Matka Cleaning Tips: ఎండలు ముదిరాయంటే చాలు.. ఫ్రిజ్ నీళ్ల కంటే మట్టి కుండలో నీళ్లను ఎక్కువగా తాగుతుంటాం. ఆ మట్టి వాసన, ఆ చల్లదనం ఇచ్చే తృప్తే వేరు. అందుకే చాలామంది వేసవి రాగానే కొత్త మట్టి కుండను కొంటుంటారు. అయితే మార్కెట్ నుంచి కుండ తెచ్చిన వెంటనే చాలామంది చేసే పెద్ద తప్పు ఏంటంటే.. లోపల చేయి పెట్టి గట్టిగా రుద్ది కడగడం. చూడటానికి ఇది మామూలు విషయమే అనిపించినా.. దీనివల్ల కుండ పాడయ్యే అవకాశం ఉంది.
మట్టి కుండలు సహజంగా తయారవుతాయి కాబట్టి వాటి లోపలి భాగం చాలా డెలికేట్గా ఉంటుంది. కుండకు ఉండే చిన్న చిన్న రంధ్రాల ద్వారా గాలి తగిలి నీరు చల్లబడుతుంది. మనం చేయి పెట్టి లోపల గట్టిగా రుద్దినప్పుడు, ఆ రంధ్రాలు మూసుకుపోయే ప్రమాదం ఉంది. ఫలితంగా మీరు ఎంత మంచి కుండ కొన్నా.. అది నీటిని సరిగ్గా చల్లబరచదు.
చేతులతో కుండను రుద్దినప్పుడు మన చేతులకు ఉండే జిడ్డు లేదంటే సోపు వాసన వంటివి కుండకు అంటుకుంటాయి. మట్టికి పీల్చుకునే గుణం ఎక్కువ కాబట్టి.. ఆ వాసనంతా నీటిలోకి చేరి రుచి మారిపోతుంది. అంతేకాదు.. గట్టిగా రుద్దడం వల్ల మట్టి పొరలు దెబ్బతిని, మన కంటికి కనిపించని చిన్న పగుళ్లు వస్తాయి. దీనివల్ల కుండ త్వరగా పగిలిపోయే ఛాన్స్ ఉంటుంది.
కొత్త కుండను శుభ్రం చేయడం పెద్ద కష్టమేమీ కాదు. మొదట కుండను మామూలు నీళ్లతో పైన, లోపల ఒకసారి కడిగేయాలి. ఆ తర్వాత కుండ నిండా నీరు పోసి ఒక పూట లేదా కొన్ని గంటల పాటు అలాగే వదిలేయండి. ఇలా చేయడం వల్ల లోపల ఉన్న మట్టి రేణువులన్నీ నీటిలోకి వచ్చేస్తాయి. ఆ తర్వాత కుండను అటు ఇటు తిప్పుతూ ఆ నీటిని పారబోస్తే సరిపోతుంది. పొరపాటున కూడా పీచు లేదా సోపు వాడకండి.
కుండను సిద్ధం చేశాక దానిపై ఎప్పుడూ మూత పెట్టి ఉంచండి. నీటిని తీసుకోవడానికి గ్లాసును నేరుగా లోపల ముంచకుండా, పొడవాటి కాడ ఉన్న గరిటెను వాడటం మంచిది. దీనివల్ల నీరు కలుషితం కాదు. కుండ బయటి భాగాన్ని అప్పుడప్పుడు తడి గుడ్డతో తుడుస్తూ ఉంటే, రంధ్రాలు క్లియర్ అయి నీరు ఇంకా బాగా చల్లబడుతుంది.
కుండ కడగడానికి సబ్బులు, డిటర్జెంట్లు అస్సలు వాడకూడదు. కుండ ఆ కెమికల్స్ని పీల్చుకుంటే, నీళ్లన్నీ సబ్బు వాసన వస్తాయి. కేవలం పాత పద్ధతిలో నీళ్లతోనే శుభ్రం చేసుకోవాలి. ఈ చిన్న జాగ్రత్తలు పాటిస్తే మీ కుండ ఎక్కువ కాలం మన్నికగా ఉండటమే కాకుండా, మన పాత కాలపు రుచికరమైన చల్లని నీటిని మీకు అందిస్తుంది.
Also Read: తెలంగాణ స్టైల్ బగారా అన్నం.. ముద్దపప్పు లేదా నాటుకోడి కూరతో తింటే ఇక స్వర్గమే!
Share
ఆశించిన ఫలితం రాలేదని కవిత కొత్త పార్టీ ప్రకటన: నవీన్ చారి!
స్పెషల్ సాంగ్లో శృతి హాసన్.. ‘పెద్ది’కి అదిరిపోయే గ్లామర్ టచ్!
