ఆఫీసులకి, స్కూళ్ళకి ఉదయం ఎనిమిది లోపే బ్రేక్ ఫాస్టులు, లంచ్ బాక్సులు రెడీ చేయాలి. ప్రతిరోజు ప్రత్యేకంగా ఇడ్లీ, దోశల కోసం చట్నీ చేయాలంటే కష్టంగా ఉంటుంది. ఒకేసారి కొబ్బరి కారంపొడి చేసి పెట్టుకుంటే అప్పటికప్పుడు ఇడ్లీలతో, దోశలతో తినేయవచ్చు. ఇది చాలా రుచిగా ఉంటుంది. పైగా వేడి వేడి అన్నంలో ఒక స్పూన్ కొబ్బరి కారంపొడి వేసుకొని, నెయ్యి వేసుకొని తింటే ఆ రుచి అద్భుతం. తమిళులు, కన్నడిగులు ఎక్కువగా ఇష్టపడేది ఈ కొబ్బరి కారాన్నే. ఇడ్లీలో ఈ కొబ్బరి కారాన్ని నెయ్యితో కలిపి తింటే ఎంతో రుచిగా ఉంటుంది. ఇక దీని రెసిపీ ఎలాగో తెలుసుకోండి.
కొబ్బరి కారంపొడి రెసిపీకి కావలసిన పదార్థాలు
ఎండు కొబ్బరి తురుము లేదా ముక్కలు – పావు కిలో
ఎండుమిర్చి – 15
ఉప్పు – రుచికి సరిపడా
జీలకర్ర – ఒక స్పూను
వెల్లుల్లి రెబ్బలు – పది
కొబ్బరి కారం రెసిపీ
1. ఎండు కొబ్బరి తురుమును తీసుకొని కళాయిలో వేయాలి.
2. స్టవ్ మీద ఆ కళాయిని పెట్టి చిన్న మంట మీద వేయించుకోవాలి.
3. ఆ తర్వాత ఆ ఎండు కొబ్బరి తురుమును తీసి పక్కన పెట్టుకోవాలి.
4. కొబ్బరి తురుముకు బదులు ఎండు కొబ్బరి ముక్కలను కూడా తీసుకోవచ్చు.
5. ఇప్పుడు ఆ కళాయిలోనే ఎండుమిర్చిని వేసి బాగా వేయించి తీసి పక్కన పెట్టుకోవాలి.
6. ఇప్పుడు మిక్సీ జార్ లో ముందుగా వేయించి పెట్టుకున్న కొబ్బరి తురుము లేదా కొబ్బరి ముక్కలు, వెల్లుల్లి రెబ్బలు, జీలకర్ర, ఎండుమిర్చి, ఉప్పు వేసి మెత్తగా పొడి చేసుకోవాలి.
7. అంతే టేస్టీ కొబ్బరి కారంపొడి రెడీ అయినట్టే.
8. దీన్ని గాలి చొరబడని ఒక సీసాలో వేసి దాచుకోవాలి. ఇది నెల రోజుల పాటు తాజాగా ఉంటుంది.
ఈ కొబ్బరికారాన్ని బెండకాయ ఫ్రై లేదా దొండకాయ ఫ్రై, బంగాళదుంప ఫ్రై వంటివి చేస్తున్నప్పుడు చల్లుకుంటే రుచి అద్భుతంగా ఉంటుంది. లేదా వేడి వేడి అన్నంలో ఒక స్పూను వేసుకొని తిన్నా రుచిగా ఉంటుంది. దోశలు చేస్తున్నప్పుడు పైన ఈ కొబ్బరికారాన్ని చల్లి తింటే చట్నీ కూడా అవసరం లేదు. కొబ్బరి కారం ప్రాచీన కాలం నాటి రెసిపీ. దీనిలో ఎన్నో పోషకాలు కూడా ఉంటాయి. ఒకసారి మేము చెప్పిన పద్ధతిలో ట్రై చేసి చూడండి. మీకు ఇది కచ్చితంగా నచ్చుతుంది.
Share
Indian Railways: రైల్వే కొత్త రూల్.. అలా చేశారంటే జరిమానా కట్టాల్సిందే!
Tecno Spark Go 2 India: భారత్లో టెక్నో స్పార్క్ Go 2 లాంచ్.. అధ్బుత ఫీచర్లతో అతి తక్కువ ధరకే
