Pizza: మిగిలిపోయిన చపాతీలతో ఇలా టేస్టీ పిజ్జా చేసేయండి, కొనడం ఎందుకు

ఇంట్లో రోటీలు, చపాతీలు వంటివి మిగిలిపోవడం సహజం. అలాంటప్పుడు టేస్టీగా పిజ్జా చేసేందుకు ప్రయత్నించండి. ఈ రెసిపీ చాలా సులువు. తక్కువ సమయంలో తయారయ్యే ఈ రోటీ పిజ్జా పిల్లలు పెద్దలు అందరికీ నచ్చేలా ఉంటుంది. ఓవెన్ అవసరం లేకుండా పాన్ పైనే సులభంగా చేసుకోవచ్చు. రెసిపీ ఎలాగో చూసేయండి.

పిజ్జా రెసిపీకి కావలసిన పదార్థాలు
మిగిలిపోయిన రోటీలు లేదా చపాతీలు – రెండు లేదా మూడు
పిజ్జా సాస్ – రెండు స్పూన్లు
ఉల్లిపాయ – ఒకటి
టమోటా – ఒకటి
క్యాప్సికమ్ – సగం ముక్క
స్వీట్ కార్న్ – రెండు స్పూన్లు
మోజారెల్లా చీజ్ – తగినంత
ఒరేగానో – ఒక స్పూను
చిల్లీ ఫ్లేక్స్ – ఒక స్పూను
ఉప్పు – రుచికి సరిపడా
బటర్ లేదా ఆలివ్ ఆయిల్ – అర స్పూను

Also Read: Egg Kebabs: కోడిగుడ్లతో ఎగ్ కబాబ్స్ ఇలా చేశారంటే నోరూరిపోతుంది, రెసిపీ ఇదిగో

పిజ్జా రెసిపీ
1. ఉల్లిపాయలు, టమోటాలు, క్యాప్సికమ్ ముందుగానే సన్నగా తరిగి పెట్టాలి.
2. స్వీట్ కార్న్ ఉడికించుకోవాలి. చీజ్ తురిమి పెట్టుకోవాలి.
3. ఇప్పుడు స్టవ్ పై నాన్ స్టిక్ పాన్ పెట్టాలి. కొద్దిగా వెన్న లేదా ఆలివ్ ఆయిల్ వేయాలి.
4. ఇప్పుడు చపాతీలను పాన్ మీద పెట్టాలి. చపాతీలు కింద భాగం క్రిస్పీగా అయ్యేవరకు కాల్చుకోవాలి.
5. పైభాగంలో పిజ్జా సాస్ సమానంగా రాయాలి. సాస్ మీద ముందుగా తరిగిన ఉల్లిపాయ ముక్కలు, టమోటా ముక్కలు, క్యాప్సికమ్ ముక్కలు కూడా చల్లాలి.
6. చివరగా స్వీట్ కార్న్ చల్లితే పిజ్జాకు మంచి రుచి వస్తుంది.
7. ఇప్పుడు ఈ టాపింగ్స్ మీద అవసరమైనంత ఉప్పు చల్లాలి. అలగే ఒరేగానో, చిల్లీ ఫ్లేక్స్ కూడా చల్లాలి.
8. తర్వాత తురిమిన మోజారెల్లా చీజ్‌ను మొత్తం టాపింగ్స్ మీద కప్పేలా వేయాలి. చీజ్ ఎక్కువగా వేసుకుంటే పిజ్జా మరింత రుచిగా ఉంటుంది.
9. ఇప్పుడు కళాయి మీద మూత పెట్టాలి. మంటను చాలా తక్కువగా పెట్టాలి. చిన్న మంటలో నాలుగు నుంచి ఐదు నిమిషాలు ఉడికించాలి.
10. చీజ్ పూర్తిగా కరిగిన తర్వాత స్టవ్ ఆపాలి. రోటీ పిజ్జాను బయటకు తీసి కత్తితో ముక్కలుగా కట్ చేయాలి. వేడి వేడిగా సర్వ్ చేస్తే రుచి మరింత బాగుంటుంది.

చపాతీలు మిగిలిపోయినప్పుడు ఇలా పిజ్జా చేస్తే పిల్లలు ఇష్టంగా తింటారు.