Dry Lips: చలికాలంలో మృదువైన పెదాల కోసం.. ఈటిప్స్ ఫాలో అవ్వండి

Dry Lips: చలికాలంలో పెదాలు పగిలడం, పొడిబారడం అనేది చాలా మందిని వేధించే ఒక సాధారణ సమస్య. పెదాల పగుళ్లు నొప్పిని కలిగించడమే కాకుండా.. చూడటానికి కూడా ఇబ్బందికరంగా ఉంటాయి. ఇదెలా ఉంటే.. సరైన జాగ్రత్తలు తీసుకుంటే ఈ సమస్యను సులభంగా నివారించవచ్చు. ఇంతకీ చలికాలంలో వచ్చే ఈ సమస్యకు ఎలాంటి హోం రెమెడీస్ వాడాలనే విషయాలను గురించిన పూర్తి వివరాలను ఇప్పుడు తెలుసుకుందాం.

1. పొడి పెదాలకు కారణాలు:

పెదాల చర్మం శరీరంలోని ఇతర భాగాల కంటే చాలా సున్నితంగా.. పలచగా ఉంటుంది. అందుకే అవి త్వరగా తేమను కోల్పోతాయి.

తేమ లేకపోవడం: శరీరంలో నీటి శాతం తగ్గితే.. పెదాలు వెంటనే పొడిబారుతాయి.

వాతావరణం: చలి గాలులు, తక్కువ తేమ, లేదా అధిక వేడి వంటి వాతావరణ మార్పులు పెదవులు పగలడానికి కారణం అవుతాయి.

పెదాలను నాలుకతో తడపడం: కొంతమంది పెదాలు పొడిబారగానే నాలుకతో తడపడానికి ప్రయత్నిస్తారు. లాలాజలం త్వరగా ఆవిరైపోయి, పెదాలపై ఉన్న కొద్దిపాటి తేమను కూడా తొలగిస్తుంది. దీనివల్ల పెదాలు మరింత పొడిబారతాయి.

కొన్ని రకాల ప్రొడక్ట్స్: కొన్ని రకాల లిప్‌స్టిక్‌లు లేదా టూత్‌పేస్ట్‌లలో ఉండే పదార్థాలు చికాకు కలిగించవచ్చు.

విటమిన్ లోపాలు: విటమిన్ బి కాంప్లెక్స్ లేదా జింక్ లోపాలు పెదాల ఆరోగ్యాన్ని ప్రభావితం చేయవచ్చు.

2. నివారణ చర్యలు:

హైడ్రేటెడ్‌గా ఉండటం : రోజూ సరిపడా నీరు తాగడం ద్వారా శరీరం లోపలి నుంచి తేమగా ఉంటుంది. ఇది పెదాల ఆరోగ్యాన్ని కాపాడుతుంది.

లిప్ బామ్ వాడకం: పెట్రోలియం జెల్లీ, షియా బటర్ లేదా కొబ్బరి నూనె వంటి మాయిశ్చరైజర్లు ఉన్న లిప్ బామ్ ను తరచుగా ఉపయోగించాలి.

ఎండ నుంచి రక్షణ: బయటికి వెళ్లేటప్పుడు SPF 30 లేదా అంతకంటే ఎక్కువ ఉన్న లిప్ బామ్‌ను వాడాలి. సూర్యుని UV కిరణాలు పెదాలను పగలగొట్టగలవు.

నాలుకతో తడపడం మానుకోండి: పెదాలు పొడిబారినప్పుడు వాటిని నాలుకతో అస్సలు తడపకూడదు.

నోటి ద్వారా శ్వాస తీసుకోకపోవడం: ముఖ్యంగా నిద్రపోయేటప్పుడు నోటి ద్వారా శ్వాస తీసుకోవడం వల్ల పెదాలు ఎండిపోతాయి.

Also Read: కొంత మందికి.. చిన్న వయస్సులోనే తెల్ల జుట్టు ఎందుకొస్తుంది ?

హోం రెమెడీస్:

తేనె : తేనెలో సహజమైన యాంటీమైక్రోబయల్, వైద్యం చేసే గుణాలు ఉన్నాయి. పడుకునే ముందు కొద్దిగా తేనెను పెదాలకు రాయడం మంచిది.

కొబ్బరి నూనె : కొబ్బరి నూనె అద్భుతమైన మాయిశ్చరైజర్. ఇది పెదాల పగుళ్లను మాన్పడానికి, తేమను నిలుపుకోవడానికి సహాయపడుతుంది. రోజుకు కొన్ని సార్లు రాయవచ్చు.

కలబంద జెల్ : పెదాల పగుళ్లు మంటగా లేదా నొప్పిగా ఉంటే, స్వచ్ఛమైన కలబంద జెల్ అప్లై చేయడం ద్వారా ఉపశమనం లభిస్తుంది.

ఎక్స్‌ఫోలియేషన్ : పెదాలపై పేరుకున్న డెడ్ స్కిన్ సెల్స్‌ను తొలగించడానికి, కొద్దిగా చక్కెర, నూనె కలిపిన మిశ్రమంతో సున్నితంగా మసాజ్ చేసి, గోరువెచ్చని నీటితో శుభ్రం చేయాలి. వారానికి ఒకసారి మాత్రమే ఇలా చేయాలి. చలికాలంలో కొన్ని రకాల హోం రెమెడీస్ వాడటం వల్ల కూడా మంచి ఫలితం ఉంటుంది.