక్కువగా తీసుకోవడం వల్ల శరీరంలోని ప్రతి ప్రధాన అవయవ వ్యవస్థకు హాని కలుగుతుందని పరిశోధనలు సూచిస్తున్నాయి.
1. ఊబకాయం, మధుమేహం:
అధిక చక్కెర : ఈ ఆహారాలలో రుచి కోసం అధిక మొత్తంలో చక్కెర, హై-ఫ్రక్టోజ్ కార్న్ సిరప్ కలుపుతారు. ఇవి శరీరానికి ఎలాంటి ముఖ్యమైన పోషకాలను అందించకుండా.. కేవలం అధిక కేలరీలను ఇస్తాయి. దీని వల్ల బరువు పెరగడం, శరీరంలో కొవ్వు పేరుకుపోవడం, ఇన్సులిన్ నిరోధకత పెరిగి టైప్– 2 మధుమేహం వచ్చే ప్రమాదం పెరుగుతుంది.
పోషకాల లోపం: UPFs లో విటమిన్లు, మినరల్స్, యాంటీ ఆక్సిడెంట్లు, ముఖ్యంగా ఫైబర్ చాలా తక్కువగా ఉంటాయి. ఫైబర్ లేకపోవడం వల్ల జీర్ణక్రియ మందగిస్తుంది. అంతే కాకుండా అతిగా తినాలనే కోరిక పెరుగుతుంది.
2. గుండె, రక్తనాళాల సమస్యలు:
సోడియం (ఉప్పు) అధికం: ప్రాసెస్డ్ ఫుడ్స్లో ఎక్కువ కాలం నిల్వ ఉండేందుకు.. రుచిని పెంచడానికి ఎక్కువగా ఉప్పు కలుపుతారు. ఇది అధిక రక్తపోటుకు దారితీసి, గుండె జబ్బులు, స్ట్రోక్, కిడ్నీ వైఫల్యం ప్రమాదాన్ని పెంచుతుంది.
అనారోగ్యకరమైన కొవ్వులు: ఈ ఆహారాలలో తరచుగా సంతృప్త కొవ్వులు, ట్రాన్స్ ఫ్యాట్స్ ఉంటాయి. ఇవి రక్తంలో చెడు కొలెస్ట్రాల్ స్థాయిలను పెంచి.. ధమనులలో అడ్డంకులకు కారణమవుతాయి.
3. క్యాన్సర్ ప్రమాదం:
ప్రాసెస్డ్, రెడ్ మీట్స్ (సాసేజ్లు, బేకన్) వంటి వాటిని తరచుగా తీసుకోవడం వల్ల పెద్ద పేగు క్యాన్సర్తో సహా కొన్ని రకాల క్యాన్సర్లు వచ్చే ప్రమాదం పెరుగుతుందని ప్రపంచ ఆరోగ్య సంస్థ హెచ్చరించింది. ఎందుకంటే.. ప్యాకేజింగ్లో వాడే రసాయనాలు ఆహారంలోకి చేరి ఆరోగ్యానికి హాని కలిగిస్తాయి.
4. ఇతర ఆరోగ్య సమస్యలు:
కిడ్నీ సమస్యలు: అధిక ఉప్పు, ఫాస్పరస్ కంటెంట్ వల్ల కిడ్నీలపై అదనపు భారం పడుతుంది. అంతే కాకుండా ఇలాంటి ఫుడ్ అధికంగా తీసుకునే వారిలో డిప్రెషన్ వంటి మానసిక ఆరోగ్య సమస్యలు వచ్చే ప్రమాదం పెరుగుతుందని కొన్ని అధ్యయనాలు సూచిస్తున్నాయి.
అడిక్షన్ : ఈ ఆహారాలు రుచిగా, త్వరగా తినే విధంగా తయారు చేయబడతాయి. కాబట్టి ఇవి మెదడులోని రివార్డ్ సెంటర్ను ప్రేరేపించి,.. వాటిని మళ్లీ మళ్లీ తినాలనే బలమైన కోరికను కలిగిస్తాయి.
ఏవి తినకూడదు ?
ప్రాసెస్డ్ ఫుడ్స్లో అతి తక్కువ ప్రాసెసింగ్ అయినవి (కట్ చేసిన కూరగాయలు, పాశ్చరైజ్డ్ పాలు) ప్రమాదకరం కావు. అయితే.. కింది అల్ట్రా-ప్రాసెస్డ్ ఫుడ్స్ ను తప్పకుండా తగ్గించాలి.
కూల్ డ్రింక్స్ : సోడా, కార్బొనేటెడ్ డ్రింక్స్, ప్యాకేజ్డ్ ఫ్రూట్ జ్యూస్లు, ఎనర్జీ డ్రింక్స్. వీటిలో చక్కెర, కృత్రిమ రంగులు అధికంగా ఉంటాయి.
ప్యాకేజ్డ్ స్నాక్స్ : చిప్స్, ప్యాక్ చేసిన బిస్కెట్లు, కేకులు, క్రాకర్లు, పఫ్స్. వీటిలో ఉప్పు, చెడు కొవ్వులు, ప్రిజర్వేటివ్స్ అధికంగా ఉంటాయి.
ప్రాసెస్డ్ మీట్స్ : సాసేజ్లు, బేకన్, డెలి స్లైస్లు (సలామీ). వీటిలో సోడియం నైట్రేట్లు/నైట్రైట్లు, వంటి హానికర రసాయనాలు ఉంటాయి.
తయారు చేసిన ఆహారాలు : ఫ్రోజెన్ డిన్నర్స్, ఇన్స్టంట్ నూడుల్స్/సూప్లు. వీటిలో సోడియం, నూనెలు, కృత్రిమ ఫ్లేవర్స్ ఎక్కువ.
Share
Uday Kiran : ఉదయ్ కిరణ్ చనిపోవడానికి ముందు ఏం మాట్లాడాడంటే? సంచలన విషయాలు బయటపెట్టిన డైరెక్టర్
Sarpanch Elections: ఆ విలేజ్లో సర్పంచ్ ఎన్నికలు కంప్లీట్.. ఎకగ్రీవంగా ఎన్నిక, గెలుపు సంబరాల్లో గ్రామస్థులు
