Blood Sugar: షుగర్ కంట్రోల్‌లో ఉండాలంటే.. ఈ టిప్స్ ట్రై చేయండి

Blood Sugar: రక్తంలో చక్కెర స్థాయిలు అకస్మాత్తుగా పెరగడాన్ని ‘హైపర్ గ్లైసీమియా’ అంటారు. ఇది ఒక్కోసారి ప్రాణాంతకంగా మారవచ్చు. విపరీతమైన దాహం, అలసట, మబ్బుగా కనిపించడం వంటివి దీని లక్షణాలు. ఇలాంటి సమయంలో వెంటనే చక్కెర స్థాయిలను తగ్గించడం చాలా ముఖ్యం. జీవనశైలిలో చిన్న చిన్న మార్పులు, తక్షణ జాగ్రత్తల ద్వారా ఇంట్లోనే రక్తంలో గ్లూకోజ్ స్థాయిలను ఎలా నియంత్రించవచ్చో ఇప్పుడు చూద్దాం. అయితే.. అత్యవసర స్థితిలో డాక్టర్ సలహా తప్పనిసరి.

ఎక్కువ నీరు తాగడం:
చక్కెర స్థాయిలు పెరిగినప్పుడు ఎక్కువ నీరు తాగాలి. ఇది మూత్రపిండాల ద్వారా అదనపు గ్లూకోజ్‌ను బయటకు పంపడానికి సహాయపడుతుంది. శరీరాన్ని హైడ్రేటెడ్‌గా ఉంచడం వల్ల ఇన్సులిన్ నిరోధకత తగ్గుతుంది.

చురుకైన నడక: శారీరక శ్రమ కండరాలు రక్తంలోని గ్లూకోజ్‌ను ఉపయోగించుకునేలా చేస్తుంది. చక్కెర పెరిగినప్పుడు 15-20 నిమిషాల వేగవంతమైన నడక ఫలితాన్ని ఇస్తుంది. అయితే, రీడింగ్ 240 mg/dL కంటే ఎక్కువ ఉంటే వ్యాయామం చేసే ముందు జాగ్రత్త వహించాలి.

ఫైబర్ ఫుడ్: పీచు పదార్థం ఎక్కువగా ఉండే ఆహారం తీసుకుంటే రక్తంలో చక్కెర శోషణ నెమ్మదిస్తుంది.

ఒత్తిడి తగ్గించుకోవడం: ఒత్తిడి పెరిగినప్పుడు శరీరం ‘కార్టిసాల్’ వంటి హార్మోన్లను విడుదల చేస్తుంది. ఇవి చక్కెర స్థాయిలను పెంచుతాయి. లోతైన శ్వాస తీసుకోవడం లేదా మెడిటేషన్ వల్ల తక్షణ ఉపశమనం లభిస్తుంది.

నిద్రపై దృష్టి: సరిగ్గా నిద్ర లేకపోవడం ఇన్సులిన్ పనితీరును దెబ్బతీస్తుంది. తగినంత విశ్రాంతి చక్కెర నియంత్రణకు ముఖ్యం.